TIRLON 10 - Rabu Athar New Testament (BSI)

Pitar Le Kornalia

¹ Kaisaria hin a om ralmi rekhat neipu a ming Kornalia anti, Itali mi anti pasal an khat alui om.

² A ma ko an inn sung mirakip le adik chuan tho mi, Pathian chit alui om, mingai jiang santheina nei an khat om a pha rakip Pathian jiang a lam rat miha alui ni.

³ Nikhat pha dan kuo a chul pha han a thiang hiaia mu na khat aneia, Pathian Thaneithiang in ama kolla a honga ama jiang, Kornalia tia a hong tiha alui mu.

⁴ Hale a man ama ha ahong en chiak na khan ko a chit a hong ti; Puma imo inijui? Han a man ama jiang a ti, “Nang in lam nale mingai jiang santheina ninei rakip ha Pathian maikunga ngaidon na ranga a tung jui.”

⁵ Han a tun Jopa va a om Pitar an khat om Simon nom anti ama ha pasalngai tir in lang hong mantuangro.

⁶ A man Simon anti Savunsin mi khat le an omchun, ama a innko tuionglian sierrake.

⁷ A ma le a kan biak thaneithiang ha ning ama ha a mak a che pha han, a man asuakngai karra miring anni ha tiko a pha rakip a man a chuan tho ranga ngak lal la an om mi dik ralmi anni ha akuia.

⁸ Anmani jiang chong rakip ha aripe suale Jopa va atirjui.

⁹ Jingnga nikhuo han anmanin hangan an honga khopui ha an hong nai pha han, Pitar in pha dan karuk tanghan lam na ranga inn chunga alui kal.

¹⁰ Han a man a von a cham ma imo khat alui chak jot, tak-ha anmanin chak ranga anvar lai karhan, a man amanglam alui phaljui.

¹¹ A man vanram i kanglong ha amua puanlian lok anchun ang hin ikhat apuava ahong chum, han aki manlia ramuol la ihong masum ha a man alui mu.

¹² Hava a sunga Sharakip le a von an tak an lon, hale chunga vangai om an lui kan chel.

¹³ Han ama jiang rasa an khat in a hong ti, “Pitar thui in lang, thatnang chakro.”

¹⁴ Tak-ha Pitar ning a hong ti, “Nati pemaro, Puma, ajarko a thiang lui, a chok, phur hi kein lachak chil making.”

¹⁵ Han rasha an khat ha ama jiang veini tunga a hong ret jui, “Pathian in iman thiang ha nang in thiang mak titheino niche.” A thiang lui manchang maro.

¹⁶ Hivahi veithum khan na alui suak, hale phur rakip ha vanram tiang alui khierjui.

¹⁷ Atun Pitar ning muna khat amu ruija imo inijui tia, a lung sunga a tam tak a ning a donga a om lai han, enru, Kornalia ning ivatir pasalngai han Simon a inn ha an hong tok ti tirra palkunga an ngir.

¹⁸ Hale anmanin an hong kuia an hong dingkel; “Pitar anti Simon ha hivahin a om, mo?”

¹⁹ Han Pitar ning munakhat imuna ruia angaidon lai han, thavang ning ama jiang a hong ti, “Enro, pasal anthum ning nang ha an natok.”

²⁰ Thui in lang chumtaroh, hale ite kei chi keiok neiluia anmani le chero, ajarko kein anmani ha ki va tir ani.

²¹ Han Pitar ning a hong chumma, anmani jiang a ti; nang nin nan i tok miha kei kani, nang nin ijarra mo nan hong?

²² Han anmanin anti, ralmi riakhat neipu Kornalia mi dik le Pathian chit mi, hale Jiwngai jat mirakip ning misat ke tia rithangna an nei pasal jiang han, thavang thiang in ama a inna nang ha vatuangna ranga le nang in nari chong ha ngainaranga a ripejui.

²³ Han a man anmani ha akuia a inna a man tung jui, hale khuo a var le a thuija anmani le a kan ruaia a che jui, han Jopa tenna a hong ulenai a lek om ama le an lui kan ruai.

²⁴ Hava nikhuo suale anmani ning Sisaria hin an hong tung jui, Kornalia ning ama a inn sung a sap a jar a kui verra anmani ha an lui ngak.

²⁵ Han Pitar ning a hong lut pha Kornalia ning alui don na a ke kunga akhup a bilinga chubei aluibuk.

