TITAS 3 - Rabu Athar New Testament (BSI)

Khristian Omchan

¹ Na mingai ning an neipu ngaile, chongtan ranak neipungai, duk lut thei na rang chong ri jui thei na asat chuan rakip an tho torna rang man jetro.

² Tu khat jak chunga esella an ri mak na rang, ni jai tat ha man nimak na rang, mirakip chunga lunghip lung nem achang na rang ripero.

³ Ajarko keini om, atuan lai mingai ham, ri jui lui, leisei, a dang a dang omchan salui le kum hei ranga suak, kan enda, khat le khat kan ma tir mi ha kan lui ni.

⁴ Tak-ha, keini na san ringpu Pathian lungsiat jarra mi lungsiat thei na kan hong jet,

⁵ keinin adik chuan kan tho jarra nimak, tak-ha Puma mi lungsiat thei jarra; keini ha vei khat a tharra nai changle ana rasuk thianga, Thavang thiang in ina man thar jarra ana san ring jui ani.

⁶ Puma manrit na han a na mandik, amongtibui ring na ha mu thei na ranga ana man chang jui.

⁷ Hiva jarra keini ana san ring puma Jisu Khrista Thavang Thiang ha kan chunga ana pek jui.

⁸ Hiva chong hi takngai rang a suak, hiva chong lam rakip jarra Pathian takngai mi rakip in asat chuan ha an thoa an lung a lut na rang nang in asat ana ripe rang hi ka dei, hiva chongngai hi asat le nem na rang khat ani.

⁹ Tak-ha mi am chong ri, chong thon jel, kungle rel dei, kan sual kan se, dan chong ruia kan sual kan se, ha vangai kar tenna kan khelro, ajarko hiva rakip hi nemna bui ani.

¹⁰ Ni jai tat mingai ha ko weini tak riperu, hale anmani ranga ite khat tho pe lai maru.

¹¹ Nang nin nan jet hianga mingai ko an lung thiang mak, an siatna han adik lui mi ti ha man kan jetru.

A torna Chong

¹² Kein Artema animakle Taichikas nang jiang kava tirle, Nikopolis tenna nang in kei jiang hong na ranga ator khan na hongna thoro, ajarko kein hava mun han Phabi pha han ka om jot.

¹³ Danthei oja zenasle Apolo ning ite khat vat luia thanuam tak kei jiang na vatier pero.

¹⁴ Hale keini mingai ning chung suak na an nei na rang tho rang suak pha han asat chuan an thoa om thei na rang anmani ning om kan chu rase u.

¹⁵ Kei le om suam mirakip in nang ha chubei an na pek, hiva takngai kan chun mirakip innom keini na lungsiat ngaiha chubei kan pek manrit na ha nan chunga om rase.