TIRLON 8 - Rabu Athar New Testament (BSI)

Saul Ning biakinn Khodeng Amanthei

¹ Hale ama anthat hi Saul om anmani le alui kan chel, hiva nikhua sung hin Jerusalem ma a om biakrupngai jiang atam pong khodengthei nai an mujui, hava han tirlonngai ni luia anmani an renga tiko Judia le Samarija ram sunga anthei an changa an kan senjui.

² Adet Pathian oi pasalngai ning Stephan ha an phumma, ama ranga atam tak chajang an lui siar.

³ Tak-ha Saul ning inn inna a lut pasal an khat om numeingai a hong kei sua hale ren inna atet han biakrup ha aluinok khai.

Samarija hin chongsat

⁴ An thei an changa an kan khuisenngai ha ning an che an chena mun han asat chong ha an lui ri.

⁵ Philip ning Samarija khopui tiang achum ma anmani jiang Khrista ruia chong alui ri.

⁶ Philip chong ri ha mitamngai ning an jet pha hale a man itho rakip ha an mu karra, a chong ri han an lung khat jak an lui manchang.

⁷ Ajarko thavang satlui ning itho mitamngai sung han thavang thiang lui ha ning a hong khek, an suak, hale a taksa her khat athi, le akekiak ngaiha anmandam.

⁸ Hava khopui han mi atam tak an ning anluisat.

⁹ Tak-ha khopui han a tuan lai mit tarang tho a ming Simon anti, pasal an khat alui om, hale atakin keihi milian khat ka ni tia Samarija mingai ha alui manngak.

¹⁰ Mitamngain ama jiang lungdo an nei verra an hong ti, “Hiva mihi milianpa Pathian ranaknei hake.”

¹¹ A man mit tarang atho a anmani ha a pha sot iluiman ngak jarra, anmanin ama jiang an lung aluingam.

¹² Tak-ha Philip ning Pathian rengram ruia Jisu Khrista minga asat chong ha alui ri pe ha takngai na an neija pasal le numeingain om baptais an lui tho.

¹³ Hava han Simon innom takngai na aneia baptais a tho jui, hale Philip le alui kan ruai chak, mi ning tho torlui angakpa chuanlian ankhat om jet na angakpa tamtak tho torna inei ha a mu karra a man alui ngak.

¹⁴ Samariangain Pathian chong hi an luijui tia Jisu tirlonngain an jet pha han, anmanin Pitar le Johon ha anmani jiang an tir jui.

¹⁵ Anmanin an hong chumma, anmanin Thavang Thiang an mu na ranga an lampe jui.

¹⁶ Ajarko anmani karra tu khat jiang om Thavang Thiang hi lamu ma u, la hong chummak tak-ha Puma Jisu minga baptais thona jak an man nei ke.

¹⁷ Hava pha han anmanin anmani chunga an kut an tet, han ke Thavang Thiang ha an luimu,

¹⁸ Simon ning tirlonngain an chunga an kut a tet pe le Thavang Thiang an mu tihi a jet karra, a man anmani jiang ruphai a pek,

¹⁹ a hongti, “kein tu ang khat mi jiang ka kut hi ka tet le a man Thavang Thiang amuna ranga, hiva ranak hi kei om na pero.”

²⁰ Tak-ha Pitar ning a hongti, na ruphai le mang suamru, ajarko Pathian kutchoi hi ruphaija chok a jot tia na ngaidonjui.

²¹ Hiva chuan ruia nang rang animakle natum rang ite khat kanchelma, ajarko Pathian mai kunga na lung dik mak.

²² Hiva jarra na satmakna ngaidon in lang, lung thulna neiro, a jot theinko na lung satmakna ningaidon ha ngaidam om na rang lam na neiro.

²³ Ajarko nang ko na lung satlui le nun chan dik lui karra na om tihi kein ka mu.

²⁴ Simon ning a hong sang, “Nang nin nanti ha khat jak om ka chunga a hong chul mak na rang, kei ranga nang nin Puma jiang na lam peru.”

²⁵ Anmanin Puma chong ha asat shakhi an pek, Samariangai khuava asat chong anrija Jerusalem ma an hong kir.

Philip Le Ithopijan Pasal Khat

²⁶ Tak-ha Puma thaneithiang ning Philip jiang a hong ti, “Thuiro, hale Jerusalem tenna Gaya tung na rang lam han thuai tiang chero, hivahi ramtonglian lon na khat ani.

²⁷ A man a thuaija a che jui, han enru, Ithiopija ngai Rengnu Kandaki aneinun sampar rakip ikanpana chuan tho ha ning Jerusalem ma chubeibuk na ranga a hong.

²⁸ Han a man a hong kir han a sakor kari sunga a onga Pathian tashanthei Isaia rabu ha a pa alui om.

²⁹ Thavang ning Philip jiang a ti, che in lang Sakor kari sole kan ruai puiro.

³⁰ Han Philip ning ama jiang a tanna, a man Pathian tashanthei rabu Isaia ha a pa a jet a hong ti, nang in na ipa na jet mo?

³¹ A man a ti, “Tu ang khat in na ripeluija, kein ija mo ki jet tor rang?” Han a man Philip ha akuija hong chuongro kei le ongsuamrei a ti pe.

³² Hale a man iluipa chong thiang rabu mun ha hi ani, “Belramte ha that ranga an tuang ang han, animakle belram ning amul an eppema a ram lui anga; amannom a bai angmak.

³³ A ma miduk lut theihan chong dik tanna ha ator jui, ama mirual ha tu ning mo anritor rang? Ajarko ama thavang ha hiva simlei tenna ipek jui ke.”

³⁴ Tak kan sin pasal ha ning Philip jiang a hong ti, kein nang jiang ka na ti, Pathian tashanthei ning hivahi tu jiang mo iti? “Atak rang mo, animakle a dang khat ranga mo?”

³⁵ Hivahi Philipin arija hiva rabu tenna an phut ama jiang Jisu ruia chongsat ha arilai.

³⁶ Anmanin lam ma an honglon pha han, tui kolla an hong tung jui, a tak kan sin pasal ha ning a hong ti, tuihin a om jui, baptais nina man nei rang hi aser imo a om? Jot noning mo?

³⁷ Han Philip ning a ti, “Natak na lung Pumpuia takngai na nanei inko, han a man a hong ti, Pathian nai Jisu Khrista ha kein takngai na ka nei.”

³⁸ Han a man Sakor gari ha khap na ranga chong a pek, Philip le a tak kan sin pasal ha tuija an chumma, baptais a man tho jui.

³⁹ Han tuitenna an hong suakpha, Puma thavang in Philip ha a tuang jui, hale a tak kan sin pasal ha ning Philip ha mulaimak ningsat tak a ache jui.

⁴⁰ Han Philip ha Ayotus an mu han, Sijaria kaithiang khosung rakip chongsat chong thiang ha alui ri.