MATHIU 5 - Rabu Athar New Testament (BSI)

Tang Bunga Chong ri

¹ Mitam ha a mu a tangbung a kalla a ong jui, han a kol la a thiamruoingai an lui hong.

² Hale a man chu a phut a hingahin a ri.

Adik Huina

³ “Thavang a a riangai ha ravansat anni; ajarko vanrengram ha an manita ani!

⁴ Achapngai ravansat anni; ajarko Pathian ning anmani ha hui na pek nati!

⁵ Lungnem mingai ha ravansat anni; ajarko simlei hi anta ranga ani.

⁶ Pathian ning a dei a tho ngai ha ravansat anni; Pathian ning an lungdo a mantungpe rang ke!

⁷ Mi lungsiattheingai ha ravansat anni; Pathian ning an chunga lungsiat mu nati!

⁸ Lungthiang mingai ha ravansat anni; ajarko Pathian an la mu rang ke!

⁹ Lunghip kan chamna ranga avarngai ha ravansat anni; ajarko Pathian naingai ninanti!

¹⁰ Adik chuan tho jarra khodengtheingai ha ravansat anni; ajarko vanrengram ha an manita ani!

¹¹ “Kei ruia mingai in an naran, khodengthei jak na, hale non tak nan chunga chong tam tak an narisiat ha ravansat nan ni, nang ni ha kei ka nuk jui nan ni.

¹² Ningsatru, a khel la manhuiru; ajarko vanram ma a lian tak nan tum rang a om, hingahin nan madonna Pathian tashantheingai om an luimanpong ani.

Machi le Avar

¹³ “Nang ni ramuol la machi nan ni, tak-ha machi alha a om mak inko, ija mo alha an sintor rang? Anemna i te omlaimak, anpeija miringngai kesirna an manchangrang ani,

¹⁴ “Nang ni ramuol la var nan ni, tangbung chunga khopui ha thup jotma.

¹⁵ Hale tu innom thaomei ansitle luk sunga khum demau, tak-ha thaomei a ong na chunga ansiak inn sunga a om rakip ranga var ha ani.

¹⁶ Ha ang han nan var ha mingai mai kunga var rase, hale nan chuan sat tho ha an mu a, vanram ma nan Pa ha manpak na rang ani.

Dan Ruia Manchuna

¹⁷ “Kein dan le tashantheingai chong ri a manmang ranga a hongke tia ngaidon maru, dan manmang ranga ka hong nimak, tak-ha man tung na rang ka hong ani.

¹⁸ han kein chogtakballa ka na ripe ani, vanram le ramuol a mang maje, dan chong pek ha lungdo a tung maje aramal a sin tet jiakdet khat om mang noning.

¹⁹ Tu aninom hiva chongpekngai hi a sin khat avekhuia, hale midang om man jui mak na rang a man chu inko, vanrengram ma ama ha a sin tak ani rang ke, tak-ha tu aninom a jui a, midang ham a man chu inko vanrengram ma ama ha a lian tak anti rang ke.

²⁰ han kein a thianga ka na ti, danthei le pharisingai mi dik anni ha, nang nin kheldet mi dik nan changtormak aninko vanrengram ma lut noni che u.

Lung Thak Ruia Manchuna

²¹ “Nang mi that maro, tu aninom mi that ha chongtan na pha han khodengthei nati,” tia ulianngai jiang an lui ri ha nan jet jui.

²² Tak-ha kein ka na ti, tu aninom a u a nai jiang arui a jar buia lung thak na a nei inko, chongtan na han khodengthei na mu nati, tu aninom a u a nai jiang nem na bui le shatnabui tia akok aninko ama ha ulianrup kan chun na mai kung a khodengthei mu nati, tak-ha tu aninom a u a nai jiang mi am, mivet, nem na bui a tinko mei khurra khodengthei na mu nati.

²³ Han nang nin Pathian jiang kutchoiphur pek rang nan hong choi pha han, na u na nai khat in na chunga lunghuiluina ana ngaidon inko,

²⁴ Pek na mun han na kutchoi ha mak in lang na u na nai le hongkanchamna bakru, ha suale na kutchoi ha hong pero.

