TIRLON 14 - Rabu Athar New Testament (BSI)

Ikonija Sunga

¹ Atun Ikonija sunga Paul le Barnabas an lut a, chong an ri pha han Jiw le Grikngai takngai na anlui nei jui.

² Tak ha Jiwngai karra takngai lui alek in ulenai a dangjat mingai jiang tur anga an man kan endajui.

³ Ajarko anmanin Puma jarra a pha sot tak chong an ri a, anmanin kut chung tenna angakpa chuan ha aman tho va, Puman imanritna chong han shakhi a pek jui.

⁴ Khopui sunga a om mingai ha an kansenna, aviar in Jiwngai mi anchang, hale aviar in tirlonngai mi anchang jui.

⁵ Han Jatdang mi le Jiwngai lamkai ulian le kan ruaia anmani ha lunga an denga an man chitjui.

⁶ Hiva jarra tirlonngain Laikonija ram sunga a om Listra le Derbe khopui han an hong tan jui.

⁷ Hava mun han anmanin chongsat ha an lui ri.

Listra Le Derbe Khopui Sunga

⁸ Listra khopui sunga a nu ning a nei lai tenna asung suokpui a ke lonthei lui akalchoi choithei lui khat alui om.

⁹ Hiva pasal ha ning Paul ning chong iriha a ngai chiak han Paul in ama takngai na ha amu a, damtor nati tihi a jet, ama jiang alui en chiak.

¹⁰ Han Paul in rasa ringa a hong khek a ti: “Thui in lang asat ngirro.” Han a man a kan chomma a lonjeljui.

¹¹ Mitamngain Paul ning itho chuan ha an mu karra, rasa ringa Laikonija chonga an hong khek anti, “Pathian ngai ning miring anga an hong kan lem ma keini jiang an hong jui.”

¹² Han anmanin Barnabas ha Zeus an phuo va hale Paul lam ha chong ri tianga a lutir ani jarra Hermes tia an phuojui.

¹³ An pathian Zeus om na inn khopui varaltiang madonna a om thiampulian ning Sarat chal le parrui shuong kunga a hong choia mitam ngai le alui katsuam jot.

¹⁴ Paul le Barnabas ning mitamngai ning an tho jot ha an jet karra, an puon an ektherra mitamngai karra an lut an hong khek.

¹⁵ Miringngai, nang nin iruija mo hivahi nan tho? Keini om nang ni anga miringke kanni, nang nin nem na buia nan tho rakip hi a ring Pathian tiang vakanhei na ranga, asat chong hi kein in nang ni jiang kan hong choike, a man vanram, ramuol, tui, an khat om hiva sunga a om rakip asin ke.

¹⁶ A tuan lai tenna mirual mirual la jat rakip an lungdo va chena ranga alui jot pe.

¹⁷ Aninnom ama a om tihi jet na ranga shakhi buia lui tet mak, a man asat ana thopea chung tiang ruo aman tho, anle na ranarang kumle tha a na pek, hiva jarra chak rang nek rang nan neia nan lungdo a tunga ningsat na nan nei.

¹⁸ Hiva chong hi aria anmani chunga mitamngain kat rang anti ha khodeng riaija a manbangjui.

¹⁹ Tak ha Antiok le Ikonija tenna an hong Jiwngain hava munna an honga, mitamngai ha an sathui Paul ha lunga an denga a thi jui tia an ngaidon, a maha khopui varaltiang an dengjuanjui.

²⁰ Han thiamruaingai ning amasirra an ngirra an om lai pha han, a man a thuija khopui sunga a lut jui, hale khuo ahong var le a man Barnabas le kan ruaia Derbe an che jui.

Sairia ram sunga Antiok an hong kir

²¹ Anmanin khopui han chong anrija mitamtak an lung an manthulla thiamruai an man chang, hale Listra, Ikonija le Antiok an hong kir jui.

²² Thiamruaingai lung ha an man ngarra, an takngai na han om chak na ranga anmani ha an mathok an hong ti; “Atam lam pong khodengthei le kan ruaia kein in Pathian rengram han kan lut rang ani.”

²³ Anmanin biakrup chuan putranga ulian an thangpe han nom, bungei le kan ruaia lamna an neija a takngai miha Puma chuan sin ranga apejui.

²⁴ Han anmanin Pisidija an hongkhella Pamphilija hin an hong jui.

²⁵ Perga han anmanin chong anrija hale Athalija tiang an hong chumjui.

²⁶ Anmanin chuan hongtorna an neija Pathian manrit na jarra anmani jiang nei man ranga mun an pek Antiok tiang rokuanga an hongkir ret jui.

²⁷ Anmanin Antiok an hong tung han biakrup mingai ha an kuikhomma, Pathian in anmani le i kan ruaipuina, chuan ithopuina rakip, hale a dangjat mingai jiang takngai na lam hi Pathian in alongpejui tia anmanin anmani jiang an lui ripe.

²⁸ Hale anmanin thiamruaingai le a pha sot tak hava mun han an lui om.