Ekambakbe 2 - Ashiri Aeuitaknup Iyohaichish Yona 1897

2 Ik.

¹ Epesos kotan ta an karisia koro hauturumbe gusu ene nuye yan; Koro shimon teke oshiketa nei arawan nochiu koro guru, nei arawan kongani ratchako tumugeta apkash shiri an guru ene itak-hi :—

² E iki ambe hemhem, e tumutui ambe hemhem, e yaiyupupu ambe hemhem, samata, wen utara tura e an eaikapbe, orowa, Apostoro shomo ne okai hine apostoro ari an reihei ani yaiporose utara uwande wa shunge utara ne sekoro e nukara ambe Ku eraman;

³ aige, eani yaiyupupu an wa Ku reihei gusu yaishiporore hine shomo tumutui ruwe ne.

⁴ Koroka, aokai anak ne atpaketa e iki omap ambe eyaikoemaka gusu, e eiyonnuppa kunip an ruwe ne na.

⁵ Tambe gusu, hunak oro e hachiri an ambe eshkarun yan, orowa, yaikokatpak wa atpake an ikip iki yan; shomo ne chiki, e yaikokatpak shomoki chiki, e orun Ku ek hine koro ushike wano e koro ratchako Ku uk kusu ne.

⁶ Koroka, tambe, e otta an ruwe ne, Nikoraitan un utara iki ikip e etunne, Kuani ne yakka nei okaibe Ku etunne ruwe ne na.

⁷ Kisara koro guru anak ne karisia utara orun Ramat ye itak ambe nu yan. Annokara guru otta Kamui Paradeisos ta an inotu oma chikuni nikaop shinuma Ku ibere kusu ne na.

⁸ Orowa, Sumurna kotan ta an Karisia koro hauturumbe gusu ene nuye yan;

⁹ Atpake an, iyoshi no an, rai okere wa ishu ambe ene itak-hi: E ki eramchuptekbe newa e irapokkari an ambe Ku eraman (koroka oteknu ambe e ne), samata, Yudea un utara ne ari yaikota ye a koroka Yudea un utara shomo ne Satan uwekari un utara ne sekorʼan utara iki koatcha ambe Ku eraman.

¹⁰ Tane e iki kusu ne a ramushitnere okaibe gusu iteki ishitoma yan: ingarʼan, echi utara auwande kuni ne nitnep anak ne echi sereke okai utara ipakashnu chisei ta omare kuni etokooiki korʼan ruwe ne; aige, wan to uturuta echi eramchuptek kusu ne na. Rai pakno ikipniukesh no okai yan, yakun, Kuani inotu oma sapa-umbe e kore ash kusu ne na.

¹¹ Kisara koro guru auak ne karisia utara orun Ramat ye itak ambe nu yan. Annokara ki guru anak ne tu ikinne an rai ambe gusu awende shomoki kusu ne na.

¹² Orowa, Pergamos kotan ta an karisia koro hauturumbe gusu ene nuye yan;

¹³ Nei uren notaku ibetam koro guru ene itak-hi: Otta e oshiroma ushike, Satan koro amset an ushike Ku eraman: orowa, eani anak ne Ku reihei shiyuppa no shikkashima, aige, Satan oshiroma ushiketa, echi tumugeta araige Ku goro ikipniukesh guru, en gusu an paweteshu ki Antipas toho ta poka en gusu an eishokor-i shomo e eshikashke ambe Ku eraman.

¹⁴ Koroka, e epeka pon no okaibe an, Israeru un utara anak ne potoki otta ayange ambe ibe hemhem ki, hoiyo hemhem iki kuni ne nei kotchaketa ureepetchiure kuni nep Barak ande gusu epakashnu Baraam iki epakashi koro utara e tura no an ruwe ne gusu ne na.

¹⁵ Shui, nei no korachi, Nikoraitan iki epakashi koro sereke an utara e tura no an ruwe ne.

¹⁶ Tambe gusu, yaikokatpak yan; shomo ne chiki tunashino e orun Ku ek wa Ku paro un rangetam ani nei utara epeka tumi-koro kusu ne na.

¹⁷ Kisara koro gurʼanak ne karisia utara orun Ramat ye itak ambe nu yan. Annokara iki guru otta, Shinuma otta anuina wa an manna Ku ibere kusu ne, orowa, retara shuma Ku kore, nei shuma kata akore guru moshima eraman guru isam no an ashiri reihei chieshinnuye wa an na.

¹⁸ Orowa, Tuateira kotan ta an karisia koro hauturumbe gusu ene nuye yan; Abe nui nepkoro an shiki koro, aturu-sakte shiuninkani nei no an kemaha koro Kamui Poho ene itak-hi:—

¹⁹ E iki ikip hemhem, omap ambe hemhem, eishokor-i hemhem, yaishieiwangere ambe hemhem, yaiyupupu ambe hemhem Ku eraman, orowa, iyoshi e iki ikip anak ne hoshiki no an ambe kasu no inne sekorʼambe Ku eraman.

²⁰ Koroka, e epeka gusu an ambe an, yaikota uweingara guru ne ari itak nei a shiwentep anak ne Yesaberu e aude ruwe ne gusu ne na; nei shiwentep anak ne Ku goro usshiune utara hoiyo hemhem ki, potoki otta ayange okaibe ibe hemhem ki kuni epakashnu wa kokandama ruwe ne.

²¹ Nei shiwentep yaikokatpak kuni gusu an pakihi Ku kore nisa; awa, koro hoiyo ambe gusu shinuma yaikokatpak ki kuni-hi kopan nisa ruwe ne.

²² Ingarʼan, Kuani nei shiwentep shotki kata Ku osura kusu ne, orowa, koro iki ikip gusu yaikotkapak shomoki yakun, nei guru tura omoinu koro utara utura poro aeramchuptek an ushike un Ku osurupa kusu ne na.

²³ Orowa, rai ambe ani nei shiwentep koro poho utara Ku ronnu kusu ne; aige, Kuani anak ne kinop newa sambe chimichimi guru Ku ne ruwe ne ari an ambe obitta no okai karisia utara eraman kusu ne: samata, echi ikip an nei no pishno okai echi utara orota Ku kore kusu ne na.

²⁴ Koroka, echi utara otta, Tuateira kotan ta moshima okai utara otta, tap epakashi shomo koro obitta no okai utara, utara ene ene itak-hi korachi an Satan ooho ambe erampeutek utara otta, ene Ku ye-hi :— Nep moshima an pase ambe echi kashita shomo Ku seire kusu ne.

²⁵ Yakka, echi koro wa an ambe Ku ek pakno shiyuppa no shikkashima yan.

²⁶ Orowa, annokara ki wa okake an pakno Ku ikip shikkashima guru otta, shinuma otta moshiri uirup ok kashita mondum Ku kore kusu ne: aige,

²⁷ Shinuma anak ne yaiyan-kani kuwa koro wa nei utara epungine kusu ne, sei-shintoko kara guru akarape humne apereke korachi nep; Kuani ne yakka Ku goro Michi orowa no a en kore korachi an ambe ne:

²⁸ orowa, kunne-nisat nochiu nei guru orota Ku kore kusu ne na.

²⁹ Kisara koro gurʼanak ne karisia utara orun Ramat ye itak ambe nu yan.