Hebraios 7 - Ashiri Aeuitaknup Iyohaichish Yona 1897

7 Ik.

¹ Tan Merukizedek anak ne Sarem esapane guru ne, Iyotta Rikun Kamui otta yaishieiwangere guru ne, awa, shinuma anak ne nei moshiri shikkashima utara ronnu-i orowa no hoshipi korʼan Abraham etunangara wa shinnunuke nisa,

² orowa, Abraham anak ne obitta no okaibe gusu wanbe un shinep Shinuma orota kore nisa ruwe ne, aige shinuma ramma-kane Kamui otta yaishieiwangere guru ne ruwe ne na (nei reihei apita yakun, hoshike no Oupekap esapane guru ari an ikkeu ne, orowa no,

³ Itomo esapane guru ari an ambe ne; ona sak, unu sak, ikiri sak, toho gusu atpake isam, ishu ambe gusu shiokere shomoki, koroka, Kamui Roho nei no akara an na).

⁴ Tane, otta nei ekashi mak un ekashi ne Abraham anak ne iyotta pirika auina okaibe gusu wanbe un shinep koropare tan an guru nep pase ambe ne sekoro esanniyo yan.

⁵ Orowa, Kamui otta aeyaishieiwangere kuni ne anumge okai Rebi poho utara anak ne son no newa tuitak nei no utara orowa no wanbe un shinep uina kuni akashpaotte ruwe ne, awa, nei utara Abraham tumam-noshke san wa koro iriwak ne a yakka shiriki an na:

⁶ koroka, nei utara orowa no san ikiri shomo ne an guru anak ne Abraham orowa no wanbe un shinep uina, aige, eitakamkirep akore guru shinnunuke nisa ruwe ne.

⁷ Koroka, pase guru orowa no pokashnu an guru anunuke an ruwe ne sekorʼambe gusu anak upaure ambe isam.

⁸ Orowa, teda anak ne rai kuni utara wanbe un shinep uina; koroka, toada anak ne shinen uina ruwe ne, aige, shinuma ishu ruwe ne sekoro aepaweteshu an na.

⁹ Orowa, wanbe un shinep akore Rebi ne yakka Abraham kari wanbe un

¹⁰ shinep sange okere korachi nep; inambe gusu ne yakun, Merukizedek etunangara ita shinuma anak ne koro michi koro tuman-noshiketa an ruwe ne gusu ne na.

¹¹ Nei Rebi gusu an Kamui otta yaishieiwangere ambe gusu aeramushinne-hi an chiki (inambe gusu ne yakun, nei ambe pokta utara okai hine tuitak akore nisa), Aaron ikiri nei no aesanniyo shomo ne no Merukizedek ikiri ne no aesanniyo Kamui otta yaishieiwangere guru hopuni kuni naa okai aeshiramne ushike nep an a?

¹² Inambe gusu ne yakun, nei Kamui otta yaishieiwangere moni anak ne aitasare an gusu, nekon a ka tuitak ne yakka aitasare kunip ne.

¹³ Aige, gusu tapan okaibe aye guru anak ne oya ainu ikiri un gunʼne, awa, nei ikiri orowa no an wa nei yange-set otta yaishieiwangere guru isam ruwe ne gusu ne na.

¹⁴ Inambe gusu ne yatun, chikoro Utarapa anak ne Youda orowa no hetukup ne, aine, tan ikiri wano okai Kamui otta yaishieiwangere utara gusu Mose anak ne nepka shomo ye nisa ruwe ne.

¹⁵ Orowa, Merukizedek nepkoro an, kam gusu aeikashpaotte tuitak nei no shomo ne, koroka, ramma okere shomoki inotu kiroro nei no an,

¹⁶ Kamui otta yaishieiwangere guru hetuku yakun, tap okaibe naa aeramu-isaikap ne.

¹⁷ Inambe gusu ne yakun, paweteshu ambe anak ene ani ne, Aokai anak ne Merukizedek korachi Otusashuishiri pakno Kamui otta yaishieiwangere guru ne,

¹⁸ kiroro-sak wa pirikare eaikap gusu hoshike no an

¹⁹ ikashpaotte anak ne aisamka an na (inambe gusu ne yakun, tuitak anak ne nep ne yakka eramushinnere eaikap), shui, gusu chi utara anak ne Kamui koehange hine nei kashita naa pirika no an chipachipa kunip aahunge ruwe ne.

²⁰ Orosama, shiyuppa no ye shomoki no nei ambe shomo iki gusu inambe gusu ne yakun,

²¹ (nei utara anak ne shomo shiyuppa no ye wa Kamui otta yaishieiwangere utara ne akara; koroka, nei guru anak ne Shinuma gusu itak wa shiyuppa no ye guru ani iki, ene hawe okai-hi :— Utarapa shiyuppa ekambakte wa eyaikokatpak shomoki, Aokai anak ne otusashuishiri pakno Kamui otta yaishieiwangere guru ne);

²² nei oro pakno ka Yesu anak ne naa pirika aeuitaknup gusu an eikotchanep ne ruwe ne.

²³ Orowa, nei utara anak ne son no poka rai hine okai eaikap gusu, Kamui otta yaishieiwangere inne utara ne akara;

²⁴ koroka, Shinuma anak ramma pakno an gusu, chiitasare shomo ne an Kamui otta yaishieiwangere moni kon ruwe ne.

²⁵ Tambe gusu, Shinuma anak ne utara gusu koramkoro kuni ne ramma ishu shiriki, aine, Shinuma kari Kamui koehange no araki utara earikinne kaobiuki eashkai ruwe ne na.

²⁶ Inambe gusu ne yakun, nei no an, ashkanne, wen-buri isam, turu-sak, chikokatpak utara wano shinnai no aande wa kando kasu no eetasa ri no akara Kamui otta yaishieiwangere iyotta pase guru un gusu aatte ruwe ne;

²⁷ Shinuma anak ne hoshike no yaitota koro chikokatpak gusu, orowa no nei okaketa utara korobe gusu, nei Kamui otta yaishieiwangere iyotta pase utara korachi kesto range ayange kunip yange tuni guru shomo ne; inambe gusu ne yakun, Shinuma yaikota yaiyange ita arashui patek iki nisa ruwe ne gusu ne na.

²⁸ Tuitak anak ne katchak wa okai utara ani Kamui otta yaishieiwangere iyotta pase utara ne atte; koroka, tuitak okake an shiyuppa no ye itak anak ne ramma pakno aeramushinne an Poho atte ruwe ne.