MATHIU 9 - Rabu Athar New Testament (BSI)

Akethisa Khat Jisun A mandamna

¹ Jisun rokuang khat a chuanga akanna ama akhua han a hong kir jui.

² han enru, mingain a pang her khat athia a nat mi khat ha a jalna le ama jiang an hong tuang, hale Jisun anmani takngai na ha a mu a, a pang her khat thi jiang a ti, “Ka naijo, na lung manngamro; na siatna lim ha ka na ngaidam jui.”

³ Hava lai tak han dan oja aviar in anmani masia an hong kan ti; “Hiva mi hi ning Pathian a nuisojui.”

⁴ Tak-ha Jisun anmani an ngaidon ha a jet a hong ti; “Iruija mo nan lung sunga asat mak nan ngaidon?”

⁵ Ajarko, na siatna rakip ka na ngaidam jui, animakle thui innang lonro tihi, holam mo abeidet?

⁶ Tak-ha nang nin, Mi Pasalnai ha ramuol la siatna hi ngaidam na ranak a nei tihi nan jet na rang, hava han a man a pang her khat thi jiang, “Thuiro, na jalna lui nang, na inna chetaro a ti.”

⁷ Hale a man a thuia, a inna a che jui.

⁸ Hava hanna mitamin an mu pha, an ngak ban, hale miring jiang hi ang rarak a pek; Pathian ha an manpak jui.

Jisun Mathiu A kui na

⁹ Hava suale Jisun hava mun tenna a che pha, Mathiu anti pasal khat khasana pek na mun na alui ong a mu a; a man ama jiang a ti, “Kei na juiro,” hale a man a thuia ama a nuk alui jui.

¹⁰ Hale hingahin alui ni, Jisun inn sunga a onga; enru, khasana chomngai, siat nei ngai, hale a thiamruoingai le an lui ongsuam.

¹¹ Hale pharisingain hava an mu han, anmanin a thiamruoingai jiang anti; “Iruija mo nan oja ning khasana chomngai le siat nei ngai le a chak a nek suam?”

¹² Tak-ha Jisun hava a jet, a man anmani jiang a ti, “A damngai rang ko thiampu nem na om ma tak-ha anatngai rang ko thiampu nemna a om.”

¹³ Tak-ha che u nang hivahi itenna mo vakan chubakru; “Kein manritthei ha ka dei, hale phurkat ha dei making,” ajarko midikngai kuirang ka hong nimak tak-ha siatneingai lung thul na ranga ka hong ani.

Bungei Ruia Dingkelna

¹⁴ Hava suale Johon a thiamruoingain ama jiang an honga anti keini le pharisingainko bu kanngei chak; tak-ha na thiamruoingaiko bungei ma u.

¹⁵ Hale Jisun anmani jiang a hong ti; “Muipa ning a shapngai le an om kar je; anmanin chajang siarna mo an nei? Tak-ha hi ang nikhuo la hong nati, anmani kar tenna muipa ha latuang nanti; hava suale anmanin bungei nanti.”

¹⁶ “Tu innom puan lui chunga puan thar suidengai ma u, ajarko, an suide puan her ha ning a kei therdea; a khel la chet denati,

¹⁷ mingain darkha tuithar ha savunlui puankok thun ma u, savun ha achet darkha tui abuak, hale savun puan kok ha a mang, tak-ha darkha tui thar ha savun puankok tharra an thun hale an ninia an manruitor.”

Chuan Lam kai Ulian Naitenu Le Jisu Puansit Numei

¹⁸ A man hiva rakip hi anmani jiang a tilai han enru, vai hom ulian khat ning a honga ama ha chubei a buk a, “Atuntak han ka nai, numeinai ha a thi jui, tak-ha hong innang a chunga na kut na siak pero, hale ama ringkhir nati,” a hong ti.

¹⁹ Hava han Jisun a thuia a manuk a hong jui, hale ama a thiamruoingai innom an lui jui.

²⁰ Hale jet lui thai luia kumsomleini thi a charra a nat numei an khat in a nuk tiang a honga; ama a puan mor ha a vasit.

²¹ Ajarko a thei jak alui kan ti. “Kein ama puan si ka sit jak, ka sit inko, ka dam rang ke.”

²² Tak-ha Jisun a kan hei a, numeinu ha a luimu a a ti; aleijo naning mansat taro na takngai na han na dam jui, hava pha tak han numeinu ha a dam jui.

²³ Hale Jisun vai hom ulian inna a hong pha, theili tumngai le mi rasa tam ha a mu a,

²⁴ anmani jiang alui ti; kanthitru, ajarko naitenu hi thimak; a jalke anmanin Puma ha ma ha esella an lui nuiso.

²⁵ Tak-ha mitamngai ha an man suak verra; Puma ha inn sunga a lut naitenu a kut a o han naitenu ha a ringkhir jui

²⁶ Hale hiva chuan tho ruihi ram rakip a tung jui.

Pasal Mitdel Anni Jisun A mandam

²⁷ Hava mun ha Jisun a mak a che pha han, mitdel pasal annin an juija, an khek a “David a pasalnai, keini na lungsiatro,” an hong ti.

²⁸ Hale Jisun inkhat a lut pha han, mitdel pasalngai om ama jiang an lui honga, han Jisun anmani jiang a ti, “Nang nin hivahi kein ka tho tor tihi tak mo nanngai?” Anmanin ama jiang anti, Puma tak kan ngai.

²⁹ Hava han, Jisun an mit a sitpea a ti; “Nan takngai na nuk jui a nan chunga damna ni rase.”

³⁰ Han an mit ha a var jui, hale Jisun anmani ha chongngar tak a chong abea, “Mi khat jak om manjet maru,” a ti.

³¹ Tak-ha anmanin hava mun tenna an chea, ama ruia ram rakip hin chong an lui semjui.

Jisun Chongsuak Lui Pasal A mandamna

³² Anmanin an che lai, enru, seitan in a choi a chongsuaklui pasal khat ama jiang an lui hong tuang.

³³ Hale seitan ha a notchei pha han, a chongsuaklui ha a hong suak jui; han mitam an ngak chian na “Israel sunga hiva anghi la mu chil masing,” an hong ti.

³⁴ Tak-ha pharisingain anti, “A man seitan ranak a seitan hi a notchei an lui ti.”

Miringai Jisun Lungsiat A mu na

³⁵ Hale Jisun khuo khat a chea, Sainagok sunga a manchu, “Rengram chongsat ruia, hale ritong le a nat rakipngai ha alui mandam.”

³⁶ Tak-ha Jisun mitamngai ha a mu pha, anmani ha lungsiat a mu jui, ajarko, anmani ha a rungrang bui; an kansenkhui, belramngai anga an lui ni.

³⁷ han, a man a thiamruoingai jiang a ti, “Chang, at rang a tam, tak-ha a at rang miko an tom.”

³⁸ Hiva jarra, “Puma a chang rasik ranga a neipu ama jiang lamru, a man chuan sin ranga na juangtir pe nati.”