Ekambakbe 20 - Ashiri Aeuitaknup Iyohaichish Yona 1897

20 Ik.

¹ Orowa, asam-sak-i gusu an kangi koro, tekehe ta poro kani-shinkop ani wa an shine hauturumbe kando orowa no ran ambe ku nukara.

² Awa, shinuma anak ne Nitnep newa Satan ani aporose nei a kinashutunguru, nei a fushko okokko, kishima wa ashikne shine wan hotne pa uturu pakno gusu tupetupe hine nei a asam-sak-i orun eyapkire,

³ aige, nei ambe seshke wa shinuma kashita numpe ani kotukka nisa; tambe anak ne nei ashikne shine wan hotne pa aokere pakno tewa no moshiri uirup iteki kokandama kuni gusu an ambe ne: nei okaketa irukai uturuta apita kusu ne na.

⁴ Orowa, inne amset newa kashita rok shiri okai utara ku nukara, awa, nei utara koipishi iki kuni mondum akore nisa ruwe ne: samata. Yesu gusu an paweteshu iki ambe gusu hemhem, Kamui itak gusu hemhem, nei a chikoikip newa chikoikip koro noka shomo koongami ambe gusu hemhem, koro keputuru kata hene koro teke kata hene chikoikip koro shirosh shomo aomare ambe gusu hemhem sapa otuye utara kon ramat ku nukan nisa ruwe ne; aige, nei utara ishu wa ashikne shine wan hotne pa uturuta Kiristo tura epungine ruwe ne.

⁵ Orowa, moshima okai rai an utara anak ne nei ashikne shine wan hotne pa aokere shomoki pakno ishu shomoki ruwe ne. Tambe anak ne atpake an hetopo-a-shiknure ambe ne ruwe ne.

⁶ Nei atpake an hetopo-a-shiknure-hi ta aomare gurʼanak ne shinnunuke newa ash kan nep ne ruwe ne: tan utara okkeu kashi tu ikinne an rai-ambe anak mondum isama; koroka, nei utara Kamui newa Kiristo gusu yaishieiwangere utara ne wa ashikne shine wan hotne pa uturuta Shinuma tura epungine kusu ne na.

⁷ Orowa, nei ashikne shine wan hotne pa aokere chiki, Satan anak ne apita wa koro pakashnu chisei wano soine,

⁸ aige, moshiri ine shikkeu ta okai uirup kokandama wa Gog newa Magog tumi-koro iki kuni ne uwekarapare kuni gusu shinuma oashin kusu ne: nei utara pishkihi anak ne a tu isam ota korachi ne ruwe ne.

⁹ Orowa, nei utara anak ne moshirʼebitta kamu pakno hemeshpa, aige, ashkanne utara koro oshiroma kash newa nei omap an machiya nikkotama: aine, kando orowa no abe rap hine nei utara isamka nisa ruwe ne.

¹⁰ Orowa, nei utara kokandama nitne kamui anak ne nei a abe newa iwau to oshike un aeyapkiri nisa, nei ushiketa nei a chikoikip newa shunge uweingara guru ne yakka okai ruwe ne; awa, tokap to ta ne yakka, kunne to ta ne yakka ramma otusashuishiri pakno aiuninkare kusu ne na.

¹¹ Orowa, poro retara amset, samata, nei kashiketa rokbe ku nukara, awa, Shinuma koro nanuhu wano toitoi newa kando newa kira nisa ruwe ne, aige, okai kuni ushike shomo anukan ruwe ne na.

¹² Orowa, nei amset kotpokita porobe rai utara ne yakka ponbe rai utara ne yakka roshki shiriki-hi ku nukan nisa; orowa, nei kambi-sosh apirasa: shui moshima an kambi-sosh ne yakka apirasa ruwe ne, nei ambe anak inotu oma kambi-sosh ne ruwe ne na: orowa, rai utara anak ne nei kambi-sosh kata chieshinnuye wa an korachi, ki ikip an nei no, akoipishi nisa ruwe ne.

¹³ Orowa, atui anak ne oshiketi okai rai utara sange; rai-i newa Hedes kane koro oshiketa okai rai utara sange nisa ruwe ne: orowa, nei utara pishno-pishno ki ikip an korachi akoipishi nisa ruwe ne na.

¹⁴ Orowa, rai-i newa Hedes anak ne abe to orota aeyapkiri. Tambe anak, tan abe to anak ne, tutanu an rai ambe ne ruwe ne.

¹⁵ Orowa inan guru ne yakka nei inotu oma kambi-sosh kata reihei shomo anuye wa an sekoro anukara chiki, nei abe to orota aeyapkiri nisa ruwe ne na.