MATHIU 25 - Rabu Athar New Testament (BSI)

Dongma Som Tetan na

¹ Hale vanrengram ko anmani thangmei anlek, muipa le kan mu na rang an hong suak dongma somngai anga ani.

² Anmani ranga a ching an lui ni, hale a dang ranga ko a am an lui ni.

³ A am ngaiha anthaimei anlek, hale thaitui ko lui choi de ma u.

⁴ Tak-ha a chingngai ko thangmei le kan ruaia thaotui ham an lui choi de.

⁵ Tak-ha muipa ha ning ahongsot karra, anmani an renga imu an vuanga, an lui jal.

⁶ Hale Janthangriaija an hong khek, enru muipa a hong jui, ama le kan muranga vasuak taru.

⁷ Hava han dong ma ngai han an thuia anthaimei ansidjui.

⁸ Hale a am ngain a chingngai jiang han “Nasanru thaimeitui keini jiang a lek na peru; ajarko kan thaimei hi a thi jui” an hong ti.

⁹ Tak-ha a chingngain an hong sanga anti, “keini le nang ni rang ko hunmak a jot; tak-ha nang nin a juarngai jiang che u nang nang ni rang hongchokru.”

¹⁰ Hale anmanin hongchok ranga an che kar han, muipa alui hong jui; hale an lui kan ning anmanin, ama le an kanruoia mui ruoi na han an lut jui; hale kot ha an kharjui.

¹¹ Hava suale a dang dongmangain an honga anti, “Puma, puma, keini na longro.”

¹² Tak-ha a man an hong shanga a ti, kein nang ni jiang a thianga kati; “Kein nang ni ha na jet making.”

¹³ Hiva jarra kan ning theiru, ajarko Mi Pasalnai ning a hong rang nikhuo le a pha nang nin jet tor ma che u.

Suak An thum Tetan na

¹⁴ Ajarko vanrengram ha ko, miring khat ning ram lak khat a che tiang, ama a suakngai ha akuia, ama aneinun rakip ha anmani jiang angamna mi khat anga.

¹⁵ Hale a man an khat jiang talent ranga, a dang khat jiang anni hale a dang khat jiang om an khat anmani an tor nadan nuk jui a apek ha, hale khuolla a che lenjui.

¹⁶ Han talent ranga tumpa ha ning a chea, lal a va uol na jui; hale a dang talent ranga a hong man tuang jui.

¹⁷ Hi ang hin talent anni tumpanom a dang anni a hong man tuang jui.

¹⁸ Tak-ha talent an khat tumpaning a chea simlei achuia aphuma peisa ahongthupjui.

¹⁹ A pha sot tak suole, suakngai anpuma ahongkanlea, hale anmani an lui tho lim ha a en man thiang pui jui.

²⁰ Hale talent ranga tumpan a honga, a dang talent rang om a hong choi dea a ti; puma, nang in kei jiang talent ranga na nalui pek; enro, anmani ni luia kein talent ranga ka lui man tuang dejui.

²¹ Apuman ama jiang a tam a satjui; takngai jot le asat suak, nang ko phur atomtet han nom takngai rang na om jarra, kein nang ha phurtam tak en na kan na man nei rang ke, na Puma ningsat na sunga hong lut taro a ti.

²² Talent anni tumpa om a honga a ti, Puma, nang in kei jiang talent anni na nalui pek; enro, anmani ni luia kein talent anni ka lui man tuang dejui.

²³ Puman ama jiang a hong ti, a tam asajui; takngai jot le asat suak, nang ko phur aviar jak han nom, takngai a om jarra, kein nang ha phur tam tak en ranga na be rang ka ni; na Puma ningsat na han lut taro.

²⁴ Hale talent an khat tumpa nom a hong ti, puma, nang in na vor lui na han na at; hale a ru na the chei mak na han na manchun, mirat ke tia kein ka na lui jet,

²⁵ hale kein ka na lui chit, ka che ana talent ha simlei sunga ka lui thup; enro, niluinei nangta ha hi ani.

