TIRLON 4 - Rabu Athar New Testament (BSI)

Pitar Le Johon Ulianrup Ma don na

¹ Pitar le Johon ning chong an luiri han biakinn angak ngai le thiampungai le sadusingai an lui honga, an lung a tam luihuimak.

² Ajarko, mitamngai ha an man chua, Jisu ha athi tenna a ringkhir tia risuak na om an nei.

³ Han anmanin Pitar le Johon ha an churra ren inna khuo a var maje an tet, ajarko, nitaktiang pha aluini.

⁴ Tak-ha anmani chong riha a ngai rakip karra a tam lam in takngai na an nei, hava karra pasal lim ha lishing ranga duk anni.

⁵ Khuo ahongvar le anmani lamkei ulianngai, ulianrupngai le dan ojangai ning Jerusalem ma an kan chun jui.

⁶ Hava han thiampulian Anna, Kaiapha, Johon le Aleksandar an khat om thiampulianngai parual om an lui kan chel.

⁷ Han anmanin anmani ha anlai tak an man onga an hong dingkel, “Iranak amo, animakle iminga mo nang nin hivahi nan tho?”

⁸ Hiva phat hin Pitar achunga athiang Thavang ning a sip anmani jiang a hong ti, “O hiva mingai lamkei ulian le ulianrupngai,

⁹ ve enni hin, keini ning ke kiak mi khat jiang asat chuan kan tho jarra ijamo hiva mihi nan mandam tia nan na dingkel aninko,

¹⁰ nang ni nan renga le Israel mirakip jiang hivahi na jet peru; nang nin khros chunga nan that Pathian ning athingai kar tenna iman ringkhir, Nazaret Jisu Khrista minga hiva mihi adamma nang ni madonna a ngir.

¹¹ Nang ni innsinngain nan deilui tak-ha nuk ako inn na do rang tak luang a hong chang ha ama ani.

¹² Tu khat jiang om kan san ringna siat ngaidam nahi om mak; ajarko hava tenna an phut keini na san na rang hi a na pek ama ming niluia chungvan thuaija om ma.”

¹³ Pitar le Johon ning an tho ha an mu va, hale rabu om thei lui michamke tiha an jet pha, an lui ngak ban, han anmani hi Jisu le an lui kan ruai ke tihi an lui jet jui.

¹⁴ Han ke kiak pa ning adamma anmani le an om chun ha an mu kar han anmanin hava ruia ite khat dana ranga chong ritor lai mau.

¹⁵ Tak-ha anmanin anmani ha an kan chun na mun tenna suak taru tia chong an pek suale anmani masia khat le khat chong an kan siamma,

¹⁶ an hong ti; “Hiva mingai jiang keinin imo kan tho rang? Ajarko anmanin jetna alian lian na an jet, hiva jarra keinin dator masing.

¹⁷ Aninnom hiva chong hi mingai karra an ria an man thang mak na rang keinin anmani hi man chit tarei.”

¹⁸ Han anmani ha anmanin ankuia Jisu minga rimak na rang le manchu mak na rang chong an pek jui.

¹⁹ Tak-ha Pitar le Johon ning anmani jiang an hong sang, Pathian chong ri kan jui hi Pathian mitenna adik mo dikmak mo? Nang nin chong najen peru.

²⁰ Ajarko kein in kan hong mu an khat om kan hong jet ha rimakna tor masing.

²¹ Han mitamngai ha anenna anmanin anmani ha ijamo khodengthei na kan pek rang tihi lui jet laima, anmanin anmani ha a khel la an man chit a anma sua jui.

²² Ajarko kum sommanli khella atar ulian khat ha mandamna an lui nei ani.

Pitar Le Johon An sap ngai jiang An hong Kir

²³ Han anmani an hong masua pha han, an sap ngai jiang an honga thiampulianngai le ulianrupngai ning anmani jiang antipe rakip ha an ri jui.

²⁴ An sapngain chong ha an jet pha, an lung khat jak an man changa, Pathian jiang anrasa ring tak an hong ti, “E, Puman irakip a neipu, vanram, ramuol, tuionglian le hava sunga om rakip nang in nisinke.

²⁵ Thavang ranak keini kan pa, nanai nasuak David baisua na lui manri “Jatdangngai ha itamo an lung ithak, hale miringngai ning nemna buia an ngaidon itamo?

²⁶ Puma le Khrista ha ramuol la rengngai ning an enda, hale lamkei ulianngai ning om an kan chun jui.”

²⁷ Ajarko na suak thiang Khrista ha ama enda na ranga jatdangngai Israel mirakip le Herod Pontia Pilat ning om,

²⁸ Puma nakut le ningaidon han nuk asuak rang rakip ha a rapa niluivar rakipngai ha tho na ranga chong tak balla khopui hin an renga an kan chun jui.

²⁹ E, Puma, anmanin keini ha an na manchit hi a tun na hong enro; thauna asat na chong na la ngai hi ritor na ranga na suak keini hi na sanro.

³⁰ Hale a nat mandam na rang le a ngak angakpa chuan hi na suak Jisu minga ranak na pero.”

³¹ Anmanin lam na an nei pha an om na mun ha a hong kan nikjui, hale anmani rakip ha a thiang Thavang ning a sip thauna sat Pathian chong an hong ri jui.

Neinak Sampar Khatjak An manchang

³² Atakngai mirakip ning an lung le an thavang khat jak changa an lui om, hale tun nom an nei phur rakipngai ha kabing kaphurke luiti ma u, tak-ha mitam taranga an lui nei man.

³³ Han Puma Jisun a ringkhir na ruia ranak lian tak le kan ruaia thiamnaingai ning shakhi an lui pek, hale an chunga thauna an lui mu.

³⁴ Ajarko anmani karra tu khat om a riang avaija lui om ma u, ajarko ram le inn a nei rakipin an juorra, an ram juor man ha an hong choia,

³⁵ Tirlonngai ke kunga an hongtet; hale anmani karra a riang avaingai jiang an sempejui.

³⁶ Han Saipras Levi phunga a ming Josep anti thiamruaingain ko Barnabas tia an phuo hiva tina ko lung mathok pasalnai tina ani.

³⁷ A man a luia juora hava ruphai ha a hong choia Tirlonngai ke kunga alui siak.