ROM MINGAI JIANG PAUL NING A JIAK CHITHI 16 - Rabu Athar New Testament (BSI)

Paul Chubei

¹ Kenkharia hin a om biakinn chuan sin keini kan char nu Phoibi hi, nang nin mi thiang ngai anga Puma jiang nan na luipe na ranga kein nang ni jiang ka na pek jui.

² Hale nang ni jiang tenna ama nemna rang a om aninko nang nin ama ha na san peru, ajarko a tak tak in mitam rang le kei rang om a na san mi ani.

³ Khrista Jisu jiang kei le chuan sin suam Prisila le Akuila jiang chubei ka na pek.

⁴ Anmanin ka thavang ranga anmani an ring khua an juor, kei ka thei jak in anmani ha ka manpak ni luia, jatdang biakinn rakip innom an manpak.

⁵ Anmani inna an kan chun biakinnngai om chubei ka na buk, Khrista rang Asia ram sunga a rapa arachang ka lungsiat Epenetam chubei ka na pek.

⁶ Nang ni ranga a tam tak chuan tho Mari om chubei ka na pek.

⁷ Kei ka sap anni le kei le ren inna lui om suam Andronika le Junia om chubei, anmani ko tirlonngai karra an kan jep le kei nek man Khrista jiang lui om mi anni.

⁸ Puma jiang ka sap Ampalia om chubei,

⁹ Khrista jiang keini le chuan sin suam Urbana le kei ka sap Stakhi om chubei,

¹⁰ Khrista jiang kan kan jot jui Apili om chubei ka na pek, hale Aristobala inn sunga a om rakip om chubei.

¹¹ Kei ka sap Herodian om chubei, Narkhisa inn sung Puma jiang a om rakip ham chubei ka na pek.

¹² Puma le kan ruaia chuan sin Triphina le Triphosa om chubei, Puma le a tam chuan sin mi ka charnu Parsi om chubei.

¹³ Puma ranga athang suaksa Ruphu le kei kan u asuak om chubei ka na pek.

¹⁴ Asen Grita le Phalegon, Harme le Patroba le Harma anmani le an om suam ulenaingai om chubei.

¹⁵ Philologa le, Julia, Neria, hale ama char nu Olimpa an khat om anmani le a om suam mithiang rakip jiang chubei.

¹⁶ A thianga biang kan tum le kan ruaia an khat le an khat chubei kan pekru, Khrista biakinn rakip innom nangni ha chubei an na pek.

A torna Man chu

¹⁷ Ulenaingai kein nangni ha ri na ka na nei, nang nin nan jet sa chong ha a le tianga na khuisen na ranga kutsuikesui man suak na ranga a var nang nin an mel ha jetru.

¹⁸ Ajarko ha ang chat mi ngaiha keini kan puma Khrista a suak nima u, anmani ko an von rang jak ke, Hale an chong ri thei an chong hui han mi chamngai lung ha an huang ke.

¹⁹ Ajarko nang nin chong ri nanngai hava chong ha mirakip jiang a tung jui, kein nang ni jarra ningsat puina ka nei; tak-ha nang nin asat ruia chingna theina nan neia, hale asat mak tiang ko tak telluia nan om rang ha kein ka dei.

²⁰ A pha bongkhat a om le lunghip Pathian ha ning seitan ha nang ni nan ke kunga manbok nati, keini kan puma Jisu Khrista manrit na ha nan chunga na om pui chak rase.

²¹ Kei le chuan sin suam Timothi le ka inn sung suak Lusia hale Josan, Sosipatar ning nang ni ha chubei an na buk.

²² Hiva chithi jiakpu Tarkhi ha kei ning Puma minga chubei ka na buk, kei le kan ruaia biakinn rakip ranga tung na mun a na pek Gajan ning nang ni ha chubei a na pek.

²³ Irastas le kan u kan nai Kuarta ning nang ni ha chubei an na pek.

²⁴ keini kan puma Jisu Khrista manrit na ha nang ni rakip jiang na om pui rase. Amen.

Manpakna le Lam na

²⁵ Atunko kei ning chongsat ruia an khat om ri jot lui ha ka na manjet Jisu Khrista ruia ka lui sem chong nuk juia nang ni ha a det i na man om tor ama jiang kein nang ni ha ka na pek jui.

²⁶ Hiva chong ruk hi a phut na bui a pha rakip an lui tet ha a tun kei ning ka ri suak jui, hale Pathian tashantheingai an rabu tenna a tor ti bui Pathian chong nuk juia jat rakip jiang takngai jarra chong jui ha manjetna ani jui.

²⁷ A ching tak Pathian jiang Jisu Khrista jarra a tor ti buia manpak na ni rase. Amen.