MATHIU 23 - Rabu Athar New Testament (BSI)

Jisun dan Oja Le Pharisingai Ruia A ri

¹ Hava han Jisun mitamngai le a thiamruoingai jiang alui ti,

² dan thei oja le pharisingain Mousi ong na han an ong,

³ Hiva jarra anmanin anti rakip ha nang nin thoru, hale ngakru; tak-ha anmani an tho nuk jui a tho maru, ajarko anti ha anmanin tho ma u.

⁴ Ajarko anmanin choi torlui rang phurriktak an khit, hale mingai liang chunga an tet; tak-ha anmanin ko an kutchal tennam man kan chek jot ma u.

⁵ Tak-ha anmanin an chuan tho rakip ha mi ning an mu na rang an tho, an raka an man paklong hale an puan si om an manchualdun.

⁶ Anmanin kholaikhang na mun na ongnamun asatak hale Sainagok sunga ong na lian tak han an ong.

⁷ Kaithiallaiya mi ning chubei an buk hale “Ojapu” tia an kui rang hi an dei.

⁸ Tak-ha nang niko, Rabbi tia man kan kuimaru, ajarko nan oja khat jak Khrista ha ani, hale nang ni nan renga ulenai, nan ni.

⁹ Simlei chunghin tu khat om a pa, tia kuimaru, ajarko nang ni nan pa ko vanram ma om ama jak ke ani.

¹⁰ Hale nang ni ha oja tia man kan kuimaru, ajarko nang ni ojako Khrista jak ke ani.

¹¹ Tak-ha nang ni karra a lian tak ha ning nang ni suak chang nati.

¹² Hale tu aninom a man kan lian ama ha duk lut mi chang nati, hale atak in a man kan sin ama ha man lian nanti,

Jisun A sat Kanrol Ha Ada

¹³ “A sat kan rol danthei oja le pharisingai, nang ni jiang pong khodengthei ke! Ajarko nang nin vanrengram ha mingai ranga nan kharjui, ajarko nang nin nom lut ma che u; animakle a lut rang mingai ham nang nin man lut mak che u,

¹⁴ asat kan rol danthei oja le pharisingai, nang ni jiang pong khodengtheina ke; ajarko mei thai ngai inn nansut hale nang nin nan thongalla a sot tak lam na nan nei, hiva jarra nang nin a lian na siatna nan mu rang ke.

¹⁵ “A sat kan rol danthei le pharisingai, nang ni jiang pong khodengtheina ke! ajarko nang nin tang le tuija nan lon na mi khat in nan nun chan atho a, hale a man a che le ko nang nin ama ha nang ni anga mei khurra nai veini nan manchang.

¹⁶ “Mitdelngai lamkei, nang ni jiang khodengtheina ke nang nin nanti; tu ang khat in biakinn minga khomak shamna an nei inko, i om nimak; tak-ha tu ang khat in sana biakinn minga khomak shamna a nei inko, ama ha lamal atualjui.

¹⁷ A am le mitdelngai, ajarko sanale sanamanthiang biakinn holam mo a lian?

¹⁸ Hale tu aninom doitho mun minga khomak asham ha ko i om nimak, tak-ha tu ang khat in hava chunga a om an khat phur minga khomak sham ha lamal atualjui.

¹⁹ A am le mitdelngai, holam mo alutdet, ajarko an khat phur le an khat phur a man thiang doitho mun ha holam mo a lian?

²⁰ Hiva jarra doitho mun minga khomak sham a man hava chunga a om phur rakip minga khomak ashamjui ani.

²¹ Biakinn minga khomak sham a man hava sunga a om ama a minga khomak ashamjui ani.

²² Hale vanram minga khomak sham a man Pathian ong nale hava chunga a om ama minga khomak ashamjui ani,

²³ “A sat kan rol dan oja le pharisingai, nang ni jiang pong khodengthei ke! Ajarko a rim hui luila-ai, hop le jera ha sem soma sem khat nankat bak; hale dan chong lut chuan ngai ha, adik, lungsiat thei le takngai lam ha tak tel ma che u; hiva rakipngai hi nan jui rang ani hale nan mak rang shuakmak.

²⁴ Mitdel lamruoingai, thui ha nandalchian na saringsei nanlem.

²⁵ “A sat kan rol dan oja le pharisingai nang ni jiang pong khodengthei ke! Ajarko nang nin kok lai le kheng ha ma pal jak nanrashuk, tak-ha a sunga ko an jot mak chunga sutnale an tak kan chur torlui ning ashiptit.

²⁶ Pharisi mitdel kok lai le kheng ha ma pal tiang om a hongthiang na rang; a rapatak a sung ha man thiangru!

²⁷ “A sat Kanrol dan oja le pharisingai, nang ni jiang pong khodengthei ke! Ajarko nang ni hi thanna a ngui antei en ranga asat hale a thiang lui ning a ship anga nan ni.

²⁸ Hi ang hin nang nin ma pal tiang ko mingai jiang, mi dik ang han nan man kan mu; tak-ha a sunga ko asat kan rol le dan chong jui lui ning ashiptit.

Jisun Anmani Khodengthei rang A ri

²⁹ “A sat kan rol dan oja le pharisingai, nang ni jiang pong khodengthei ke! Ajarko nang nin tashantheingai thannom nansin, hale midikngai ngaidon na rang than om nanmansat.

³⁰ Hale nanti kein in kan pa kan pungai phat lai han kan lui om inko, tashantheingai thisen ha anmani le kanlei lui rang ani.

³¹ Hiva jarra nang nin tashantheingai an lui that anmani an naingai, kan ni tia nang nin shakhi nan pek.

³² Ha aninko nan pa nan pungai an lui tho ha manshipru.

³³ Rulla a hong suak naingai, mei khur chongtan na han ija mo nan kan khel rang?

³⁴ Hiva jarra adik tak a kein nang ni jiang, tashanthei, miching le dan ojangai ka tir, anmani a lek nang nin nan that rang; hale, Khros nan manthirang hale anmani a lek ha nang ni Sainagok sunga adik khan nan ve rang ke, hale khuo khuo khodengthei pek na ranga nan not rang ke.

³⁵ Hivahi nang nin biakinn sung le doi thomun kongkarra nan lui that mi dik Abel a thisen tenle, Zakharia a pasalnai Barachia thisen tenna; Simlei chunga alui chul midikngai thisen rakip, nang ni chunga a chul rang ke.

³⁶ Kein nang ni jiang a thianga kari ani, hiva mithatna rakip tanti hi hiva mirual chunga hong chul, nati.

Jisun Jerusalem A lung Asiat

³⁷ Tashantheingai nan lui that hale nang ni jiang an juangtirngai ha lunga nan lui deng, “O Jerusalem, Jerusalem! Arpui in a tha nuaia a tengai akua ang han kein om, nang nanaingai ha i duk ki lui kuade jotmo, tak-ha, nang nin lui jot lai ma che u.

³⁸ Enru, nan inn arong kanga nang ni jiang an mak jui.

³⁹ Ajarko kein nang ni jiang kati, Puma minga a hong, ama ha ravansat ke ani tia nanti maje, a tun tenna phut nang nin kei hi namulai noni che u.”