TIRLON 23 - Rabu Athar New Testament (BSI)

¹ Paul in Ulianrupngai jiang a enna a hong ti, “u le naingai kei ning ve enni tung khan na Pathian madonna lung thianga ki hong om ani.”

² Hava han thiampulian Anania ning asirra a ngirngai jiang ahong ti, “Aner tum ha benru hava miha,”

³ Paul in ama jiang a ti, “Anguija antei bang, nang ha Pathian ning ina ve rang ke, ajarko nang ko dan chong pek nuk juia kei ha chongtan na ranga na hong bak a dan chong pek lam ha a lu alet tianga na nei man na kei ha veru tia cham mo na pek?”

⁴ Han ama asirra a ngirngai han an hong ti, “Pathian thiampulian ha nang in na ran mo?”

⁵ Paul ning a hong sanga a ti, “U le naingai a mahi thiampulian ke tihi lui jet making, ajarko hingahin a kan jiak a a om, nangin nang na mingai vaihompu jiang chong satlui ri thei noniche.”

⁶ Paul ning hingan a hong en na aviarin Sadusi, a lek in Pharisi an lui ni tihi a jet ulianrupngai jiang a hong khek a ti, “U le naingai kei ko Pharisi ke Pharisingai an pasalnai ka ni, a thi ngai ning an ringkhir, hava ha ka ngak chak ka om jarra kei hi chongtan na an na nei ke.”

⁷ A man hiva chong hi iri jarra, Pharisingai le Sadusingai ha an hong kan sualla mitamngai ha rupni an suak jui.

⁸ Ajarko Sadusingai ning anti, ringkhir om om mak, Thavang Thiang om om ma u, hale thaneithiang om ma u, tak-ha Pharisingai ningko hiva an thum hi a om anti.

⁹ Hava mun han a tam tak an kannokna rasa asuak jui, hale Pharisingai karra oja alekin an thuia chong an hong ria anti, kein in hiva mi tak chunga a samak na ite khat mu maksing; tumo jet, ama jiang thaneithiang animakle Thavang Thiang an khat in iluipek om luini a jot?

¹⁰ Anchong kankher ha a hong ngar reija anmanin Paul ha eknoi rang anni tia ralmi ulian ha ning ral mingai jiang chong a pek a ti, “Nang nin anmani karra lut in lang Paul ha hong sutru, hale Palikor sunga ama ha kailutru.”

¹¹ Hava jannihan puman a sirra a ngirra ama jiang a ti; “Nathouna mansatro, chit maro ajarko Jerusalem ma kei ka shakhi nipek ang han Rom han nom nang in ka shakhi nipek rang a nijui.”

Paul Atakchunga An rangna

¹² Khua a hongvar le Jiwngai a lek in an kanchun na Paul ha kan that maje bu nek nonising, tui tenna in nonising tia anmanin khomak an kan samjui.

¹³ Hiva khomak kan sam alui nei miha an renga miring sommanli an lui khel.

¹⁴ Han anmanin thiampulian le ulianrupngai jiang an chea an hong ti, keinin Paul ha kan that maje ite khat nek chak tho ma rei tia khomak kan sam na kan nei jui.

¹⁵ Hiva jarra a tun ama ruia asatnianga jet na ranga tho unlang nangnin a maha hong keisua na ranga ulianrupngai le kan ruaia ralmi ulian jiang hongriru; hale a man a hong tung mak ma keinin ama ha that na ranga lui kan ning kan ti.

¹⁶ Tak-ha Paul a charnu a pasalnai ha ning an kan siam chong ha a jet a man a honga Palikor sunga a lut Paul jiang alui ripe.

¹⁷ Han Paul ning ralmi reakhat neipu jiang akuija a ti, hiva pasalnai hi ralmi ulian jiang tuangdiro, ajarko a man ama jiang chong a ri jot a om.

¹⁸ Ral mi reakhat neipu ha ning a maha ralmi ulian jiang a tuanga a tipe, ren inn sunga om Paul in kei ha anakuija; hiva pasalnai hi nang jiang na tuangpero, hale a man nang jiang chong a ri jot a om a ti,

¹⁹ Hava ha ralmi ulian ha ning a kut a o mun adang khat tiang a tuanga ama jiang alui dingkel, nang in kei jiang imo nari jot a om?

²⁰ Han a man a hong ti; “Jiwngain Paul ruia khel la asat jet na rang ang hin thojel nan ta ulianrupngai jianga nang na mun tenna ama ha tuang na rang chong lam na an na hong nei rang ke,

²¹ Hiva jarra nang in anmani chong ha ngaipemaro, ajarko anmani karra pasal sommanli khel ning a mahi kan that maje nek le chak, tui inmarei ti a khomak kan sam na an nei; hale ama ha an ruanga an om, chuan rakip an tor verra nang nachamjak ha an na ngak an om ke.”

²² Ral ulian ha ning a hong ti; kei jiang nari chong rakipngai hi ama jiang ka hong ri jui tia tu khat jiang om risuak maro; a tipe suale a maha amanchejui.

Paul ha Vaihomlian Felik Jiang Antir

²³ Ral ulian ha ning ralmi reakhat neipungai anni ha akuija a ti, “Ve enni jan pha dan anthum atungle Kaisaria tenna chena ranga ralmi rini, Sakor chuang ralmi somsari, hale thal, chei, chempho a lek ralmi rini havalim ha kan ningru.

²⁴ Hale Paul ha Sakor manchuang unlang vai hom Felik jiang ite khat kutsuikesui neiluia a huia man tung na ranga var peru.”

²⁵ Ral ulian ha ning hingahin chithi ina a luinei.

²⁶ Kaloudija lisia kei ning vaihom Felik jiang chit le jaktak chubei ka na buk.

²⁷ Hiva pasal hi Jiwngain an churra an lui that tiang han kei ning Romjat mi ke tia kan hong jet ral mingai le anmani jiang ka chea, a mahi ki va sanring ani.

²⁸ Hale anmani ning a mahi ijarra mo an jot luina ha ka jet jot kein a mahi ulianrup jiang tenna ka lui tuang.

²⁹ Han anmanin dan chong pek nuk juia ama jiang siatna an lui man nei, tak-ha that ranga le chur na rang khan na a siatna ite khat kein lui mu making.

³⁰ Hiva jarra hiva pasal tak chunga an jot lui an enda na i om rang ke tihi kening ka jet jarra, ama a tak in ijotluina rakip ha nang na madonna ama jiang anrijot chong rakip ha hong kan biakru katipea a mahi nang jiang a rak ki va tir ani.

³¹ Han ralmingai ning chong pek nuk juia Paul ha an keisua janlai han anti patiri tenna an hong tungpuijui.

³² Khuo a hong var le anmanin Sakor ral mingai jiang a maha chena ranga an mak Palikorra an hong kir jui.

³³ Anmanin Keisaria hin an hong tunga vaihompa jiang chongsan che ha an pek hale Paul om ama jiang an kan sinnajui.

³⁴ Han vaihompa ning chethi ha a pa va hale Paul jiang nang hova ram ma mi mo nani tia alui dingkel, han a man a mahi kilikia ram sunga mi ke tihi a jet.

³⁵ Ahongti; “Nang ana jot lui ngaiha an hong tung le kei ning nang na chong ha asat ka na ngairangke, han a man a maha vaihom Herod chang kual sunga asat manom unlang ngakru tia chong alui pek jui.”