PHILIPI 3 - Rabu Athar New Testament (BSI)

¹ A torna u le naingai! Puma jiang nan ning man satru, Kein nangni jiang veisosom ka hong jiak hi kan khongpui making, tak-ha nang ni ranga a khel la sat thei na ani.

² Ui ngaiha kan ning theiru, a satlui chuan tho ngai ham kan ning theiru vuntan ngai ham kan ning theiru.

³ Ajarko, keini ko Pathian thavang jarra Pathian ha kan oi, Khrista Jisu jarra man kan lian nale, taksa va takngai ite nei lui vuntan ha kan ni.

⁴ Aninnom kei ka tak innom taksa tiang takngai om nei a jot, tu ang mi taksa tianga takngai kani atinko kei ning ke ka khel.

⁵ Kei ko nikariat chang na han vun katan, Israel sunga nai ka hong chang Benjamin phung sunga ka ni. Hebru thisen thiang ha ka ni; Jiwngai dan omchan nuk juia kan ti le Pharisi ha ka ni.

⁶ Mi sat mak ka luini jarra biakrup khodengthei ka lui pek, dan chong pek nuk juia kan ti inko mi dik ha ka ni.

⁷ Hiva jarra kein ki lui nei rakip ha Khrista tianga ko nem na lui mang ani jui tia ka lui.

⁸ Adik tak a! Kein ka puma Jisu Khrista ka jet ha khel la chung chuan na asat ke tia ka nei phur rakip ha nem nabui ani jui; ka binga mi dik ka ni, tiko dan chong pek nuk juia ni luia Khrista jiang takngai na ki nei jarra Pathian tenna mi ha ka ni Khrista hi kei ranga a nem na a lian tak ha ani jui.

⁹ Hale Puma ama jiang i om ha kein mu na ranga, ama ranga phur rakip ichok ha kein nom ka jet irakip ha thiang mak tia ka lui jui.

¹⁰ Kein ka jet jot tak ko puma ama athi nale a ringkhir na ranak ha kein dui pui suam ma ama a pong anga hale kei om ama anga om rang hi ka dei jui.

¹¹ Kein athi ngai kar tenna ringkhir ha mu thei na rang kani tia ka ngaidon.

Tungna Muntiang Tan

¹² Kei chung suak na ka nei jui, animakle lungdo tung ha ka ni jui kan ti making tak-ha Khrista ning kei ha ina chur na pong lo muna ranga risiat ka tho.

¹³ U le naingai! atun kein ka sat jui ki kan ti nimak, nuk tianga a om phur ha ka mak ka madonna om phur ha muna ranga ri siat ka tho.

¹⁴ Khrista jarra Pathian ning ina pek rang, chung tiang ranga ina kui na, hava tung na mun tiang kein katan.

¹⁵ Hiva jarra! Keini lungdo tung mirakip in hingahin ngaidon rei, ha ni luia nangni ning adang lungdo khat nan nei inko han Pathian ning na ripe nati.

¹⁶ Ha aninom, kan lon na lam han hangan han cheirei.

¹⁷ U le naingai! nang ni rakip in kei ka nunchan chanru keinin nang ni ranga tetan na kan chang anga, ha anga alon mingai ha asat enru.

¹⁸ Mitam lammin an lui che jui, hiva ruia kein nang jiang ka mit tui suak veisom, veisom ki na man chu ani, anmani ko Khrista athi na Khros ha an jot mi mang anni tia nang ni jiang ka na man chu.

¹⁹ Anmani ngaidon ko thina ha ani jui an lungdo ha an Pathian an manchang anmani lianpui na ha ko jak na ha ani; ramuol phur rakip hi anmani lungdo ha ani.

²⁰ keini ko vanram mi ha kan ni, hajak ni luia kan puma Jisu Khrista ham kan ngak lal la kan om.

²¹ A ma vaihom na thuia amang thei rang taksa rakip hi ama taksa anga na man kan thul nati. A ma ranak jarra phur rakip hi ama thoija asiak pet rang ke.