TIRLON 20 - Rabu Athar New Testament (BSI)

Paul Ning Makidonia Le Akhaia a che

¹ Hava an kan nok ha an bang suale Paul in thiamruaingai ha akuia, ma thokna aneia, a mak a Makidonia ache jui.

² Hale a man ha vangai ramtiang han a honga mingai ha a tam tak ningsat na a pek akhaia a hong jui.

³ A man hava mun han tha thum a om suale, Sairia tiang rokuang chunga che rang a ti lai pha han, Jiwngai ning amaha chong kan kher nale kan suolna an neipuija a man Makidonia tiang lam kirtakati tia alui ngaidon.

⁴ Berea ram ma Paira anai Sopatar, Thesalonika ram ma Aristarkha le Sekunda, darbe tenna Galilia le Timothi hale Asia tenna Taikhika le Trophima, hiva limngai hi ning amale an lui kan ruai.

⁵ Anmanin an lui chea Tros va keini an na lui ngak.

⁶ Hale chol kan chel lui Ut nikhuo ha a tor le kein in Philipi tenna rokuang kan chuanga suwnranga suale Tros va kein in anmani kolla kan tung hava han keinin nikhuo sari kan om.

Paul in A torna Tros va a che

⁷ Chei u al khat sunga a rapatak nikhuo han kein in Bulom chak na ranga kan kan chun lai han Paul in jinga ache rang ani jarra anmani ha amanchua, a man a ri chong ha janchim dairiai khan pha alei lui.

⁸ Keinin kan kanchunna mun ha achung tak kaa han meisher a tam tak an lui sit.

⁹ Hava kanchun na munhan Eutika anti pasal an khat mihut thonga alui onga a tam tak a i alui mu, han Paul in a manchu ha asotraia ama alui jala thak thum chunga ava chulla athi jui.

¹⁰ Hava han Paul in a chumma a maha a sit a ti, “Nan ning man dong maru ajarko lathimak.”

¹¹ Hale a man chung tiang akalla tal ha a ek khuia, anmani le an chak khuo varkhanna an om ma hale an che jui.

¹² Han anmanin pasal ha a ring pumma an tuang jui, hale anmanin a tam tak an ning alui sat.

Paul ning Milita va a che

¹³ Han kein in rokuang ha mandet kan che Asos tenna kanchuang jui, hava han Paul man chuang rang kan lui tike; tak-ha atakin keiko kea che kati alui ti.

¹⁴ Han a man keini ha Asosa a na kan mu puia keinin a maha kan manchuanga Mitileni khan na kan hong jui.

¹⁵ Hava tenna kan honga keinin ni khat suale Khijo madon ha kan hong tung jui, hale nini suale kein in Samo anti ha kan hong kan na hava nikhuo suale Melita han kan hong tung jui.

¹⁶ Ajarko Paul in Ephesia hin lui om jot mak hiva jarra Ephesia kan loi na ranga rokuang ha khap maru ana ti, ajarko a man pentikos nikhuo han Jerusalem ma a om jot jar han a rak kan lui che.

Paul in Ephesia Ulianngai jiang a ri Chong mathan

¹⁷ Han Melita tenna Ephesia a tirra biakinn ulianngai ha ama jiang a hong mankui,

¹⁸ Hale anmanin ama jiang an hong tung pha han a man anmani jiang a ti; “Kei ning Asia hin a rapa ka hong lai nikhuo tenna a pha rakip nang nin ijamo kei le nan kanruaia nan om ha nang nin nan jet.”

¹⁹ Kei ning miduklut kithei, ka mittui ichar an khat om Jiwngain an na en sin jarra kei jiang pong khodengthei an na pek pumma chuan ka tho.

²⁰ Nan in sunga le mipui karra ka ri ti tirra ka na manchu nang ni nasan na rang ki khuisen iom om mak nang nin nan jet.

²¹ Jiwngai le Grikngai jiang an siatna tenna Pathian tiang an hong kan hei na ranga le kan Puma Jisu an takngai na rang a kan ang rip shakhi ki pek ani.

²² Han atun ko enru thavang ning a na tuonga kei Jerusalem ma kache, hava mun han kei jiang imo isuak rang jet making.

²³ Kein ka jet khat ko a om tiko; ren inn le, pong khodengtheinan kei ha a na ngak tihi Thavang Thiang in khopui rakip hin kei jiang shakhi ana pek.

²⁴ Aninnom kei ka chuan ko Pathian manrit na han asat chong ha shakhi pek ranga Puma Jisu tenna ka mua chuan tho ha torthei na ranga kei ka thavang lam hi kein nar making.

²⁵ Enru; a tun nang ni karra kein Pathian rengram ha kasemma ka om, tak-ha, nang ni rakip ning kei ka maisua hi vei khat mu lai noni che u tihi kein ka jet.

²⁶ Hiva jarra mirakip thisen ruia kei ka siatna om mak tiha kein ve en ni nang ni jiang shakhi ka chang.

²⁷ Ajarko Pathian ning i ngaidon rakip ha ki ri lui om mak.

²⁸ Puma thisen tak in a chok jui Pathian biakinn ha don na rang le vaina ranga, nang ni nan masia le nan renga rup rakip in nan lung manlutru; Thavang Thiang in hava rup rakip lam kairuai ranga nang niha a na manchang jui.

²⁹ Kein ka che suale hava rupngai ha khat jak om mak lui na rang esella melangin nang ni karra ilut rang ke tihi kein ka jet.

³⁰ Hale nang ni nan karra han nom a nuk jui na rang thiamruaingai ha kei suak na rang ale lam tianga chong ri pasalngai hong suak nanti u.

³¹ Hiva jarra kein kumthum khan na jan le, sun le mittui charra mirakip ki man chu ki ripe ha bang making tihi na ngaidon pe unlang nang ni om a dui na ratperu.

³² Hale atun kein nang ni ha Pathian tiang le ama manrit na chong ha kana pek ani, hiva chong hi ning nang niha ina sinhei an khat om aman thiang sa anmani rakip karra tum rang suak ha nang ni jiang a na pek tor.

³³ Kein tu ang khat jiang om Ruphai Sana animakle Puan le diar ra ot making.

³⁴ Ka kut anni hinhing kei ranga le kikan ruaipuingai nemna rang jak chuan ka tho ti ha nang nin nan jet.

³⁵ Irakip kein nang ni jiang ka balamma ki tho anga ka tho jui, “Tiko ha ang han nang nin nan tho va a torlui ngaiha nan san rang hale Puma Jisu chong ha nan ngaidon rang a suak jui.” Ajarko, a man hingahin alui ti; “Lui nek inko pek lammin a khel la ravansat ani.”

³⁶ Hivahi a ti suale a man a khup a bilinga anmani rakip le lamna an nei jui.

³⁷ Hava han anmani rakip ning an chap Paul a ring an kuava abiang an tum jui.

³⁸ A ma maisuo ha veikhat anmanin mu lai noni che u tia a ripe jarra, an renga atam tak an lui pong; han anmanin ama ha rokuang om na tenna an hong thakjui.