²⁵ Na kansualpui mi ha lam ma nakantong lai tak, a rak a kanchamna puiro, animak inko chongtanpu jiang na pelut a jot, chongtanpun ren innngak ulian jiang na pek nati, han nang ha ren inna nathun nati.

²⁶ Adik tak nang jiang ka na ripe ani na sakrang peisha ha nasak suamak kar je, nang in hava mun tenna suak tor noni che.

Ompui Salui Ruia Manchuna

²⁷ “Nang in mi numei ompuijot noning”, tia ulianngai jiang an lui ti chong ha nan jet jui.

²⁸ Tak-ha kein nang ni jiang kati, tu aninom ani lui lungdo a numei khat a en inko a lung ril la a ompuijui ani.

²⁹ Hiva jarra na chang tianga na mit in siatna ana masul rang aninko, kel in lang peiro; ajarko na tak renga mei khurra ana masul rang nek inko her khat buia na om lam nang rang asat ani,

³⁰ na kut changtiangin siatna ana masul rang aninko, tan in lang peiro, ajarko na tak renga mei khurra ana masul rang nek inko, na tak her khat builam nang rang asat ani.

Kansen Ruia Manchuna

³¹ Hingahin an lui ti, “Tu aninom a numei akansenpui inko, kansenpuina rabu khat pe rase”.

³² Tak-ha kein nang ni jiang kati, tu aninom ani lui omchan chuan tho ni luia kansenpuisa numei omchan saluinu chang rang ani, hale mi ning an kansenpuisa numei ha aneiret inko, tu aninom om pui salui chuan tho mi ani jui.

Chongsan Ruia Manchuna

³³ Veikhatret man lai ulianngai jiang an lui ri ha nan jet jui, “Na chong birip sukkhui maro hale na chongsan ha Puma lungdo mantungro”.

³⁴ Tak-ha kein nang ni jiang kati ani, “An chongsan karra vanram na jetrase tia kansham maru, ajarko Pathian ong na munke”.

³⁵ Animakle simlei palla chongsan maru, ajarko puma kesir na ke, Jerusalem minga om chongsan maru, ajarko reng lian khopui khat ke ani.

³⁶ Hale nan lu themma chongsan maru, ajarko nang nin nan sam malkhat om manngui rang manvom rang nan tor nimak.

³⁷ Nan chong ri ha “o, nan tile o, tiru; ai nan tile ai tiru; hiva khel la ha ko ashamak an khat a hong suak ani”.

Phuksak Ruia Manchuna

³⁸ “Mit khat rahut a mit khat, ha khat rahut a ha khat”, an lui ti ha nang nin nan jet jui.

³⁹ Tak-ha kein nang ni jiang kati a sa mak tho mi ha khap maru. Tu aninom na ngemtang chang tiang ana ben inko veitiang om dopero.

⁴⁰ Miring khat in nang ha ana enlalla na kuntai aluijot inko, na puanshi ham pedero.

⁴¹ Mi an khat in ana namchantit a kilometar khat che rei a ti inko ama le kilometar anni chepuiro.

⁴² Ana lam mi ha pero, tu ang khat in nang jiang apukjot inko kan hei demaro.

Ana Enda Lungsiatro

⁴³ “Na inn ri na inn tang ha lungsiatro, hale ana enda ha matirro” an lui ti nang nin nan jet jui,

⁴⁴ tak-ha nang ni jiang kati, ana en dangai ha lungsiatru, khuo ana khongngai ha phuol pero, ana matirngai jiang asat ha thoro, esella ana tho hale khodengthei ana pekngai rang lampero.

⁴⁵ Han vanram ma om nan pa a naingai nan chang na rang ani, ajarko a man a saluingai le asatngai rang om ni a man sat hale mi dik le midiklui rang om ruo a man thosuom.

⁴⁶ Ajarko nang ni ana lungsiatngai jak ha nan lungsiat inko nan tum rang ha imo a om? Khasana chomngai innom hanga an tho nimak mo?

⁴⁷ Hale nan u nan nai jak ha chubei nanbuk inko a dangngai nek nang nin khel la imo nan tho jui khasana chompan nom an tho mo nimak?

⁴⁸ Hava jarra vanram ma nan pa lungdo a tung anga nang ni om lungdo tung ha changru.