MATHIU 24 - Rabu Athar New Testament (BSI)

Jisun biakinn Mang rang ha A ri

¹ Jisun biakinn tenna a suak a che lai han, a thiamruoingain Biakinn ha ama jiang do ranga an lui hong.

² Hale Jisun anmani jiang a hong ti, nang nin hiva rakipngai hi mu ma che u mo? Kein nang ni jiang a thiang tak kati ani, hivahin lung an khat in an khat chunga dekhuiluia mak lai noni u.

Khodengthei Le Pongna

³ Atun a man olib tangbunga a onglai, a thiamruoingain rukchian na ama jiang an honga anti; hiva rakip hi i tik mo a hong suak rang na ri pero? Hale nang in na hong rang le ramuol torna rang pha jet na ija mo ani rang?

⁴ Hale Jisun anmani jiang a hong sanga a ti, tu innom nang ni ha a le lam tiang an na ruoi mak na rang kan ning theiru.

⁵ Ajarko a tam lam ning kei ka minga hong nan ta, ti nanti u, “Kei Khrista ka ni,” hale a tam lam a le lam tianga na ruoi nanti.

⁶ Hale nang nin ral le ral tho chongjet nanti, enru, nang nin nan ning man dong maru; ajarko hiva rakipngai hi a suak rang ke, tak-ha a torna ko la nimak.

⁷ Ajarko jat khat le jat khat chunga, hale rengram khat le rengram khat chunga hong kansuol nanti, hale mun dang danga bu om lui, natsat, le ning nu kan nik suak nati.

⁸ Hiva rakip hi pong khodengthei phutna ani.

⁹ Hava han anmanin nang ni ha pong khodengthei na penanti hale nathat nanti, hale jat rakip in ka ming jarra nang ni ha na matir nanti.

¹⁰ Hale hava han a tam lamin kutsuikesui nei nanti, hale khat le khat hong kan enda nanti, hale khat le khat hong kan matir nanti.

¹¹ Han tashanthei nunchantho tam tak hong suok nanti a tam, lam a le lam tiang ruoi nanti.

¹² Hale ajarko, dan chong jui lui ning a hong tam jarra, mi atammin kan lungsiat hong om noning

¹³ Tak-ha a tor nakhanna duitor ama ha shanring nati,

¹⁴ hale rengram chongsat hi, jat rakip jiang shakhi chang na ranga ramuol pumpuia ri nanti; hale hava han a torna hong ni nati.

A pha Hong satlui

¹⁵ Hava jarra tashanthei Daniel in alui ri chong mi khodengthei nale matir om na mun ha a thiang an ngir nan mu rang, tu aninom a pa a man jetrase.

¹⁶ Hava han Judia a om anmanin tangbunga tan rase u.

¹⁷ Innchunga a om a man inn sunga phur lui na rang hong chum ma rase.

¹⁸ Hale lui a a om a man a puanshi lui ranga vakir ma rase.

¹⁹ Tak-ha chungrik om le naite neingai rang ko, hava ni khuongai han pong khodengthei ni nati.

²⁰ Hale nang ni nan tan ha phabi animakle sernikhuo sunga animak na rang pathian jiang lamru.

²¹ Ajarko hava han ramuol a phut lai tenna a tor khanom lasuak lui, hale i tik aninom suaklai lui rang a lian tak pong khodengthei na ha ni nati.

²² Hale hava ni khuongai ha manbong niluiako, takshanei rakip shanring tor noni u; tak-ha athangshuoksa ngai rang ko ni khuongai ha manbong pe nanti.

²³ Hava han tu ang khat in enru; hivahin animakle handing Khrista a om a ti inko; nang nin hava ha takngai maru.

²⁴ Ajarko Khrista mel pu a tashanthei kanlem hong suak nanti, hale anithei inko thang suaksa tenna a le lam tiang ruoi na rang jet na a lian tatak le a ngak a ngak pa do nanti u.

²⁵ Enru, kein nang ni jiang a rapa ka na ripe jui.

²⁶ Hiva jarra anmanin nang ni jiang, enru, ama ha ramtonglian na a om; anti inko hongche maru; hale enru, ama ha in a sunga a om antinom, takngai maru.

