ROM MINGAI JIANG PAUL NING A JIAK CHITHI 1 - Rabu Athar New Testament (BSI)

¹ Jisu Khrista suak, tirlon ranga an kui jui, Pathian Chongsat ha ri ranga an thang suak Paul kei hi ana thang suak jui.

² Asat chong hako Pathian ning a pha sot tak madonna ama tashantheingai chong lui ri nuk juia chongthiang rabu han an lui jiak sa chong samna ani.

³ A pasalnai ruia chongsat ha taksa tianga David vonchoi sunga nai a hong chang.

⁴ A thiang thavang ranak han a man athi tenna ringkhirna a neia ranak neia Pathian nai ani tihi kan jet jui ama hako keini kan puma Jisu Khrista ani.

⁵ A ma jiang tenna keinin ama a ming ha jat rakip karra takngai na rang le chong jui manchang na rang manrit nale tirlon chuan ha kan tum jui.

⁶ Jisu Khrista ami chang ranga ana kui kar han nang ni om nan kan cheldejui.

⁷ Rom ma a om Pathian ning alungsiat, mi thiangai tia an phua rang nang ni jiang kan Pathian le puma Jisu Khrista manrit nale ahip adai ha om rase.

Manpakna Lam na

⁸ Nang ni nan takngai na ha ramuol pumpuia athang jarra, a masat a nangni rakip jarra Jisu Khrista tenna ka Pathian ha ka manpak.

⁹ Ajarko kein lam na ka nei racham nang ni ha kana ngaidon chak tihi kein a pasalnai Khrista ruia ka lung lut a sepa kitho Pathian ning shakhi ani.

¹⁰ Pathian lungdo aninko, kein nang ni jiang hongna ranga a pha rakip ki lam le kan ruoija ka chuan hi torna ka tho.

¹¹ Ajarko nang ni ha khella namanrat na rang, kein thavang kutchoi ha nang ni jiang kana pekjot jarra; a tam tak ka na luimu jot,

¹² hako hike ani, keini khat le khat kan takngai na han kan kan sathui na rang ani.

¹³ U le naingai nang ni hivahi na jet peru, a phat a tam lam ma nang ni jiang hong na ranga kein ka luivar; tak-ha i ang khat ning keiha ana khap.

¹⁴ Keiko, Grikngai jiang han jatdang jiang om hale aching a theingai jiang om a pangngai jiang om an lamal ka tualjui.

¹⁵ Hingaihin, kein kator khan ko Rom ma a om nang ni jiang chongsat hi ri na ranga ka ngaklal.

Chongsat Ranak

¹⁶ Ajarko kein chongsat jarra jakna nei making, hivahi a takngai rakip ning sanring na muna ranga Pathian ranak ke, a phut na han Jiwngai jiang le Grikngai jiang om ani.

¹⁷ Takngai jarra Pathian tianga mi dik amannin, hingaihin akan jiak, midikngai ning an takngai jarra ring nanti.

¹⁸ Ajarko mi dik annimak jarra adik ha anda, Pathian oilui mishamak rakip chunga Pathian rang na ha vanram tenna an phuong.

¹⁹ Ajarko Pathian ama ruia a jet anmani jiang a ripe nuk juia Pathian ning hava ha anmani jiang a manjet jui.

²⁰ Ajarko ramuol an sin mak ma, ama ha mu torlui tiko ama ranak le Pathian an mu jarra kut a sin phur rakip ranak han ama ha a thianga kan muthei hava jarra anmani ha ngaidam na om mak.

²¹ Anmani ning Pathian ha an jet in nom a maha manpak ma u, hale a man atho pena ham jet ma u; tak-ha an ngaidon rakip ha nemna bui a hong nia an salung a jing jui.

²² Antak inko kan ching anti, tak-ha a pang lam an hong ni jui.

²³ Anmanin Pathian lianpuina ha mang ajot, va pia vahai, akebuija alon miring lungdo angahan anmannijui.

²⁴ Hiva jarra anmani masia an taksa ha jakmak na ranga, Pathian ning anmani lungdo nuk jui ha adik lui ha nina ranga a masua jui.

²⁵ Anmanin adik Pathian ha adik lui lam an man changa, a man isin phurngai lam ha a don na chuan ha an tho; ani nom a sin pu ama ha amongtibuia manpak rang asuak amen.

²⁶ Hiva jarra Pathian ning anmani ha jak na om tak chuan ha atheini pea an numeingai jiang a balam ma an tho chuan ha tho theina ranga amalet pe jui.

²⁷ Hiva jarra an pasalngai ning om numei an kan top ha an mak a, an taksa khat le khat mei anga ikanga ilum ha pasal masia jak nale siatna chuan tho jarra, an siatna nuk juia an tum rang suak ha an tum ke.

²⁸ Anmanin an lungdo va an jet lui Pathian ha, mun an pek lui ang han jak na om tak chuan ha tho na ranga Pathian ning ajot lui chuan an lungdo va an tho jui.

²⁹ Adik chuan tho lui, a satlui, pham rai siat, mi en lal, mi risiat, mi thatjot, mi vejot, leiseiri, lung thak na chuan ning a sip mi rui ri kan sual kan se an lui nei.

³⁰ Pathian madonna matir om khat le khat kan risiat, jak jet lui, man kan lian, napal tho asat makjak keisua nu le pa chong jui lui,

³¹ mi pangngai chong le mi lungsiat jet lui.

³² Hiva mingai hi ning hi ang chat chuan hi abalam ma an tho, thi a jot tia Pathian chong pek ha an jet chunga hava tak-ha an tho jak ni luia, a rapa a lui tho mingai hale an tho suam.