TIRLON 18 - Rabu Athar New Testament (BSI)

Paul in Korinth na Ichena

¹ Hiva suale a man Athen ha a mak Korinth na ache jui.

² Han a man Jiw mi Akuila anti ponta ram tenna ahong, ajarko, Kaloudi rengpan Jiw mirakip Rom tenna suak ver na rang chong ipek jarra a man a numei Prisila le Itali tenna ihongha lasot remma, han Paul ning anmani jiang a hong jui.

³ Anmani le an chuan mun a kan jarra a man anmani le a om suam ma chuan an lui tho suam, ajarko anmani chuan ha khuoiliang puansin mi anlui ni.

⁴ Han a man sernikhuo racham Sainagok sunga a lut Jiw le Grikngai ha chong kan kherna alui nei pui.

⁵ Sailas le Timothi ning Makidonia an hong tung pha han Paul ning Jisu ko Khrista ke tia Jiwngai jiang shakhi a pek a chong alui ri.

⁶ Han anmanin a maha jot ma u a anran pha han, a man a puan ha athinga ati, “Nanthisen ha nan luchunga om rase,” kei ko ka thiang atun tenna an phut kei ko a dangjat mingai jiang che rang ka ni.

⁷ Hava mun tenna aman asuak, aming Titias Jasta anti Pathian oi mi khat inna a lut jui, ama a inn ha Sainagok sirra alui om.

⁸ Han Sainagok sunga vaihom ulian Kripa anti ama le a inn sunga mirakip ning Puma tak an ngai jui, hale Korinth mitam ning om chong ha anngaija takngai na an nei le kan ruaia tuilutna om an nei.

⁹ Han jan na Puma ning Paul jiang man mu na khat a neia a hong ti, “Chit maro, riro, om chian maro,”

¹⁰ ajarko, kein ka na kan ruai pui, tu khat innom naveno ni u, hale khosunghin kei ka mi a tam an om.

¹¹ Hava mun han a man anmani jiang Pathian chong ha amanchua kum khat le thakaruk khan na alui om.

¹² Tak-ha Galilio ning akhai ram sung aputlai Jiwngai ning lung khat tak khatjak an changa Paul ha an kan sualpuia, ama ha chong jenna mun han an hong tuang.

¹³ Han an hong ti, “Hiva mihi ning dan chong pek le kan jot lui alelam tianga Pathian chubeibuk na ranga mingai ha a man chu.”

¹⁴ Han Paul ning chong a hong ri tiang pha han, Galilio ning Jiwngai jiang a hong ti, “Hiva ruia a nilui chuan, animakle mithina chong alui om aninko; O, Jiwngai hiva ruijarra kein nang niha kinajet rang ke.

¹⁵ Tak-ha chongruija, le mingai ruia animakle nang ni dan chong pek ruia nan kan sual aninko, hava nang ni masia kan biakru, hiva ruia kei chongtanpu chang jot making.”

¹⁶ Han a man anmani ha hava chongtan na mun tenna anotcheijui.

¹⁷ Han anmanin Sainagok sunga vai hom ulian Sosthenes ha an churra, chong tenna mun madonna an lui ve; tak-ha Galilio ning an tho chuan ha tak telpemak.

Paul in Sairia Ihongkir

¹⁸ Paul in Korinth han a pha sot tak a om suale ulenaingai ha a mak, Prisila le Akuila a hong kanruaipuia Sairia tiang rokuang an chuanga an hong jui, hale ama chong sam na khat aneijarra kenkharia mun han a lu avuikokjui.

¹⁹ Hale anmanin Ephesia hin an honga, hava mun han anmani ha a mak, hale a man Sainagok sunga a lut Jiwngai le chong kan kherna a nei.

²⁰ Han anmanin ama ha hava mun na a pha bongkhat om suam na ranga an ri pha a man jot pe laima.

²¹ A man anmani ha a mak a ti, ‘Pathian lungdo aninko kein nang ni jiang veikhat kilavakir rang ke, han a man Ephesia tenna rokuang achuanga a che jui.’

²² Han Kaisaria a hong tung han, chung tiang a chea biakinn mingai ha chubei a buk, hale Antiok tiang a juang chumjui.

²³ A man hava mun han a pha bongkhat a om suale a mak Galalia le Phrigia ramtiang a don don na avakana thiamruoingai ha an lung amathokpejui.

Apolo ning Ephesia Ihongna

²⁴ Apolo anti Aleksandria tenna maheithei Jiw pasal khat Ephesia hin a hong jui, hale ama ko rabu thei mi khat alui ni.

²⁵ Hiva mihi Puma ruia asat nianga an man chu khat ani, hale amannom Jisu ruia thavanga lung lut manchunam alui nei, an in nom a man Johon a baptais tho na ruijak alui jet.

²⁶ Han a man Sainagok sunga thouna sat chong alui ri, tak-ha Prisila le Akuila ning a chong ri a anngaipha anmanin ama ha an inna an tuanga Pathian lam ha khel la asat nia nga an man chu dejui.

²⁷ Han a man akhairam va ralla ikandejot jarra ulenaingai ning ama ha a huia an lui ngaidon na rang thiamruoingai jiang chong shan che an ipejui, han a man a tung pha han manrit na jarra takngai na a neingai ha atam san na alui nei.

²⁸ Ajarko Jisu hi Khrista hake a ti pe a rabu sunga i kan jaik nuk juia a do pe va mitam ma don han Jiwngai chong ha a thianga alui tanpejui.