MATHIU 7 - Rabu Athar New Testament (BSI)

Midang Jiang Chongtan

¹ “Chongtan maru, han nang ni om chong natan noni u.

² Ajarko nang nin chong nan tan na nuk jui a, nang ni om chongtan na na nei nanti; hale nagnin dan en na nan nei nuk jui a nang ni ham dan na en nanti.

³ Hale iruija mo na u, nanaingai mit ekchok om ha na en, na mit ek om ha ngaidon lui a.

⁴ Animakle ija mo na u na nai jiang na mit chok ha na peiperong na tirang; hale enro, nang om na mit a chok a om.

⁵ A sat kan rol nang in a rapa na mit chok ha peibakro; hava suale nang in na u nanaingai mit ekchok om ha a thianga mu nati.

⁶ A thiang ha uingai jiang pek maru, hale vok mai kunga nan lung man tam ha deng juan maru; ajarko tu ning mo anjettor anmanin sirnanta nang ni lam ke na sether nanti.

Lamru, Tokru, Kilru

⁷ “Lamru nang ni jiang na pek nati, tokru mu nanti; inn khar kilru nang ni na long nati.

⁸ Ajarko a lamngai jiang an pek, a tokngai ning an mu; hale inn khar a kilngai jiang longpe nati.

⁹ Animakle nan karra tu in mo a nai ning bu a lam le lungtum mo a pek rang?

¹⁰ Hale nga a lam le rul mo a pek rang?

¹¹ Nang ni mi sa mak nang ni chunga, nan nai jiang kutchoisat pek na nan jet inko; vanram ma om nan Pa ama ningko a lamngai jiang a khel la asat phur mo penoning?

¹² “Hiva jarra, mi ning nang jiang na man tho jot ha nang in om thoro anmani jiang, ajarko hivahi danthei le Pathian tashantheingai chong ke ani.

Lamsin

¹³ “Kot a sin han lutru, ajarko kotlianna a lut mi antam ani; hava han mang na rang ani, hale hava han a lut antam.

¹⁴ Ajarko ring na kot ko a sin, ringna lam ko akandeng; hale hava han alutko an tom.

Thingkung Le Ara

¹⁵ “Tashanthei kanlemngai tenna kan ning theiru, belram vun ansia an hong, tak-ha an lung sungako sa kei an chang.

¹⁶ Nang nin anmani an ram nan jet rang ke, mi ning darkha hi lingkunga, hale thei chang hi ling karra mo an khomngai?

¹⁷ Hingahin thingkungsat in asat a ra, tak-ha a satlui thingkungin a salui a ra.

¹⁸ A sat thingkungin a salui ramak, animakle a satlui thingkungin asat ratorma.

¹⁹ Arasat nei lui thing kung rakip ha an tanna mei khur sunga an deng juan.

²⁰ Hiva jarra nang nin anmani an ra nuk jui a jet nanti.

Nang ha Na jet Chilmaking

²¹ “Tu aninom kei jiang Puma Puma, a ti mirakip ning vanrengram lut noni u; tak-ha vanram ma ka Pa lungdo a tho rakip ning lut nanti.

²² Hava ni han mitam in kei jiang tinanti, Puma, Puma, kein in na minga nuk a a suak rang kan lui ri mo nimak na minga seitan luinotchei mashing mo? Hale na minga a ngak pa chuan tam tak mo lui tho mashing?

²³ Hava pha han kein anmani jiang tirang ka ni, kein nang ni ha na lui jet chilmaking; kei jiang tenna che taru, nang ni tho salui tho ngai.

Inn sin Anni

²⁴ “Hiva jarra tu aninom, ka chong ri a ngai a a tho inko; lung chunga inn sin mi ching khat anga luikati.

²⁵ Hale rua a tho, phaivou lian, a rang innom; inn ha lung chunga a sin ani jarra suk khiaktor noning.

²⁶ Atunko tu aninom, ka chong ri a jet a atholui mi ha; siatdi chunga inn sin mi an khat anga ni nati.

²⁷ Han rua a hong tho, tui a lian phaivou a hong ranga, inn ha a hong sukjui, hale a kiak ver jui.

Jisu Tornacham

²⁸ Hale hingahin aluini, Jisun a chong ri a tor pha han; mitamin ama man chuna ha an luingak jui.

²⁹ Ajarko a man chuna ha ranaknei mi khat anga aluini, han anmani dan ojangai anga lui nimak.