TIRLON 19 - Rabu Athar New Testament (BSI)

Paul Ning Ephesia achena

¹ Apolo ning Korinth na a om lai, Paul ning sak ram tiang a hong kan na Ephesia a hong jui, han a man thiamruai aviar hi akan mupuijui.

² Han a man anmani jiang a ti, “Nang nin takngai na nan nei pha han thavang thiang mo nan tumde?” Han anmanin ama jiang anti, tumde masing, hale Thavang Thiang a om tihi jet om jet chil masing.

³ A man anmani jiang a ti, “Ha aninko nang ni ijamo tuija baptais tho na nan nei?” Anmanin an hong ti Johon baptism nuk juia.

⁴ Hale Paul in a ti, “A ma nuk le a hong ama ha tiko Jisu ha takngairu tia Johon ning mingai jiang a ria lung thulna le tuija baptais tho na alui man nei.”

⁵ Hava chong ha anmanin an jet karra Puma Jisu minga tuilutna an nei jui.

⁶ Paul in anmani chunga a kut atetpe pha Thavang Thiang in an chunga a hong jui, han anmanin chongdang chongdang an ria Pathian chong ha an hong sem.

⁷ Han an renga Pasal somluini duk anni.

Paul Ning Ephesia hin Imanchu

⁸ Hale a man Sainagok a lut Pathian rengram ruia chong kan kherna an neia tha thum duk hi anmani ha asat a mathemna aneia man chuna alui nei.

⁹ Aninnom anmani karra alekin hiva imanchuna lam ruia jot ma u achong salui an ria, an lung a thak ringai lui an hong chang jarra a man anmani kar tenna thiamruai aviar a khui sen na anitin Tairena kan chun na inn han chong kan kherna an lui nei.

¹⁰ Hivahi kumni khan na hanga han chong kan kherna an nei jarra Asia hin Jiw le Grikngain, Puma chong ha an jet jui.

¹¹ Han Pathian nin khel la tho torna Paul kut chunga aluimantho.

¹² Han na ama tak chunga puan chet puan her tekhat ha anatngai jiang an choi kar han nom an ritongngai ha aluidam, hale samak thavangngai ham an lui suak.

¹³ Han Jiwngai karra micheikra maheithei alek in Paul in iti anga Jisu a ming ha anpalla, thavang salui ning ilut mingai chunga Puma Jisu minga notchai na rang chong ri anphutjui.

¹⁴ Hava han Jiwngai thiampulian a ming Skeva anti a pasalnai saringai ning hiva chuan ha an lui tho.

¹⁵ A satlui thavang ha ning anmani jiang a hong ti, “Kei ning Jisu ha ka jet, hale Paul om ka jet, tak-ha nang niko tumo nan ni?”

¹⁶ Han asa mak thavang ning ilut miha ning a hong kan chomma, anmani jiang an lut hava inn sung tenna puan bui diarbuija anpop an tan jui.

¹⁷ Asia ram sunga a om Jiw le Grik mirakip in hivahi an hong jet pha han, an renga chitna an neija Puma Jisu ming ha khel la an hong man lian.

¹⁸ Han takngai nei anmani karra atam lammin an honga an lui tho na asa mak rakip ha an lui risuak.

¹⁹ Hale anmani karra mitpialdoi kandai atam lam ning an rabu ha an hong manchunna mitam mai kunga mei anlui hal, hava an hal lim ha a man na kanti inko ruphai lishing som ranga hi ani.

²⁰ Hingahin Puma chong ha ranak nei tak lian na seina alui nei.

²¹ Hiva chuan rakip hi a suak suale Paul in Makidonia le akhai ava kanna, a lung sunga Jerusalem tenna iche jot jarra a hong ti, “kein sovason ka tung suale Rom om kiva mu rang asuak.”

²² Han asepatho Timothi le Erasta Makidonia hin a tirra, amalamko a pha bongkhat ranga Ephesia hin a om jui.

Ephesia Hesuak

²³ Hava phat lai han hiva lam ruia a lian tak he asuak jui.

²⁴ Ajarko Dimitri anti ruphaisin tu ang khat ning Dijana biakinn anga ruphaija a sin na, kut thei mingai jiang chuan tam tak alui pek.

²⁵ A man hava chuan isinpui suam mingai ha a kui khomma a ti, “O pasalngai hiva chuan jarra kein in nei nun sampar kan mu tihi nang nin najet,”

²⁶ hale Paul ning kut sin ha pathian ngaiha pathian nimak tia Ephesia jak ni luia Asia ram a tam lam ma mingai ha amathemma an nun chan a man kan thul jui tihi nang nin nan mu an khat om nan jet.

²⁷ Han keini kan chuan hi amingthang om ahong mangmen rang jak ni luia, Asia ram sunga le ramuol pumpui ning an don Pathian Diana chubeibuk na tenna nem na bui hongman ni nati; hale ama mahok lianpui na ha hong om noning tia ning dong rang a om.

²⁸ Han anmanin hava chong ha an jet karra an lung a thak an hong khek, Ephesiangai rangako diana hi a liantak ke.

²⁹ Hava han khua naingai ha an lung sunga keichi keiok ning a sip jui, hale Paul le khualla an hong suam Makidonia mi Gajale Aristarkha ha anmanin an churra ut tho na inn tiang han an khat jak an changa an hong tan jui.

³⁰ Hava pha han Paul ning om mitamngai karra alui hong lutjot, tak-ha thiamruoingain jot pe lai ma u.

³¹ Hale Asia tenna an hong suam a sap ulian changngai aviar ha ama jiang an hong tirra ut tho na inn han namel kando lai maro an hong ti.

³² Hava mun han mi aviarrin chongdang khat, hale alekin chongdang khat an lui khek, ajarko mitam an kan chun ha an lui kan nok; hale an kan chun ha iruija mo ani tihi luijet ma u.

³³ Han anmanin Aleksandar ha mitamngai tenna an keisuajui, ajarko Jiwngain ama ha ma don tiang an hong namtuor jarra ani; hale Aleksandar ning a kut avok ama kan san ring na rang mitamngai jiang chong ri na rang alui tho.

³⁴ Han ama ha Jiw ke tihi anmanin an jet pha, mitamngai ha ning pha dan anni khan na an hong khek anti, Ephesia mingai ranga ko Dianai a lian tak ke.

³⁵ Hava han khuo sunga rabutheingain mitam ha an manom chian na a hong ti, “O, Ephesia a pasalngai, hiva khuopui ranga ko Diana ning a lian tak ani, hale chungvan tenna ihongchul a thiang lungramil biakrup anga ke tihi a jet lui tumo an om?”

³⁶ Hiva jarra nang nin chong hi nandalui jarra na om chianperu, hale aphing chuan i om tho maru.

³⁷ Ajarko biakrup sunga an ruk lui, hale kan pathian an esellui pasalngai hi nang nin nan va tuang jui.

³⁸ Ajarko Dimitri le kan ruaia chuan sin suomngai chunga chong kan jot luia om minko chongtan na inn hi kan long, hale chongtan vaihom ulianngai om an om, anmanin khat le khat chong kan jot lui na ha ri rase u.

³⁹ Tak ha nang nin khel la chong ha nantok aninko mitamngai ning an mansatna nuk juia chongtan nanti.

⁴⁰ Ajarko, arui, ajar buichilla ve en ni chong suok ruia chong kan jot lui hi keini ranga atatna ani, hale hiva ruia kein in kan kan chun kekeng rang hi tor nonising.

⁴¹ A man hiva chong hi ari suole mitam kan chun ha a man kan senjui.