TIRLON 16 - Rabu Athar New Testament (BSI)

Timothi Ning Paul Le Sailas Annuk a jui

¹ Paul ning Derbe le Listra a hong tunga, han takngai Jiw numei ankhat nai Timothi anti thiamruai khat hava mun han alui om; a pa ko Grik mi alui ni.

² Listra le Ikonija a om takngai mirakip ning ama ruia asat an lui ri.

³ Han Paul ning ama ha a kan ruaipuijot, vuntan ha a man tho jui ajarko hava mun han Jiwngai ning a pa Grik ke tihi an lui jet.

⁴ Anmanin khopui khopui han an lut, Jerusalem ma a om tirlonngai le ulianrupngai ning an mansat chong lam ha jui thei na ranga anmani jiang anmani ning an lui pek.

⁵ Hingahin biakrupngai ha ning takngai a khel la an lui rat hale ni khat ni khat mijom an lui tam de det.

Tros han Paul Muna

⁶ Anmanin Phirigija le Galatia ramngai ha an hong kan jui; ajarko thavang thiang in Asia ram sunga chong ha lui man rijotma.

⁷ Anmanin Maisia an hong tung deng han anmanin Bithania va an lui hong lut jot, tak-ha Jisu Thavang Thiang in lui jot pelaimak.

⁸ Hiva jarra Maisia ha an hong khel la anmanin Tros va an juang chumjui.

⁹ Janna Paul a lung mit mu na an khat a mu jui, Mekidonia pasal khat ning a madonna a ngirra lam na a neia a hong ti; “Mekidonia va hong unlang na va sanru.”

¹⁰ Hiva munna hi ka mu suale kein in Mekidonia va chena ranga kan kan ning jui, ajarko Pathian ning keini hi anmani jiang asat chong ri na rang ana kui jui.

Philipia Lidia Lungthulna

¹¹ Keinin Tros tenna rokuang kan va chuanga tuipui sirra mapatak kan honga hava suale nikhuo han Neapoli kan va tung.

¹² Hava mun tenna kein in Philippi kan hong tung, hava mun ha Mekidonia ram sunga khopui phutna le Rom mingai om na om alui ni, han kein in a phat sot tak kan lui om.

¹³ Han sernikhuo ninghan kan suak tuidung shirra kan lui che, ajarko sovason lam na ranga mun lui om nati tia kan ngaidon; han kan honga numei lui omngai jiang chong ri ha kan phutjui.

¹⁴ Hava chong angaingai karra numei khat tiko; Thaijatira tenna ahong aming Lidia anti nu; Limon puansat juar nu, an khat om Pathian chubeibuk ama alung ha puma ning a longpe va Paul ning irirakip ha asat aluingai.

¹⁵ Han ama le a inn sung mirakip ha tui luhtna an neija, hale keini jiang kui na a na nei, “Nang nin keihi Puma takngai numei khat ke tia nan na lui aninko, ka inna hong unlang omru,” han a man che rei che rei tia ana lui nok.

Philippi ren Inn sunga

¹⁶ Keinin nikhat lam na rang a mun han kan che lai han, thavang satlui ranak ikandai suak numei khat kan kan tong pui; aman nuk suak rang chuan arija mingai jiang peisa aloa a neipungai rang a tam tak alui mantuang.

¹⁷ Numei hi ning Paul le keininuk anajuija, a hong khek a ti, “Nang ni jiang ringna lam lian chong hong sem mingai hi chung nung Pathian suakngai anni.”

¹⁸ Hingahin a man nikhuo sot tak alui tho, han Paul in a lung huimak a hong kanheia a thavang satlui jiang a hong ti; “Numeinu tenna suak na rang kei ning Jisu Khrista minga chong ka na pek,” hava phalaitak thavang ha a suak jui.

¹⁹ Tak-ha numeinu a neipungain an nem na omna ha ama jiang tenna a suak ha an mu han, anmanin Paul le Sailas ha an churra kaithial sunga vaihomngai jiang an hong kaiphiat an hong tuang.

²⁰ Anmanin anmani ha chongtanpu jiang an hong tuanga anti; mingai hi Jiw mi anni, anmanin keini khuo sunga an man kan nok.

²¹ Rom mi keinin tho rang, jui rang suak lui dan ning ijot luiha anmanin an hong ri.

²² Mitamngai han khat jak an changa anmani ha hong verang an tho, hale chongtanpungai ning om anmani puon ha ansut anmani ha mitamngain molla vetaru tia chong an lui pek.

²³ Hale anmanin anmani jiang a tam tak an ve suale ren inna anthunna asat ngak na rang ren inn ngakpu jiang chong an bejui.

²⁴ Chong an be le kan ruaia a man, anmani ha ren inn akiltak an ke ruia a khit atetjui.

²⁵ Tak-ha janchim phat lai han Paul le Sailas ning Pathian an lam ma, la an lui tho, han ren inna a om a dangngain nom an luingai.

²⁶ Han jet lui thailuija ning nu a hong kan nik ren inn mun tenna alui kannek, halaitak ren inn kot rakip om a kan longver, hale an khit mirakip om an kan khek ver jui.

²⁷ Han ren inn ngakpu ha insang a hong luija, a hong en pha han kot rakip i kan long ha a mu karra, achemsei ha aluia a thei jak kan sun that rang a hong tho, ajarko, renin na a om lim mingai ha an tanverjui tia alui ngaidon.

²⁸ Tak-ha Paul in rasa ring tak a hong khek, nathei jak man kanmang na rang tho maro, ajarko, keini kan renga hin kan om.

²⁹ Han a man meiser a sit a sunga a hong lut, a chit reija a kan nik thathak Paul le Sailas an madonna abokjui.

³⁰ Hale a man anmani ha a keisuak a hong ti, “E, miringai ring na rang kein imo ki tho rang?”

³¹ Han anmanin anti; “Puma Jisu ha takngairo,” nang le na inn sung sanring na nan mu rang ke.

³² Anmanin ama jiang le a inna a om mirakip jiang Puma chong ha an lui ripe.

³³ Havani janlen han a man anmani ha a tuanga anvena molbi ngaiha a rasukpe va, hale ama le a inn sung mirakip ha baptais an tho jui.

³⁴ Hale a man anmani ha a inna a tuanga bulian a don na, Pathian tak an ngai jarra ama le an inn sung mirakip an ning alui sat.

³⁵ Khuo a hong var le chongtanpungai ning anuia ming chong an pek anti, mingai ha ma sua taru.

³⁶ Hiva jarra ren inn a ngak pa ning Paul jiang a manjet chongtanpungai ning nang ni ha ma sua na ranga an va tir jui, hiva jarra a tun ko nang ni lunghip a che taru.

³⁷ Tak-ha Paul ning anmani jiang a ti, “Romngai mi khat kan nija chong najen luia mingai mai kunga an navea hale ren inn sunga an natet, atunko anmanin keini hi ruk chian na an na ma sua rang mo?”

³⁸ Han Thanangai ning chongtanpungai jiang an va ri a, Romngai mi ke ti ha an va jet an chitjui, han anmanin an honga ngaidam an hong lam.

³⁹ Hale anmanin anmani ha an ma sua khopui ha an mak na rang an ri jui.

⁴⁰ Han anmanin ren inn ha an mak Lydia inn tiang an che jui, hale anmanin u le naingai an kan mu puia mathok na chong anripea an mak jui.