TIRLON 28 - Rabu Athar New Testament (BSI)

Malta va

¹ Keinin kan ring suale hava tui karra ram viar te ha malta anti tia kan hong jet.

² Hava ram ma a om mingai ha ning keini ha lungsiat an na don na ha, khi de na om mak, ajarko ruo ihongtho le ihongdai jarra anmanin mei an thoa keini kan renga an na lui pham.

³ Paul ning thing lokhat a hong tok a meija a hong tua pha han, meilum kar han rul a hong suak Paul a kut ha a khertitjui.

⁴ Hava kho mingain Paul a kut i om ha an mu pha han khat le khat in an hong kan ti; “Ajarko, tuionglian mun tenna han nom san ring na mu lai lui rang siat nei mi khat ke.”

⁵ Aninnom ama ning rulha a thing thak a ama ha i om tok lai mak.

⁶ Aninnom anmanin a maha jet lui thailuija hong thing na ta ithirangke tia an lui ngaidon. Tak-ha anmanin phat sot tak an lui ngak an in nom ama ha i om lui ti mak, hiva jarra anmanin an lung anthulla a maha Pathian ang khat an lui mu.

⁷ An khat om hava ram ma om ram neipu ning keini ha lungsiat le manrit tak nithum khan a na lui man om.

⁸ Hava pha han hingahin a suak jui, Publius a pa, a tunna thisen a ehk a alui nat, han Paul in a hong en na ama chunga a kut atet lam na alui nei pe a, aluidamjui.

⁹ Hiva chuan suak hi ang jet pha hava tuipanga a om mingain anatngai ha an hong tuanga Paul ning alui mandam.

¹⁰ Anmanin keini ha chitlejak tak an na lui don na hale kein in rokuang ha kan chuanga; keini nem na rang rakip om an na lui thunpe.

Malta Tenna Rom Itungna

¹¹ Thathum suale phabi pha tui karra ram viarte han an lui khap ilui om Aleksandar ngai rokuang, khaipoak luramil anjiak ha kein in kan chuangjui.

¹² Hale Sairaka khopui han kan tunga hava mun han kein in nithum kan lui om.

¹³ Hava tenna kan che ret Regium ma kan tung hale nikhat kan om suale thang tianga phaivuo a hong ranga veikhat kan che ret nini chang na han Puteoli khopui han kan va tung.

¹⁴ Hava mun han keini ulenaingai ha kan kan mua, anmanin keini ha nisari om suam rei tia an na lui ri, hingahin kein in Rom ma kan va tung.

¹⁵ Hava mun na a om ulenaingain keini kan chong thang ha an jet, Appija kaithialle, tungmun an thum anti mun tenna keini le kan mu na rang an lui hong, anmani ha Paul ning a mu pha han Pathian amanpak ningsat na atam tak alui nei.

Rom Khopui Sunga

¹⁶ Keinin Rom kan hong lut pha han, Paul ha ama a rungrang ralmi le atheia om rang hi an jot pe jui.

¹⁷ Nithum suale Paul ning Jiwngai lam kai ulianngai ha akuija kan chun na alui man nei, hava kan chun na pha han a man an ma ni jiang a hong ti; “Ulenaingai, kei ning kan mingai le kan pa kan pungai lui che na kan nun ha ite khat ki jot mak na om luia, Jerusalem tenna kei ha ren annatuk a Rom mingai kut chunga an na pek.

¹⁸ Rom mingai ning kei ha an na dingkella, kei ning thina rangkhan kima sialna ki tho ha mu maua anmanin kei ha an na lui masua jot.

¹⁹ Aninnom, Jiwngai ning anda jarra, kei ning ka jatmingai jiang tho salui chuan ka tho mak innom, veikhat Keisar jiang chongtan na rang kein kingir ret rang ani.

²⁰ Hiva jarra kein nang ni ha kan mu na rang le kan biak na ranga kinakui ani, ajarko Israelngai ning lungdo an neija an ngak hava rui jarra keihi thir ruija an nakhit ani.”

²¹ Han anmanin ama jiang an hong ti, Judia tenna nangruija chong shan che mu maksing, hale ulenaingain an honga nang naruia asa mak chong an hong ri animakle an na manjet om mak.

²² Aninnom nang na lungdo ha imo a om tia kan jet jot, ajarko hiva rup ruia mitam lam ning jot maua an jek tihi kan jet.

²³ Anmanin nikhuo dang khat Paul le an renga kanchun thei na rang nikhuo an ngirjui, hava nikhuo han mitam tak an hong kan chun na; Paul ning a hong ti, “Pathian rengram ruile, Jisu Khrista ruia chongsina alui nei han a man Mousi dan chong pek le tashantheingai an lui chong ngaiha a nei man na anmani ha manjetna rang jin tiang tenna nitak khan chong alui ri.”

²⁴ Han aviar ko takngai na an nei hale aviar ning takngai na nei lai ma u.

²⁵ Hiva ruia anmanin an kan jot mak jarra kan senna an nei jui, han an kan sen mak ma han Paul ning anmani jiang chongkhat alui ri, “Thavang Thiang in alui rilla adik ke tiko nang ni nan pa nan pungai jiang Pathian tashanthei Isaia jiang asat iluimanrila;

²⁶ hiva mingai jiang che in lang hongtiro, nang nin arashako nan jet rang ke, tak-ha jet tor noni che u, hale nan enko nan en rang ke tak-ha muko muno ni che u.

²⁷ Ajarko hiva mingai hi an ngaidon apangjui, hiva jarra an kuar anruk, an mit om an singjui, aluinimak inko, an mit in lui mu nanti, an kuar ning rasha lui jet nanti, hale an ngaidon ning om lui ngaidon tor nanti.”

²⁸ Hiva jarra Paul ning a ti, “Pathian san ring na ha a dangjatngai ranga a hong tir tihi nang nin jetkhetru, han anmani ning omngai nanti u.

²⁹ A man hiva chong hi a ri pha han, anmani masia chong kan kherna an neija an kan senjui.”

³⁰ A man inn ivaihan kum ni a om ma, hale ama jiang an hong mirakip ha ahui a an kan senjui.

³¹ A man thauna sat Pathian rengram ruija le Puma Jisu ruia alui man chua alui om.