PHILEMON 1 - Rabu Athar New Testament (BSI)

¹ Jisu Khrista ruia ren inn na om Paul le ulenai Timothi ning kan sap Philemon kan chuan sin puisuam,

² Kan char nu Aphia, keini le ralmi chang puisuam Arkhipa jiang le na inna biakrupngai jiang,

³ Kan pa Pathian le kan puma Jisu Khrista manrit nale lunghip na om rase.

Philemon Lungsiat le Takngai

⁴ Na mi lungsiat nale, puma Jisu Khrista jiang athiang mirakip chunga na takngai na ha ka jet.

⁵ Pathian ka lam na rakip nang rang om ka na ngaidon de jarra kei ning pha rakip a Pathian ha ka manpak.

⁶ Ti ko keini jiang asat om rakip ha a thianga kan jet, hivahi nang na takngai na chunga a khel la Khrista tianga ara nei na ranga ani.

⁷ Ajarko na lungsiat jarra kei ning a tam tak a ning satna lung mathok na ka mu, U le nai na manrit, nang jarra a thiang mingai lung ha an ning na man sat pe.

Onesimas Ranga lam na

⁸ Nang in asat chuan hi na tho torna rang, Kein cham na pek na rang, Khrista jarra atam tak ranak ka nei ani nom,

⁹ hiva rahut lungsiat jarra Ulian khat kani nom Khrista tianga ren inn na om Paul kei ning nang jiang lam na ka na nei.

¹⁰ Kei ning ren inn sunga ki nei ka nai Onesimas ruia nang jiang ri na ka na nei.

¹¹ A ma ko a rapa lai nang jiang nem na bui alui ni, tak-ha atun ko nang le kei ranga nem na om a hong chang jui.

¹² A ma hi kei ka thavang tak anga ani, nang jiang ka hong man kan le khir ani.

¹³ A ma hi nang na rahut chongsat ruia, kei jiang chuan sin suam na rang ka lui siak jot.

¹⁴ Tak-ha, nang in ama chunga lungsiat thei ha tho mak jot luia tho ha niluia lungsiat a tho ha nina rang, nangin najot lui ha kei ning ite lui tho jot making.

¹⁵ Ajarko, nang in ama hi kum sot ranga na mu ha ani na rang, hava jarra a man a pha bongkhat nangtena ana lui kan sen pui luini a jot.

¹⁶ Atunko a man suak anga ni luia suak khel la ulenai ang chat, kei ranga ko ka sap, tak-ha nang ranga ko, taksa tiang om puma tiang om iduk a khel la sap sat mo!

¹⁷ Hale nang in kei hi na sap chang puisuam tia na na lui inko, kei nina don anga ama ham na lui donpero.

¹⁸ A man nang jiang ama sial nale nei nun sampar atualna alui om inko, kei ka chunga na manchul pero.

¹⁹ “Paul kei ning hivahi ka kut tak a ka jiak ani” kei ning na male khier kati, tiko na tak khet in nom kei jiang tual lai ma che tina ani.

²⁰ O, Ka sap! Puma jarra nang tenna san thei na hi ka na lam, Khrista ruia kei ka lung hi na man khop pero.

²¹ Na chong ri hi angai lui ha ka jet kei ning nang jiang ka hong jiak ani. Kei ning ki na ri nek a nang in a khel la ni na tho pe rang ke tia ka ngaidon.

²² Hale kei tung na rang mun nom na lui var peru, nang ni ning nan na lam pe inko kei hi nang ni jiang vei khat la hong kir ret kati, tihi ka ngaidon.

A torna Chong

²³ Jisu Khrista ruia kei le ren inn na om suam Epapharas ning nang ha chubei ana hong pek.

²⁴ Hale kei le Chuan sin suam Mark, Aristarkhas le Demas, Luk anmani ning om chubei an na hong na pek.

²⁵ Puma Jisu Khrista manrit na ning nan chunga na om pui rase.