TITAS 1 - Rabu Athar New Testament (BSI)

¹ Pathian ning athang suak mingai takngai nale, Pathian jiang adik an do ha, a khel la jet thei na ranga, Pathian suak Jisu Khrista thiamruoi Paul kein, amongtibui ringna ha ka ngaidon.

² A torti bui ngaidon ha ko, leisei kan chel lui, Pathian ning a tuan lai na pek kati tia chong sam na alui nei.

³ A pha a kancha lai tak han ama chongripu ngai jiang a hong manjet jui, an ri chong ha ko ana San ringpa kan Pathian chong be nuk juia kei jiang ana pe jui.

⁴ Kan takngai ikan ang le kanruoia ka pasalnai Taitas jiang pa Pathian le keini ana san ringpu kan puma Jisu Khrista manrit nale lunghip na om rase.

Keret Taitas Chuan Tho

⁵ Hiva jarra chuan lam a vat rakip ha ado, dona sinthei na ranga an khat om, khopui rakip biakinn ulian lamkai ngaiha pham bena ranga kei ning nang ha kerep a ka na tet ani, han ka na manchu ang han thoro.

⁶ Biakrup lam kairang miha, man kan lian luia, lomnu khat jak nei pasal, hele bai nei lui, a naingai om Pathian chit a an om rang asuak.

⁷ Ajarko, lamkai ha ning Pathian chuan tho mi ani jarra, a bing rang jak ngaidon lui, alungnem, ju ruilui, kansual kan se na nei lui, peisa tianga pham rai siat lui,

⁸ midon thei, mi pham thei, adik chuan tho dei, lung kan chur tor, mi dik, a thiang le a tak kan chur tor mi a chang rang a suak.

⁹ Hale adik man chu tianga lung lut, chong kan kher dei ngai ha, man chu tor, hiva man chu ngaihi, takngai jot mi khat chang na ta a det a ijui rang ani jui.

¹⁰ Ajarko mi atam lam ning nun chan jet lui, chong cha jai jek le mi leisei an omngai ha, vuntanngai rupsung tenna anni.

¹¹ Anmani ha an bairuk rang hi a suak jui, hiva mingai hi ning peisa khel la an dei jarra, manchu lui rang suak chong ha an man chu a insung atam lam an ve khui jui.

¹² Anmani kar tenna mi khat ning hingahin a ti, a kerep mingai ko pha rakip leisei jak an tho, a satlui ramsa angke, chuan sin rang tha siat, chak lung var mang ke.

¹³ Hiva chong ngir hi adik ke, anmanin Jiwngai chong rochi lam ha an lui a adik tenna an phut mingai chong pek lungdo tiang lam an lung a lut.

¹⁴ Takngai adik ni thei na rang anmani ha asat a ripero.

¹⁵ Mi thiang ngai ranga phur rakip hi a thiang ver, tak-ha mi thiang luingai ranga ko, takngai rang athiang ite khat om ma; hiva jarra an ngaidon nale adik dik mak jet thei na rang an lung a chok.

¹⁶ Anmanin Pathian kan jet tia an ri suak, tak-ha, an chuan tho inko ama ha jot ma u; anmani ngai hiko, matir rang suak, chong jui lui, chuan sat tianga ite nem na bui anni.