PHILIPI 2 - Rabu Athar New Testament (BSI)

Khrista Duk lut nale A lian na

¹ Hiva jarra Khrista tenna nan om han nangni ha ana man rat jui, ama lungsiat han lung ngam na ana pek jui, nang nin ama le thavanga nan om jui.

² Nang ni lungsiat khat jak nan neia, lung khat jak, thavang khat nan nia, nan lung a kan rual inko ka ningsat na lungdo na man tung peru.

³ A bing rang jak a ngaidon, chong na pal ite khat tho maru, hava rahut a nan lung man rem in lang kei nek a dang mi ning an sat ke tia kan lui ru.

⁴ Nang ni mirakip in a bing rang jak kan en luia a dangngai rang om en rase u.

⁵ Khrista Jisu jiang i om lungdo ha nang ni jiang om om rase:

⁶ Khrista ning Pathian anga a om aninom, Pathian le ka kan ang rip tia ngaidon mak.

⁷ Tak-ha, suak anga a kan luia, miring le a hong kan ang, a lungdo rakip ha ama suaver.

⁸ Hale, Puma nun chan ha miring anga a kan mu, A man khros a thi tung khan na ri a juia, a man duk lut na ha a hong nei.

⁹ Pathian ning chung nung tak ama ha a dom sang jui, ming rakip chung nung ming ha a pek jui.

¹⁰ Hiva jarra, vanram le, ramuol thuaija om rakip in an khup biling nanti,

¹¹ hale, a pa Pathian lianpui na ha Jisu Khrista hi puma ani tia, chong rakip in risuak na nei nanti.

Ramuola Avar Anga Avar

¹² Ka lungsiat u le naingai, nang nin a pha rakip ka chong ri nan jui ang han, ka om mak in om ka om in nom nangni sanring na nan nei ha khel la lungdo tung thei na ranga chit le kan ruaia thoru.

¹³ Hiva jarra nangni sunga Pathian ning lungdo tunga chuan asintor na rang chong jui ha changru.

¹⁴ Nuarle, rang luia chuan rakip ha sinru.

¹⁵ I rakip kei chi keiok buia athiang tak a chuan ha thoru, hiva ramuol chung asat makna ning a sip karra hin chungvan na arsi var anga varru.

¹⁶ Nangni ning ring na chong ha anmani jiang nan ri rang, ha nan tho inko kein nemna buia chuan ha ka sin na aphat ha ki manmang nimak tihi Khrista nikhuo ahong tung pha han ki man kan lian thei narang ani.

¹⁷ O! nangni takngai na ha chuan tho ranga kei ha nan na pek lut inko ka ning asat, hale nangni le kan ruaia ningsat na nei kanti.

¹⁸ Hi ang han nang ni om nan ning man satru, hale kei le kan ruaia nan ning man sat taru.

Timothi le Epaphroditus

¹⁹ Pathian lungdo aninko Timothi hi nang ni jiang arak vatir rang tia ka ngaidon, nan chong nan la ka jet le kei om ningsat na nei kati.

²⁰ Hiva jarra nangni ha asat ina en rang ama ang chat kei midang nei making.

²¹ Mirakip in an bing rang jak an tok, Jisu Khrista rang ko tok ma u.

²² Nang nin ama ha nan jet, nai in apa jiang sepa itho ang han aman kei le kan ruaia chongsat sem ruia chuan ha a tho.

²³ Hiva jarra kei jiang imo asuak rang tia ka jet phak, kein ama ha nang ni jiang hong tir ranga ka ngaidon.

²⁴ Tak-ha kei Ka tak in nom nang ni jiang a rak ka hong rang ke tia puma jiang takngai na ka nei.

²⁵ Kan u kan nai suakpa Epaphroditus hi chuan kan sin suam, ralmi jom kan chang suam, nangni ranga ko chong choi pu, kei ranga a nem na chuan jak isin ama hi nangni jiang hong tha mak jot lui khat a om jui tia ka ngaidon.

²⁶ Ajarko aman nang ni rakip le kan mu rang hi adeia, a lung tam tak alui pong; ama alui nat tihi nang ni innom chong thang nan jet.

²⁷ Adik tak a ama hi thina rang khan alui nat, tak-ha Pathian in ama ha lungsiat alui mu; amajak ni luia kei jom pong khodengthei mu mak na ranga lungsiat ana lui mu.

²⁸ Hiva jarra, nang ni ama ha veikhat nan mu pha han nan ningsat thei na ranga kei ka pong hi om aviar sat thei na rang ama hi kein lung lut tak a kivatir jui ke ani.

²⁹ Hava jarra, ama hi ningsat ningsat puma minga na lei lui peru.

³⁰ Kei ranga nang ni ning nan tho na rakip avat sam na rakip ha puma chuan ruia ama ning a ringkhuo pamu luia athideng khan na chuan sin na alui nei ani.