TIRLON 11 - Rabu Athar New Testament (BSI)

Jerusalem Biakinn Ngai jiang Pitar Chong pek

¹ Atun jatdang mingai nom Pathian chong hi an tum jui tihi tirlonngai le Judia sunga a om mingain an jet jui.

² Han Pitar ning Jerusalem ma a che pha han, vuntanrupngai ning ama jiang chong kan kherna an neija,

³ An hong ti, “Iruia mo nang in vuntan luingai jiang na chea nichak puichun?”

⁴ Tak-ha Pitar ning adodonna chong ha anmani jiang a hong ripejui.

⁵ Kein Jopa khuo sunga lam na ka neia ka lui om, han kein mang ka phalla mun akhat ka lui nei, tiko puonsi lian tak khat ang hin phur thunna khat alui hong chum, han aki manli ha vanram tenna alui hong chumma ka kol la a hongtungtit.

⁶ Kein asat nianga ka en pha, ka ngaidon na, ramuolla a om ake manlinei sharakip, ramma a om, an von antat lon, hale chunga vapi vahaingai ka mujui.

⁷ Han rasha khat in a hong ti, “Pitar thui in lang thatnang charo, tiha kein ka lui jet.”

⁸ Tak-ha kein kati, Puma nati pemaro, kei chaknoning, ajarko a chok le a thiang lui hi kein ka baija lathun making.

⁹ Han vanram tenna rasha veini tung khan na a honga ana hong sanga a ti, “Pathian ning i man thiang sa ha nang in a chok manchang maro.”

¹⁰ Hi ang hin veithum khan na a hong suak, hale i rakip ha veikhat vanram tiang an choi khir jui.

¹¹ Hava lai tak han Sisaria tenna pasal anthum kei jiang an hong tirngai ha ning kein in kan om na inn madonna an ngirra an lui om.

¹² Han thavang ning kei ha ite kei chi keiok om luia, anmani le kan ruaia cheru tia anatipejui, hale ulenai ka ruk anmanin nom an na kanruaipui, han kein in hava mipa a inna kan lut jui.

¹³ Han a man ija mo muna i lui nei ha, tiko, thaneithiang in a inn sunga a ngirra a hong ti, ‘Jopa va tir in lang a ming Pitar om anti Simon ha hong mankuiro.

¹⁴ A man nang jiang chong ha na ripe nati, hava chongtenna an phut nang om, na inn sunga mirakip sanring na nan mu rang ke’.

¹⁵ Han kein chong ri ha ka hong phutle, keini jiang manlaia kan chunga i hong chum ang han, thavang thiang in anmani chunga a hong om jui.

¹⁶ Han kein ngaidon na ka hong nei, Puma chong riha, tiko Johon ning tuija baptais a na man nei, tak-ha nang niko Thavang Thianga baptais nan nei rang ke.

¹⁷ Aninko kein in Puma Jisu Khrista ha tak kan ngai laia ina pek ang han, a kan ang rip Pathian ning anmani jiang om kutchoi hi a pek inko, kein imo kania Pathian ha kikhap tor rang?

¹⁸ Han anmanin chong hi an jet karra, an om chian na, Pathian ha alian na an mahok anti, Pathian ning a dangjat mingai jiang om limkansirna an neija ring na nei na rang a jot pe jui.

Antiok A biakinn

¹⁹ Stephan ruia pong khodengthei a mua an kan sanrangngai ning Jiw mingai jiang jak chong ha an ria, a dangngai jiang ko niluia anmanin Phaonesia, Saipras le Antiok khan na an hong tung jui.

²⁰ Tak-ha anmani karra aviar ko Saipras le Sairene mi anni jarra, anmanin Antiok an honga Grikngai jiang Puma Jisu Khrista ruia an lui ripe.

²¹ Han Puma kut ha ning anmani ha alui kan ruaipui jarra, takngai mitam lam Puma tiang an lui hong kan hei.

²² Hiva chong hi Jerusalem ma om biakrupngai jiang a hong tung pha han, anmanin Barnabas ha Antiok antierjui.

²³ A man a hong tung pha han, Pathian manrit na ha amua a ning a luisat, hale anmani an renga lung khat, tak khat changa Puma jiang an omchak na rang an lui mathok.

²⁴ Ajarko ama ha misat, Thavang Thiang in a sip le takngai mi pasal khat alui ni, han mitam lam Puma jiang an lui hong lut.

²⁵ Han Barnabas ning Saul ha vatok ranga Tarsas acheijui.

²⁶ A man Saul ha a mu kar han Antiok a hong tuang jui, han anmanin kum khat biakrupngai ha an kanruaipuia, mitam ngaiha an lui manchu; hale Antiok a tirlonngai ha a rapatak Khristian tia anphuajui.

²⁷ Hiva ni khuongai sung hin Jerusalem ma Pathian tashantheingai ning Antiok an hong chumjui.

²⁸ Anmani karra a ming Agabas anti khat in a thuija; thavang ranak a hong ti, ‘Ramuol pumpui bulutna hong suak nati, hivahi Koloudias pha han a suak jui.’

²⁹ Han Judia va a om ulenaingai ranga, mirakip ning an tor khakhan santheina tirna rang tirlonngain chong an man satjui.

³⁰ Hi ang hin anmanin an tho jui, Barnabas le Saul kut chunga ulianngai rang antira an man che jui.