Garatea 4 - Ashiri Aeuitaknup Iyohaichish Yona 1897

4 Ik.

¹ Koroka, tambe ku ye, eikeshkore kuni guru anak ne nokan rapoketa, nep ne yakka koro Nishpa ne a yakka usshiune guru echutko no an shomo ne:

² koroka, koro michi esanniyo paha epa pakno korobe shikkashimare guru newa epunginere guru orowa no aesapanere wa an ruwe ne.

³ Chi utara ne yakka pon rapoketa moshiri gusu an isaika epakashi otta akousshiune wa okai nisa ruwe ne: koroka, epa kuni paha epa chiki,

⁴ Kamui anak ne koro Poho sange; Shinuma shiwentep orowa no hekatu, tuitak otta hekatu;

⁵ tambe anak ne tuitak otta okai utara kikiraye kuni gusu an ambe ne, chi utara anak poho ne akara kuni gusu an ambe ne ruwe ne.

⁶ Orowa, echi utara poho echi ne wa gusu, Kamui anak ne koro Poho kon Ramat chikoro keutura ta ahunge wa, Abba, Michihi, yere nisa ruwe ne.

⁷ Tambe gusu, eani anak ne naa tane usshiune guru shomo ne, poho e ne ruwe ne: orowa, poho e ne chiki, Kamui gusu eikeshkore guru e ne ruwe ne.

⁸ Koroka, nei ita anak ne echi utara Kamui eamkiri shomoki wa, shomo Kamui ne okaibe otta ausshiunere nisa ruwe ne:

⁹ koroka, tane Kamui echi eamkiri, tane Kamui orowa no echi aeamkiri an hine, hemanda gusu, otta kanna-shui ausshiunere rusui katchak aepange an isaika ambe otta koshikiru ya?

¹⁰ Echi utara anak ne toho enomi, chup enomi, un pa enomi, paha enomi ruwe ne.

¹¹ Ikineipeka kuani raka-sak no echi utara gusu ku iki sekorʼambe ku shitoma ruwe ne.

¹² Iriwak utara, echi utara en korachi okai kuni echi onishnishi ash, inambe gusu ne yakun, kuani anak ne echi utara korachi ku an ruwe ne:

¹³ koroka, ku kara otta katchak ushike an gusu, atpaketa echi otta pirika shongo ku eupaskuma nisa ruwe ne sekoro echi eraman:

¹⁴ orowa, ku kam gusu echi koramnukara ambe anak shomo echi etunne, shomo echi emaka nisa ruwe ne; koroka, Kamui hauturumbe korachi, Kiristo Yesu korachi echi utara en uk nisa ruwe ne.

¹⁵ Yakun, echi gusu an shinnunuke ambe neita an ruwe he an? Inambe gusu ne yakun, tap ku paweteshu ku ki-hi, echi eashkai chiki, echi utara anak ne yaikota koro shikihi oashinge wa en kore kusu ne na.

¹⁶ Son no ambe kuani echi nure ash gusu, echi epokba guru ku ne ruwe he an?

¹⁷ Nei utara anak ne shiarikiki no echi hunara ruwe ne koroka pirikap gusu shomo ki; echi utara nei guru hunara kuni gusu, nei utara anak ne echi soita koapa shi rusui ruwe ne na.

¹⁸ Ouse echi tura ku an ita patek shomo ne, koroka, ramma-kane pirikap gusu shiarikiki no hunara ambe anak ne pirika ruwe ne.

¹⁹ Ku goro nokan utara, Kiristo anak ne echi oshiketa akara pakno, shui, echi utara gusu unuwap ku ki;

²⁰ ruwe un, tane echi tura no ku an wa ku hawe itasare rusui; echi utara gusu ku keutum utumashire ruwe ne gusu ne na.

²¹ Tuitak choropoketa okai rusui utara tambe en nure

²² yan, nei tuitak echi nu shomoki ruwe he an? Inambe gusu ne yakun, Abraham anak ne tu po koro, shinen anak auitek-mat orowa no ashikore, shinen auitek shomo ne an mat orowa no ashikore nisa ruwe ne, sekorʼambe chieshinnuye wa an ruwe ne gusu ne na.

²³ Koroka, auitek-mat orowa no ashikorep anak ne kam irenga gusu an ambe ne; nei shomo auitek an mat orowa no ashikorep anak eitakamkire an irenga gusu an ap ne ruwe ne.

²⁴ Tapan okaibe otta aki maukushte ikip an: inambe gusu ne yakun, nei shiwentep anak ne tu aeuitaknup ne; shinen anak ne Sinai nupuri wano an wa ausshiune kuni poho hekatu, nei ambe anak ne Hagar ne ruwe ne.

²⁵ Orowa, tan Hagar anak ne Arabia moshiri ta an Sinai nupuri ne wa tane an Yerusarem epeka ruwe ne; shinuma anak ne poho tura ausshiune an ruwe ne gusu ne na.

²⁶ Koroka, rikta an Yerusarem anak ne ausshiune ambe shomo ne, shinuma anak chikoro unu ne ruwe ne.

²⁷ Ene chieshinnuye wa an ruwe ne gusu ne na:— Po shikore shomoki po-sak guru nupetne yan; Nuwap shomoki guru hawe ashte yan; Inambe gusu ne yakun, yaikoan guru koro poho anak ne hoku koro guru koro poho kasu no naa inne ruwe ne gusu ne na.

²⁸ Hetak, iriwak utara, Isaak korachi chi utara ne yakka eitakamkire an irenga gusu an poho chi ne ruwe ne.

²⁹ Koroka, nei ita kam irenga gusu hetuku poho anak ne Ramat irenga gusu betukup keshke korachi, tane ne yakka ene ani ne ruwe ne.

³⁰ Yakka, Kamui kambi-sosh hemanda ye ya? Nei uitek-mat poho tura emaka yan: inambe gusu ne yakun, uitek-mat koro poho anak ne shomo auitek an mat koro poho tura okaibe eikeshkore shomoki gusu ne na.

³¹ Tambe gusu, iriwak utara, chi utara anak ne nei uitek-mat koro poho shomo chi ne, koroka nei shomo auitek an mat koro poho chi ne ruwe ne na.