PHILIPI 4 - Rabu Athar New Testament (BSI)

Manchuna

¹ Hiva jarra U le naingai, iduk mo lungsiat nanna lui mu? Hale kei chunga manrit na nan na luitho hiva ngai hin ka lung sunga iduk mo ningsat na alui ni? kein ki man kan lianpui nale ka ning na satpui nang nin puma jiang a det ana ngirperu.

² Ijudia, le Sinthike hi nang nin nan charnu anga puma jiang lungsiat na na mu peru.

³ Ka sap satngai hiva numeingai hi na san peru, anmanin kei le chongsat sem ruia atam tak an na san, anmani jak ni luia Kelemen le adang chuan sin puisuam ngai an mingngai Pathian ring na Rabu sunga a om jui.

⁴ Puma jiang pha rakip nan ning man satru, vei khat om kati ret nan ning man satru.

⁵ Mirakip jiang lungtai ha doru puma a rak hong rang ani!

⁶ Nan ning man dong maru, tak-ha Pathian jiang nan lungdo rakip hin lamru, pha rakip manpak le kan ruaia lamru.

⁷ Miring chingna theina ning tung torlui, Pathian lunghip na Jisu Khrista le nan kan top na han, nan sa lung sunga om rase.

⁸ A torna han u le naingai, asat phur manpak rang suak ha ngaidon ru: hale, adik nunchan sat, a thiang lungsiat chitlejak nei rang suak ha nan lung sunga omchak rase.

⁹ Kei jiang nan kan chu nan mu omchan sat rakip ha nang ni om thoru, ka chonga animakle ka chuan na, nan mungai ha nei manru; Pa Pathian lunghip le lungdai ha nangni jiang na kan ruoipui rase.

Kutchoi ruia Man Pakna

¹⁰ U le naingai, nang nin Kei ranga vei khat ngaidon na nan nei jarra, puma jiang ka ning asat! Chong tak balla nang nin nan na ngaidon pe; tak-ha nang nin a pha ko lui mu tor ma che u.

¹¹ Hivahi Kein ka nei mak jarra kati nimak, Kein ka nei dan na lung khop pumma ha ka tho va ka om jui.

¹² Kein ijamo ka tho le ki nei det rang, hiva jarra, i rakip hi ka khop in nom ka vom a cham innom khel la ka nei innom aviar jak ka nei innom hiva rakipngai ha kein jet thei na ka nei jui.

¹³ Kei ka ranak na pekpu Khrista jarra kein hiva chuan rakip hi tho torna ki nei ke.

¹⁴ Tak-ha nang nin kei ka pong khodeng ka thei na rakip ka sap nan changa nan na tho pe jui.

¹⁵ O! Philipingai, nangni nan tak khet in nan jet ti ko; chongsat san ruia aphut lai tenna kein Mekidonia tenna ka suak lai han, nang ni niluia biakrup khat jak innom San nale pekna, nang ni ni luia ka sap tute khat om lui om ma u.

¹⁶ Thesolonika hin Kein ka om lai, kei nem na ranga, i lut rang phur irakip ha hong tir na nan na nei pe ret.

¹⁷ Kein kutchoi ha Kadeia kati nimak tak-ha nang ni om a khel la ara mu thei na ranga ani.

¹⁸ Kein a renga ka mu ver jui, kavat sam na ite om lai ma; nang nin nan na hong pek kutchoi ngaiha Pathian mai kunga arim hui lungdo lung ha ani. Epaphroditus kut chung tenna ka mu ver ani.

¹⁹ Kei ka Pathian ning nang ni nem na ranga phur rakip ha Khrista jarra lianpui na a om phur rakip nang ni jiang na pek nati.

²⁰ Kan pa Pathian amongtibuia manpak ha ni rase Amen.

A torna Chubei

²¹ Khrista Jisu jiang a thiang rakipngai ha chubei, Kei le akan ruai chak u le naingai ning om nang ni ha chubei an na pek.

²² A thiang mirakip le reng chang kual sunga a om insung mingai ning om nang ni ha chubei anna pek.

²³ Puma Jisu Khrista manrit na ha nan chunga om rase.