Ekambakbe 1 - Ashiri Aeuitaknup Iyohaichish Yona 1897

1 Ik.

¹ Naa iruka ne koro hetuku kusu ne, koro usshiune utara orun nukare kuni gusu, Shinuma orota Kamui koropare Yesu Kiristo koro ekambakbe: orowa, shinuma anak ne koro hauturumbe teshkara hine koro usshiune guru Yoannes eramande;

² nei guru anak ne Kamui itak gusu hemhem, Yesu Kiristo koro paweteshu ambe gusu hemhem, nep ne yakka shinuma nukarabe gusu hemhem paweteshu ki nisa ruwe ne.

³ Tan uweingarape oro-oitak hene ki, nu hene ki, orowa, nei kashiketa chieshinnuye wa an okaibe shikkashima gurʼanak ne anunuke ne: pakihi ehange no an ruwe ne gusu ne na.

⁴ Yoannes anak Asia ta okai arawan karisia utara orota kambi omande na: an wa an, an nisa, orowa, ek kusu ne Kamui orowa no hemhem; shui, Shinuma koro amset kotchaketa okai arawan Ramat orowa no hemhem;

⁵ orosama, ikipniukesh paweteshu ki, rai guru orowa no hoshiki no ahetukure, moshiri shikkashima utara epungine Yesu Kiristo orowa no hemhem, echi utara gusu irenga newa itomo an na. Un omap hemhem ki, koro kem ani chikoro katpak gusu un furayepa hemhem ki:

⁶ orowa, nei moshirʼun utara ne kuni un kara, koro Michi newa Kamui otta un yaishieiwangererep otta anak; Shinuma otta shashuishiri wano shashuishiri pakno arakuru newa mondum an na. Amen.

⁷ Ingarʼan, Shinuma nishkuru ani ek shiri ki obitta no okai shikihi pishno Shinuma nukara, Shinuma otke utara Shinuma nukara kusu ne; orowa, obitta no okai moshiri uirup Shinuma gusu rayaise kusu ne na. Ruwe un, Amen.

⁸ Kuani anak ne, An wa an, an nisa, ek kusu ne, nep ne yakka ki eashkai, Arupa newa Omega Ku ne ruwe ne, sekoro, Utarapa ne Kamui ye ruwe ne.

⁹ Yesu oshiketa an aeramchuptekbe hemhem moshiri hemhem yaiyupupu ambe hemhem e tura no iki e koro iriwak ne Yoannes kuani anak ne, Kamui itak newa Yesu gusu an paweteshu ambe newa gusu Patmos ari aporose repun shiri ku an nisa ruwe ne.

¹⁰ Utarapa toho ta kuani anak ne Ramat oshiketa an, awa, en oshmaketa rappa humi korachi poro hawe ku nu,

¹¹ aige, ene itak-hi :— E nukarape kambi-sosh kata nuye hine nei arawan karisia orun omande yan; Epesos otta, Sumurna otta, Pergamos otta, Tuateira otta, Sardeis otta, Piradarpeia otta, Raodikeia otta omande yan.

¹² Orowa, en orun itak hawe ku nukara gusu ku hosari nisa ruwe ne. Aige, hosari an chiki arawan kongani ratchako ku nukara;

¹³ orowa, nei ratchako tumugeta ainu poho nepkoro an guru ku nukara, Shinuma amip iyo keshupkachuire an, orowa, kongani kut ani yarupokkepeka ekutkon ruwe ne.

¹⁴ Orowa, Shinuma koro sapa newa otop retarape anak ne retara wata korachi, upas korachi ne; koro shikihi anak abe nui nepkoro ne;

¹⁵ kemaha anak ne abe-sokot oshiketa aturu-sakte nei no an hereatte shiunin kani korachi nep, orowa, koro hawe anak inne wakka korachi an hawe ne ruwe ne.

¹⁶ Koro shimon tek oshiketa arawan nochiu akoro: koro paro wano een uren no notaku ibetam hetuku ruwe ne: koro nan-katu anak ne kiroroashnu no hereat tokap chup korachi ne ruwe ne na.

¹⁷ Awa, Shinuma ku nukara chiki rai guru nepkoro an no koro chikiri samta ku hachiri nisa ruwe ne. Aige, Shinuma anak ne en kashiketa koro teke ande wa ene itak-hi :— Iteki ishitoma yan; Kuani anak ne atpake an ap ne, iyoshi no an ap ne,

¹⁸ Ishu ambe Ku ne ruwe ne; Ku rai nisa, awa, ingarʼan, ramma otusashuishiri pakno Ku ishu ruwe ne, orowa, rai ambe newa Hedes gusu an kangi Ku kon ruwe ne.

¹⁹ Tambe gusu, e nukara okere okaibe hemhem, an okaibe hemhem, okaketa hetuku kusu ne okaibe hemhem nuye yan;

²⁰ Ku shimon-tekehe kata e nukara arawan nochiu newa nei arawan kongani ratchako newa gusu an mukke ambe tapne ne. Nei arawan nochiu anak ne nei arawan karisia koro hauturumbe ne: nei arawan ratchako anak ne arawan karisia ne ruwe ne na.