²⁷ Ajarko ni sua tianga kolkanlet ha taitaktiang a el anga, Mi Pasalnai a hong rang ham hava anga ni nati.

²⁸ Ajarko athisha tak ruang om na han langkia ngai han kan chun nanti.

Mi Pasalnai Hongna

²⁹ Pong khodengthei ni khuongai ha a tor lenle, Simnin jing nati, hale sortha om avarpek noning, arshingain vanram tenna vachul nanti, hale vanram ranak ha kan nik nati.

³⁰ Hava han vanram ma Mi Pasalnai jet na ha mu nanti, hale hava han Simlei chunga jat rakip in limkansirra an rop bennanti, hale ranak le ma hok lian tak Mi Pasalnai ning vanram ma chunga a hong ha anmanin mu nanti.

³¹ Hale a man ama vantirngai ha, pengkul rasa ring tak le hong kan tir nati, hale anmanin ama rang an thang suoksa ngaiha vanram amongna an khat tenna a dang khat tenna aki manli rakip manchun nanti.

Theichang Kung Tenna Jetna

³² Hiva thei chang kung tenna kan chuna neiru a chang ha ning ahongnuia ana a hong nei pha han nang nin kholum a hong nai jui tihi nan jet.

³³ Ha ang han nang nin hiva rakip hi nan mu pha han inn kot kunga a hong nai jui tia nang nin jetru.

³⁴ Kein nang ni jiang a thianga kari ani, hiva rakipngai hi lungdo a tung maje hiva miruol hi lator noning.

³⁵ Vanram le simleiko lamang nati, tak-ha ka chong ngai hiko manglai noning.

Tu khat ning om a phat ha jet ma u.

³⁶ Tak-ha hava nikhuo le aphat ha ka pa nilui a, thaneithiangngai nom, hale tu khat in om jet ma u.

³⁷ Tak-ha Noa phatlaija alui ni ang han, Mi Pasalnai ning a hong rang ham ni nati.

³⁸ Ajarko tuilian nikhuo a hong nimakma, Noa ning rokuang lian na alutmak karje, anmanin an chak anin mui an ruoi hale mui ruoi rang an kan pek an lui om.

³⁹ Hale tui a hong lian han anmani an renga atanpui suo maje an lui jetlui anga Mi Pasalnai nain a hong rang ham ni nati.

⁴⁰ Hava han lui a mi annin om nanti, an khat ha tuang nanti hale an khat ko mak nanti.

⁴¹ Numei annin chakiri tak om nanti, an khat ha tuang nanti, hale an khat ko mak nanti.

⁴² Hiva jarra kan ning theiru, ajarko nang ni nan puman a hong rang pha nang nin jet ma che u.

⁴³ Tak-ha hivahi jetru, ho angpha han arukpan a hong rang ha inneipun alui jet inko; a man lui kan ning nata a man anmani ha lui manruk tor noning.

⁴⁴ Hiva jarra nangninom kanning chak omru, ajarko nang nin nan ngaidon mak, phat tak han Mi Pasalnai ha hong nati.

Takngai Le Takngai lui Suak

⁴⁵ Ha aninko chak le nek a pha chapcha anmani jiang pe na rang; inneipun inn sung mirakip chunga vai hom ranga aluimak, takngai om rang a ching suak ha tu mo?

⁴⁶ A ma inneipun a hong pha han, aleikan ninga a om suak ha ravansat ani.

⁴⁷ Kein a thianga nang ni jiang kari ani, a man a nei rakip chunga a maha a en rangpu ha manchang nati.

⁴⁸ Tak-ha a satlui suokning a lung sunga a ti, kaneipu la hong bak noning tia,

⁴⁹ hale ashap chang pui suokngai ha ve a hong phut jui, hale juruingai le a chak a inpuisuom inko,

⁵⁰ Suak ha ning a ngaidon mak nikhua le a kan ning mak na a phat han, a neipu ha a hong rang ani.

⁵¹ Hale ama ha abobong tan nati, hale asat kan rol ngai le ama a tum ha manmusuom nati, hava han chap le harialna chang nati.