ROM MINGAI JIANG PAUL NING A JIAK CHITHI 13 - Rabu Athar New Testament (BSI)

Ram Vaihomngai jiang Chuan tho na

¹ Mirakip ning ram vaihomngai chong jui ha ni rase, ajarko Pathian jarra ni luia a tor pu om ma u, aninom atorpungai hi Pathian ning a var pe ke.

² Hiva jarra atorpungai tak tel lui ama ha Pathian ning a varsa ha a jot lui ani, hava jarra an jot lui anmani ha chongtan na mu nanti.

³ Ajarko a neipungai ning asat chuan na manchitna an nei nima, tak-ha a salui chuan na ke; nang in a tor pu a chit lui mo na chang jot? Nang in asat thoro, ha aninko a tor pu ning namanpak nati.

⁴ Ajarko ama ning nang sat na rang a na var pe Pathian chuan tho khat ani, nang in a satlui na tho aninko chitro, ajarko a man chemsei ha nem na buia i choi nima, ama ko Pathian chuan tho ani jarra asat lui tho mi jiang han apuk saktor ani.

⁵ Hiva jarra lung thak na jak ha ni luia adik dik lui ha a lung sunga i ngaidon tor hava jarra nang ni nan tak innom hava chong jui ha changru.

⁶ Hiva jarra nang nin khasana nan pek ani, anmanin hiva chuan ruia an lung an man lut Pathian chuan tho ha ani.

⁷ Pek rang isuak ha peru, khasana tel rang suak ha telru. Nan binga nan pek rang ha peru, hale chitlejak nei rang suak han neiru.

Ulenai Anga Kan lungsiatru

⁸ Khat le khat nan kan lungsiat lamal ha ni luia tu khat jiang om lamal tualla om maru, ajarko midang ha alungsiat a man dan ha a man tung jui.

⁹ Chong pek in a ti, nang in mi numei le om pui salui tho maro, nang in mi that maro, nang in ruk tho maro, na pham rai man siat maro, hale a dang chong pek ha a la om de niko, “Nang in na inn ri na inn tang ngaiha na tak khet anga ni lungsiat rang ani”, tia chong hin a kan chel pet jui.

¹⁰ Lungsiat in ama a inn ri a inn tang jiang a satlui tho mak, hava jarra lungsiat in dan chong ha a man tung jui.

¹¹ Nang nin a pha hi nan jet hiva jarra hivahi na tho peru a tun hin, jal tenna an phut thuina pha ha ani jui. Keinin man lai tak kan luingai pha tenna atun hin sanring na mu na ranga a hong nai jui.

¹² Jan a chimjui, sun a hong nai jui, hiva jarra jan chuan hi kein in mak inang a var chem le pho ha lektarei.

¹³ keinin sunna kan che ang han a adik lonrei, nun chan nei lui, ju rui, a rang siat, mi risiat le mi en lal ha tho ma rei.

¹⁴ Tak-ha nang nin Puma Jisu Khrista ha puan si diar kei anga kairu, hale taksa ning i dei ha man tung na ranga taksa rang var maru.