Hebraios 5 - Ashiri Aeuitaknup Iyohaichish Yona 1897

5 Ik.

¹ Inambe gusu ne yakun, pishno okai Kamui otta yaishieiwangere iyotta pase guru anak ne, ainu utara tumuge wa auk hine Kamui gusu an okaibe gusu ainu utara ankushkerai aatte ruwe ne, nei ambe anak chikokatpak gusu akorep newa ayangep yange kuni gusu ne na:

² nei guru yaikota ne yakta katchakbe ani aokarire wa an gusu, eramsatbe newa ohaita utara eramu-haugere eashkaibe ne;

³ aige, nei ikkewehe an gusu moshima okai utara gusu nei no, yaikota gusu ne yakka, chikokatpak gusu an ayangep yange kunip ne ruwe ne.

⁴ Aine, inan guru ne yakka yaikota gusu rengaine tapan aainukorobe koro shomoki, Aaron korachi, Kamui orowa no anishuk chiki kon ruwe ne.

⁵ Tambe nei no Kiristo ne yakka Kamui otta yaishieiwangere iyotta pase guru ne kuni yaiatte shomoki, koroka, Shinuma otta aye-hi korachi ne :— Aokai anak ne Ku poho e ne ruwe ne, Tanto e hetukure ash na:

⁶ Shui, moshima an ushiketa ne yakka ye :— Aokai anak ne Merukisedek korachi Otusashuishiri pakno Kamui otta yaishieiwangere guru ne.

⁷ Shinuma anak ne kam netobake koro ita, rai-i orowa ohaitare eashkaibe otta, rui-chish newa nupe tura, inonno-itak newa koramkorope yange okere chiki, orowa, oripak an no ishitoma gusu anu okere chiki,

⁸ Shinuma poho ne a yakka aeyairamshitnere an okaibe gusu itaknu ambe eyaihannokkan nisa;

⁹ samata, Shinuma aeramushinnere okere chiki, otta koitaknu obitta no okai utara gusu otusashuishiri pakno an kashichiobiuki ambe koro ikkewe ne akan na;

¹⁰ aige, Merukisedek ikiri korachi Kamui otta yaishieiwangere guru ne ari Kamui orowa no areikore nisa ruwe ne.

¹¹ Nei ambe gusu aye kuni ambe poron no okai, awa, echi utara nu e wen utara ne ruwe ne gusu, apita kuni hokamba ruwe ne.

¹² Inambe gusu ne yakun, pakihi gusu echi utara anak ne moshima utara epakashnu kuni gusu an utara echi ne kunip ne, awa, Kamui orushpe gusu an iyotta atpake an ap koro isaika ambe aepakashnu wa eyaihannokkara kuni utara echi ne; aige, nishte aep shomo ne no an tope eishiramne utara echi ne okere ruwe ne.

¹³ Inambe gusu ne yakun, tope ibe inan guru ne yakka oupeka an itak gusu eram-sakbe ne; shinuma teinep ne ruwe ne gusu ne na.

¹⁴ Koroka, nishte aep anak ne shukup okere utara gusu an ambe ne, eiwange gusu koro mondum-kat anak ne pirikap newa wenbe shinnai-are utara gusu nep ne ruwe ne.