²⁶ Pitar ning ama ha a kei thuija a ti, ngirro, kei om mi ke ka ni.

²⁷ Han anni a an kan biak an hong lut pha han mitam an lui kan chun na amu jui.

²⁸ Han a man anmani jiang a ti, Jiw jat pasal khat in a dangjat mikhat le an kan top ankanlut hi dan chong pek jui luia niti hi nang nin nan jet. Tak-ha tu ang khat miha a thiang lui manchang maro ti a Pathian ning kei jiang a na man mu jui.

²⁹ Hiva jarra kein ite khat dachilluija ka hong jui, hanna nang nin kei nan na kui hi iruija mo ani tihi kein ka na dingkel.

³⁰ Han Kornalia ning a hong ti, “Nimanli madon na a tunna pha dan tak hin kein ka inn na pha dan kuo han lamna ka lui nei, enru puan varjap atiang pasal akhat in ka madona a ngirra,

³¹ a hong ti, ‘Kornalia nang in lamna ni nei ha ana jet pe jui, hale mingai jiang santheina ninei rakip ha Pathian maikunga ngaidon na rang a tung jui.

³² Hiva jarra Jopa va om Pitar om anti Simon ha hong mankuiro, a man Simon nom anti Savun sin mikhat le an omchun ama a innko tuionglian sirrake.’

³³ Hiva jarra kein anmani ha nang jiang ki lui hong tir ani, nang in nom na na hong pe va a tam a satjui, a tunko Puma ning nang jiang chong pek na ina nei rakipngai ha, ngainaranga keini kan renga a tun Pathian madonna kan om.”

Pitar Chongri

³⁴ Han Pitar ning a bai a anga ahong ti, “chong tak balla kein ka jet Pathian ningmichang mi kha neima. Mimel mi mai en mak.

³⁵ Tak-ha jat rakip sunga tu ang khat in Pathian a chit adik ha a tho inko a man a jot pe.

³⁶ Israel naingai jiang chong hi a hong tir tihi nang nin nan jet, tiko Jisu Khrista jarra lunghip na asat a chong ha an ria, a mako i rakip karra Puma ke.

³⁷ Johon ning tuija baptais tho na chuan ruia chong alui ria, hava suale Galili tenna Judia pumpuia chong an ri a nang ni nan tak innom nan jet mak ko nimak,

³⁸ han na jet Jisu chong ke ija mo Pathian ning ama ha thavang thiang le ranak le kan ruaia sariak anbun thuan na hale a man achena na asat chuan athoa a nat mingai jom alui mandam, ajarko Pathian ning alui kan ruaipui.

³⁹ Hale a man Jiwngai ram sunga le Jerusalem han nom ilui tho chuan rakip rui jarra kein in shakhi kan ni, han anmanin ama ha thing chunga an khaia an that jui.

⁴⁰ Tak-ha Pathian ning ama ha nithum chang na nikhuo han a man ring khirra lulian banlian puina amannei.

⁴¹ Mirakip jiang nimak, tak-ha Pathian ning inathang suaksa keini jiang ke; tiko shakhingai, a man alui thi tenna a ringkhir suale ama le kein in kan chak suom hale kan lui insuom.

⁴² Han miringngai jiang chong rinarang, athisangai le a ring ngai chunga chongtan na rang imanchang ama ha hiva mihike tia shakhi chang ranga a man keini ha chong bena ana nei jui.

⁴³ A ma arui ajarra Pathian tashanthei rakip ning shakhi an pek, tiko ama a minga takngai mirakip in siat ngaidam na mu nanti u.”

Jat dangngai Thavang mu na

⁴⁴ Pitar ning chong hi a ri pha han chong ha a ngai rakip chunga thavang thiang ning a hong chumjui.

⁴⁵ Han Pitar le an hong kan ruai chun, vun tanngai karra takngai mingai hanning an ngak banna, ajarko a dangjat mingai jiang om Thavang Thiang kutchoi hi an bunthuanpejui.

⁴⁶ Ajarko anmanin chong adadang anrija Pathian an manpak ha anmanin an lui jet, han Pitar ning a hong sang,

⁴⁷ Keini anga Thavang Thiang an mujui anmani hi baptais man tho mak na rang alui khap tor tumo kan om?

⁴⁸ Han anmani ha Jisu Khrista minga baptais tho na rang chong a pek jui, han anmanin ama ha nikhuo a lek na ompuiro tia an khap jui.