MATHIU 3 - Rabu Athar New Testament (BSI)

Johon Baptis Chongri

¹ Hava phat han Judia ramtong lian na Johon Baptis ning chong a hong semma a hong.

² “Nan lungthulru, ajarko, vanrengram ha a hong nai jui,”

³ Johon ha alui ni, Pathian tashanthei Isaia in alui ri ha: “Ramtong lian na mi khat khek rasa, Puma lam ha sinru, a lon na rang lam man tunru.”

⁴ Johon in saringsei mul puan a luisi, a kongvonrui savun alui ni, hale a chak a nek om khai le khoining alui chak.

⁵ Hava phat han, Jerusalem, Judia ram sunga om rakip; hale Jordon sirpanga a om mirakip in Johon jiang an lui che.

⁶ An siatna ha an ri la, Jordon tuidunga ama ning baptais a man tho.

⁷ Pharisi le Sadusingain, ama jiang tuija baptais tho ranga an hong a mu han a hong ti, “Rul ang mi lungsaluingai, Pathian lung thak na a juang tung rang pha han, tu ning mo tanru tia ana manjet?

⁸ Nanlungthul ha mu thei na rang a ra manneiru.

⁹ An khat om, keini kan pa Abraham kan nei tia kan ngaidon maru, ajarko, Pathian in hiva lungai tenna an phut Abraham a naingai a man suak tor tihi ka na ripe ani.

¹⁰ Thingkungngai ha a rajung tan na rang rei sin na a om, arasat nei lui thing kung rakip tanverra meisunga deng juan rang ani.

¹¹ Nanlungthul ha jet na rang kein tuija baptais ka na man tho tak-ha, kanuk a ahong pako a lian ranaknei ani, kein a kekok choi rang tenna rahui nei making. A ma ningko, nang ni ha Thavang Thiang le meija baptais namantho nati.

¹² A ma yangjap a kut a lek, a chang rasik na mun asat man thiang nati, han chang ha innte sunga thun nati, tak-ha ashi avai ha ko, athitibui mei khur sunga deng juan nati.”

Jisu Baptais tho na

¹³ Hava phat han Galili tenna Jisu ning Jordon tuidunga Johon ning baptais man tho na rang alui hong.

¹⁴ Tak-ha Johon ning luijotmak hingahin alui ti, “Keilam hi nang in baptais na na man tho rang a suak, ija mo kei jiang lam na hong ani?”

¹⁵ Tak-ha Jisun ama jiang a ti, “Atunko na jot pediro, hingahin dik na rakip kein in lungdo kan man tung rang a suak, han Johon ning a jot jui.”

¹⁶ Jisu ning baptais alui tho jui, hale tuisung tenna a hong suak lai han enru, vanram a kan longa, Pathian Thavang Thiang in vatuk turun anga a hong chumma a chunga a chuang ha Johon in alui mu.

¹⁷ han, jet lui thailuija vanram tianga rasha khat ning a hong ti; “A ma hi ka lungsiattak ka pasalnai ani, ama jiang ka lungdo a tung.”