²⁶ Tak-ha puman a hong shanga ama jiang a ti, a satlui le a tha siat suak, kein ka vor lui na han kein ka at, hale ka thechei mak na han kein ka manchun tihi nang ko ni lui jet mo ani.

²⁷ Hiva jarra nang in ka peisha, peisa lal uolngai jiang ni lui pe rang ani, hale kein ka hong han keita rakip ha athuoi le vei khat ka lui mu khir rang ani,

²⁸ Hiva jarra ama jiang a om talent ha lui innang talent som neipa jiang peru.

²⁹ Ajarko a nei mirakip jiang, khel la pe de nanti, hale a man a tam tak nei nati, tak-ha a nei lui ama ha, alui neirakip ama jiang tenna lui khir nanti.

³⁰ Hale nem na rangbui suak ha, tualla a jing kar han dengjuanru; hava han chap le harialna mun ni nati.

A torna Chongtan

³¹ Mi Pasalnai naining ama mahok nale, thaneithiang rakip le an hong pha han, ama lian ong na chunga ongrang ani.

³² Jat rakipngai ha ama madona manchun nanti, belramsel pan kel ngai tenna a belram ha akhuisen anga a man anmani ha an khat tenna an khat khuisen nati.

³³ Hale a man belramngai ha a chang tiang tetnati tak-ha kel ngai lam ko a vei tiang,

³⁴ hava han reng ning a chang tianga a om anmani jiang hong ti nati, hongru, ka pa phuol mungai nang ni, ramuol hong phut lai tenna nang ni ranga an lui varsha rengram ha tum taru.

³⁵ Ajarko kein ka von a cham lai han bu nan na pek kein khuol mi ka ni lai han nang nin nan na lui don.

³⁶ Kein puon le diar ka lui nei mak lai han kei jiang puon nan na pek, kein ka nat lai han nang nin nan naluiphak kein ren inna ka om lai han nang nin kei jiang nan lui hong.

³⁷ Hava han midikngain an hong shanga anti, puma nang in na von a cham lai han kein in i tik lai mo kan na mu a kan naluivai? Animakle natui aral lai han kan na lui man in mo?

³⁸ Nang in khuol mi nachanga i tik lai mo, kan namua kein in kan na luidonna, animakle puan le diar na nei maklai puan mo kan na lui pek?

³⁹ Hale nang in na natlai animakle ren inna na oma kein in kan namua i tik lai mo nang jiang kan lui hong?

⁴⁰ Hale rengin anmani jiang hong shangnata tinanti kein a thianga nang ni jiang ka ri ani kei ka u ka nai karra a shintak khat ten nom nang nin hi ang hin nan na lui tho pe na ha, nang nin hava han kei jiang nan inathoke ani.

⁴¹ Hava han a man aveitianga a omngai jiang hong ti nati, kho khong na tungngai kei jiang tenna che u nang seitan le ama thaneithiangngai ranga an lui varsha athitibuimei khurra che taru.

⁴² Ajarko ka von achamlai nang nin bu na pe ma che u, hale kein katui arallai nang nin in ranga na pe ma che u.

⁴³ Kein khuol mi kani lai nang nin na lui don ma che u, puan buia ka om lai han nang nin puan na pe ma che u, hale ka nat ren inn ka om lai nang nin na lui hong phak ma che u.

⁴⁴ Hava han anmanin nom ama jiang hong sang nan ta tinanti, “Puma, nang in na von achamlai, natui arallai, khuol mi nanilai, puan buia, na nat, ren inn na om lai han i tik lai mo kein in kan na mu a nasepa kan lui tho lui?

⁴⁵ Hava han a man anmani jiang hong shangnata ti nati, kein a thianga nang ni jiang kari ani, hiva karra a sin tak an khat jiang nang nin hi ang khan nan lui tho lui na ha nang nin hava han kei jiang nan lui tho lui ke,

⁴⁶ Hale hiva rakipngai hi amongtibui tanti tho na mun han che nanti, tak-ha midikngai ning amongtibui ring na han che nanti.”