ROM MINGAI JIANG PAUL NING A JIAK CHITHI 15 - Rabu Athar New Testament (BSI)

Mi Lung Mantairo

¹ Arat keinin kan theijak ranga huina ha tho luia, a ratluingai an choi torlui ha choipui suamrei.

² Keini mirakip ning kan inn ri kan inn tang ngaiha satna rang le sin na rang tho innang an lung mankhoprei.

³ Khrista ning om a theijak ranga a lungdo mankantung torma; hingahin alui nisa ke, “Nang ana endangain an jek chong ha ka chunga a chul jui.”

⁴ Ajarko rabu an jiak sa duirat nale masiat na jarra keini kan jet chichiak mu na ranga atuanlaia an lui jiak sa ngaiha keini kan chuna ranga an lui jiak ani.

⁵ Lung kan rual le kan ruaia nangni khat jak changa keini kan Puma Jisu Khrista a pa ichang Pathian nom i chang ha manpak na ranga,

⁶ Jisu Khrista a nuk kan jui le khat le khat kan lung a kan chun na dui rat nale masiat na tianga Pathian ning nang ni jiang na pek rase.

⁷ Hiva jarra Khrista ning nang ni ha ina don ang han Pathian lianpui na ranga nang nin an khat le an khat ha kan donru.

⁸ Kei ning kati, Ka pu ka pangai jiang chongtan naha det na rang le a dangjatngai ning Puma lungsiat na jarra Pathian ha an manpak na rang,

⁹ Pathian dik na jarra Khrista ha vun tanngai chuan tho mi a man chang, a kan jiak sa anghin ani, “Hiva jarra kei ning jatdangngai karra nang ha ka na manpak rang ke.”

¹⁰ Veikhat ama ning a ti ret, “Jatdang mingai ama mingai le ningsat suamru.”

¹¹ Han veikhat, “Jatdang mingai Puma ha man pakru, hale jat rakip in ama ha manpak rase u.”

¹² Hava suale veikhat Isaia ning a ti, “Jesse achi a om rang ke hale jatdangngai chunga a neipu chang na ranga hong suak nati; ama jiang han jatdang ning jet chichiak lungdo nei nanti.”

¹³ Thavang thiang ranak han nang ni jet chichiak nan lungdo ha hong khel na ranga Pathian ning nan takngai na ha ningsat nale lunghip na rakip nangni ha na mansip rase.

Paul ning lung lut tak a a jiak

¹⁴ Ulenaingai nang ni nan tak jiang asat le ching na theina nan mu jui, khat le khat om man kan chu kan tor jui tia kei ka tak khet in nan chong ha takngai na ka nei.

¹⁵ Han a dangjat mingai jiang kei hi Khrista Jisu a chuan tho mi na ni rang ke tia Pathian ning kei jiang ana pek manrit na jarra nang ni ha veikhat ka na ngaidon retle kan ruaia arui ajar aviar hi khel la lung lut a ka jiak ani.

¹⁶ Thavang thiang in iman thiangsa jatdangngai ha Pathian ning ana jot pe na rang kei ning thiampu anga Pathian asat chong ruia chuan ha ka tho.

¹⁷ Hiva jarra Pathian arui tianga chuan ha kein Khrista Jisu jiang ningsat na ha ka mu.

¹⁸ Han chong le chuan ha a ngak angakpa jet na ranak thavang thiang ranak jarra, jatdang mingain chong ha an jui jarra Khrista ning kei ha ana neiman na a i tho chuan ha ni luia kein ite khat rina ranak nei making.

¹⁹ Hingahin Jerusalem tenna ka honga Ilurikam kahongsuak thenga kei ning Khrista chongsat ha a kip dirra ka hong ri jui.

²⁰ Kei ning midangkhat inn mun chunga sin na ranga Khrista ming an la jet chil lui a mun han chongsat ha ri na ranga kei ka lungdo ani jui.

²¹ Hingahin a kan jiak jui, “Amaruia chong ila tung chil lui anmanin mu nanti u, hale an la ngai chil lui anmanin jet nanti u.”

Rom ma Paul ning Che rang Itina

²² Hiva jarra nang ni jiang ka hong rang pha a tam lam kei ha an na khap.

²³ Tak-ha a tun ko ka chuan hi ka tor jarra hale nang nin kum sot nan jot jarra,

²⁴ kei ning Spain na ka che pha han tiko kei ka khuol che na han nang ni ha kan mu kan ti hale a phut na tak han nangni le a pha bongkhat man hui suam kanta, hale nang nin ki che na rang mun tiang nan na va thak rang ke ti a ka ngaidon.

²⁵ Tak-ha atun ko kein a thiangai chuan tho ranga Jerusalem tiang che rang ka ni.

²⁶ Ajarko Jerusalem ma a om mi thiang ngai karra a riang mingai ranga pek rang phur a om Makidonia le A khaingai lungdo ani.

²⁷ O anmani lungdo ha ani, anmanin anmani jiang lamal ha an tual jui, ajarko jatdangngai ning anmani thavang ranga phur ha an mu suam aninko taksa ranga phur han anmanin, anmani jiang chuan tho ranga lamal an tual jui ani.

²⁸ Han kein hiva chuan hi ka torna loman ha a thianga anmani jiang pek bak, nang ni tenna Spain tung na ranga ki che rang ke.

²⁹ Han kein nang ni jiang ka hong pha han Khrista jiang tenna, le kan ruaia ka hong rang ke tia ka jet.

³⁰ Ulenaingai, Judia hin a om ringai lui tenna keihi na san na ranga, hale Jerusalem ranga kei ning ka tho chuan ha a thiang ngai ning an na jot pe na ranga;

³¹ Kei ranga Pathian jiang nang ni le kan ruaia lam na nei suam na ranga keini kan puma Jisu Khrista jarra le Thavang Thiang lungsiat na han kein nang ni jiang ka na lam.

³² Kei ning Pathian lungdo nuk juia ningsat tak ka honga nang ni le kan ruaia, pongmasum nahi mu suamrei.

³³ Atunko lunghip Pathian ha ning nang ni nan renga na kan ruaipui rase, Amen.