ROM MINGAI JIANG PAUL NING A JIAK CHITHI 14 - Rabu Athar New Testament (BSI)

Na u Nanai Jiang Chong Tan maro

¹ A takngai na atom ama ha nang nin lui phamru, a takngai tom han ama chongtan na ranga ko nimak.

² Miring khat inko phur rakip hi chak a jot tia takngai na anei, tak-ha takngai atom a man ko anle na jak a chak ani.

³ Achak mi han ning a chak lui miha esel ma rase, hale a cha lui miha ning om a chak miha chong tanmarase; ajarko Pathian in ama ha a jot pe.

⁴ Midang khat suak ha chong nitan nang tumo na ni? A ma neipu ning ama ha a mandik mo, a man lal mo a cham ke, ama ha mandik nati, ajarko Puma ning ama ha a mandik tor.

⁵ Mi khat ning nikhuo khat nek a nikhuo khat ha takngai na a nei, midang khat ningko nikhuo rakip a kan angver tia a ngaidon; mirakip in anmani an lung sunga a thianga an jet an om ha ni rase.

⁶ Nikhuo ha a ngaidon na a om miha ning Puma ranga ngaidon rase, hale a chak miha ning om Pumaranga chak rase, ajarko ama ning Puma amanpak; hale a chak lui miha ning Puma ranga chaluia Pathian ha amanpak.

⁷ Keini mirakip hi an taksa ranga an ring nimak, hale tu khat innom an tak saranga an thi nima.

⁸ Ajarko keinin kan ring anin nom Puma ranga kan ring ke, kan thi an in nom Puma ranga kan thi ke.

⁹ Hiva jarra keinin kan thi in nom kan ring innom Puma ranga ke, ajarko Khrista ning a thi ngai le a ring ngai Puma chang na ranga a man a thi om a thi jui a ring om a ringkhir jui.

¹⁰ Iruia mo nangin na u nanaingai jiang chongtan na na nei? Na u nanaingai ha eselna na nei! Ajarko keini kan renga Pathian chongtan na madonna kan la ngir rang ke.

¹¹ Hingahin a kan jiak a om, Puma ning a ti, a ring Pathian ka ni jarra an khup biling nan ta, hale lei a nei rakip ning an namanpak rang ke.

¹² Hiva jarra keini mirakip in kan lui tho na rakip ha Pathian jiang pek anti.

¹³ Keinin ankhat le ankhat ha veikhat chong kan jen laimarei, hanek inko an khat le an khat ulenaingai lon na lam ma kutsuikesui nei na rang phur tet mak na ranga kan lung sunga ngaidon rei.

¹⁴ Phur ankhat hi a thiang lui i om om mak tihi kei ning ka jet chiak, Puma Jisu jar han nom takngai na ka nei; tu ang khat mi ning phur ha a chok jui a ti le phur ha i chok ke.

¹⁵ Ajarko chak rang phur jarra na u nanaingai an lung na man pong inko nang in lungsiat jui a che mak che, Khrista ning ama rahut a thi pe jui ama ha nang in chak rang phur jarra manmang maro.

¹⁶ Hiva jarra nang ni nan chuan sat ha esella jek ma rase u.

¹⁷ Jetru Pathian ram ko chak le nek na nimak, tak-ha thavang thianga dik nale lunghip, ningsat ha ani.

¹⁸ Hiva jarra Khrista jiang hangan i ngaidon amaha Pathian ning a lungdo a tung hale mi ning om an jot pe ani.

¹⁹ Hiva jarra lunghip na man nei ankhat le ankhat kan sin hei na tianga keinin che rei.

²⁰ Chak rang phur jarra Pathian chuan ha manmang maro, phur rakip a thiang ani, tak-ha mi kutsuikesui man nei na rang a chak mi ama ranga a salui ke.

²¹ Me chak ju in han na u nanaingai kutsuikesui neimak na ranga thoru.

²² Nang na takngai han Pathian madonna na thei jak rang ni rase, ama ning i jot jui atak athei jak rang han chongtan na ikan chel lui ama ha ravansat ani.

²³ Tak-ha kei chi keiok nei chunga a chak aninko, ama ha siatnei ani, ajarko takngai tenna nimak, tak-ha takngai tenna ani lui rakip ha siatna ke.