ROM MINGAI JIANG PAUL NING A JIAK CHITHI 4 - Rabu Athar New Testament (BSI)

Abraham Tenna Tetan na

¹ Tak sa lam tianga kan pu Abraham ning alui tum jarra keinin imo kan ti rang?

² Ajarko chuan tianga Abraham ha ilui mandik aninko a man man kan lianna a om, tak-ha Pathian madonna ko nimak.

³ Ajarko, chong thiangin imo a ti? Abraham ning Pathian ha tak a ngaia hale aman a maha mi dik ke tia alui jui.

⁴ Chuan tho miha ning an chuan tho nuk juia manrit nava an ngaidon pe mak inko lamal antual tia an lui.

⁵ Tak-ha, chuan tho lui ning Pathian ha anmanrit a man dik inko ama ha takngaija an mandik.

⁶ Chuan kan chel luia Pathian ning ama ha mi dik ke tia alui miha rasisat ani, David innom a ri ang hin ani.

⁷ Anmani an siatna ha ngaidam na a om le an siatna ha akhupe anmani ha ravansat anni.

⁸ Puma ning an siatna ha atel pe lui ngaiha rasisat anni.

⁹ Ha aninko phual hi vun tanngai jiang jak mo ani? Animakle Vun tanluingai jiang a om ani rang? Ajarko keinin kan ti; Abraham jiang ko ama takngai na nuk juia a man dik.

¹⁰ Ha aninko ija mo ama ha an jot? A ma Vun a tanmak ma han, animak le vun atan suale mo? animakl ma han ke.

¹¹ Tak-ha ama vun an tanmak ma han a man takngai na a nei nuk jui a adik vuntan jet na ha a man a mu jui, hiva jarra anmanin mi dik ke tia an lui, Vun antanmak ma takngai mirakip ning ama ha apa tia an lui.

¹² Vun tan chuan ha anche ni luia keini kan pu Abraham ning Vun a tanmak ma han a takngai na han kan son na anei anmani jiang vuntan ruia pa a hong chang jui.

Pathian Chongtan Hiko Takngai Tenna an mu

¹³ Ajarko Abraham jiang ramuol la nai charapa inirangke atia anmani chongsan na chi nei ha chongtanpu ha ning dan chong pek nukjui niluia takngai nuk juia mi dik ha a man chang.

¹⁴ Ajarko dan chong pek mingai jiang nai charapa an tum aninko, takngai ha nemna bui ani jui, hale chong ngir naha i om nilai mak.

¹⁵ Ajarko dan chong pek ha ning rangna a man suak, tak-ha dan chong pek i om lui na mun han Chong pek i om omak.

¹⁶ Hiva jarra manrit na nuk juia nina ranga hava takngai tenna ke, Vonchoi rakip jiang chong pek nuk juia nimak; Abraham ning takngai na inei nuk juia chong ngir na ha man chang na ranga ani.

¹⁷ Abraham ko athi ngai ha man ringkhir le ahuia om pui suam ranga a kui Pathian a man takngai na nuk juia ama madonna keini kan pa ani; kein ama ha jat rakip ning an pa asuak tia kan jiak ang hin ani.

¹⁸ Nangna vonchoi sunga ni nati anti ang han a dangjat karra mirakip pa a hongni na ranga Abraham ning a ngaidon ha animak innom an ngak lalla a hong ni jui,

¹⁹ anin nom a man takngai na ha bangluija atun a man a taksa ha a thianga ama kum riakhat a tung jui hale Sara anaikok a thisa ha Pathian ning a hong ngaidon pe.

²⁰ Aninnom Pathian chongtan na ha tak angaija Pathian ha amanpak.

²¹ Tak-ha Pathian ning i ngaidon nuk juia ki tho rang ke iti ha a lung sunga ngirna a tho jui.

²² Hiva jarra ama jiang a man takngai na ha dik natiang angaidon pe.

²³ A ma jiang ka ngaidon rang ke tia ama ruia anjiak chong ha nimak.

²⁴ Tak-ha keini jarrake, ajarko, keinin kan puma Jisu ngai tenna ringkhirna anei ama ha takngai na keini jiang ana man nei jui.

²⁵ Jisu ha keini kan siatna jarra an pek jui hale keini ha mi dik chang na ranga a ring khierjui.