MATHIU 15 - Rabu Athar New Testament (BSI)

Pu le Pangai Man chu

¹ Hava pha han Jerusalem ma pharisingai le danthei ojangain, Jisu jiang an honga anti.

² “Iruia mo na thiamruoingain ulianngai lui che na nun chan ha an jui lui? Ajarko anmanin an chak an nek tiang an kut rasuk ma u.”

³ Tak-ha a man a shanga anmani jiang a ti, “Iruia mo nang ni om nan che na nun chan jarra Pathian chong pek ha nan jui lui?

⁴ Ajarko Pathian chong pek in a ti nan pa le nan nu ha chitlejak neiru, hale a pa, a nu kho khong mi ha thi nati.

⁵ Tak-ha nang nin nanti nemnakhat nan nei karra tu aninom a pa animakle a nu jiang, hivahi ko Pathian ta ke a ti aninko,

⁶ an mani ning an pa an nu ha chitlejak nei lai noning, hava han nang nin lui che na nun chan jarra nang nin Pathian chong pek ha i om mannimacheu.

⁷ A sat kan rol ngai, Isaia ning nang ni ruia asat alui ri a a ti.

⁸ Mingai ning an bai sua jak kei an nahongdep hale an mur jak a chitlejak an na nei. Tak-ha anmani an lung ko kei jiang tenna a lak an om.

⁹ Hale anmanin mingai chong pek ha ngir na chong ke tia an man chu a kei hi nem na buia chubei an na buk.”

Phur ha ning Mi ha A manchok

¹⁰ Hava suale mitamngai ha a man akuia a ti, “Ngairu hale jetru.”

¹¹ Bai sunga a lut ha ning mi ha manmangmak, tak-ha bai tenna i hong suak ha ning mi ha a manmang.

¹² Hava suale a thiamruoingain ama jiang an honga anti, “Chong ha an jet pharisingai huipelaima tihi nang in na jet mo?”

¹³ Tak-ha a man a hong shanga a ti, “Vanram ma ka Pan a luiling thing kung rakipngai ha kel nati.

¹⁴ Anmani om rase u, anmani mitdelngai lamkei ke anni; hale a mitdel in mitdel ha an kan keiruoi inko, an ninia khurra an chul rang ke.”

¹⁵ Hava suale Pitar ning ama jiang a hong shanga a ti, “Hiva tetan na din hi a thianga keini jiang na ri pero.”

¹⁶ Han Jisun a ti, “Nang ni om a tun tenhin nan la jet lui mo?

¹⁷ Bai a an thun rakip hi phunga a lut a manmang tihi nan jet lui mo?

¹⁸ Tak-ha bai tenna a hong suak rakip ha lung sung tenna a hong ani hale anmanin mi ha an manmang.

¹⁹ Ajarko lung sung tenna a hong suak ha, a satlui lungdo, mi that, milomnu jong, mui ruoi mak ma luiomchun, a ruk, adik lui shakhi pek, esella nuisongai ha ani.

²⁰ Mi ha a manmang ko hiva rakipngai hi ani, tak-ha kut rasuk lui a an chak an nek ha ning mi ha manmangma.”

Numei Khat Takngai

²¹ Hava suale Jisun hava muntena a suak Tair le Sidon ram tiang a che jui.

²² Hale enru hava ram ma Kanan nu pui an khat in ama jiang a hong khek a ti, “Lungsiat na muro, o Puma. David a pasalnai, ka numeinai ha seitan in khodeng a mantheijui.”

²³ Tak-ha a man chong khat om lui shangma, hale a thiamruoingain ama jiang an honga an lui ti, numeinu hi man che taro, ajarko a man kan nuk tiang a khek.

²⁴ Tak-ha a man a hong shanga a ti, “Israelngai inn sunga a mangsha belramngai rang ni lui a; kei hi na hong tir ma u.”

²⁵ Hava suale a man a honga ama ha chubei a buk a ti, “Puma na shanro.”

²⁶ Tak-ha a man a hong shanga a ti, naipangai tal ha luibak uitengai jiang deng juan pe hi sat mak.

²⁷ Hale a man a ti, “Adik, puma; aninom uitengain om an neipungai mai cham thuoia a hong chul a her ahak ha an chak.”

²⁸ Hava han Jisun ama jiang a hong shanga a ti, “Numei, na takngai na hi alianne; nang in na deina nuk jui han nang jiang hong ni rase, hale a numeinai ha hava phatak han a dam jui.”

Mitam Jisun A mandam

²⁹ Hale Jisun hava mun ha a mak, Galili tuionglian sirra a honga; hale tangbung han a chea hava mun han a hong ong.

³⁰ Hava suale mitamin ama jiang an honga, anmani le kan ruaia ke kiak, mitdel, chongsuaklui, kut kiak, hale a dang a tam tak Jisu ke kung a an hong choi, hale a man anmani ha a man dam jui.

³¹ Chongsuakluingai chong an ri jui, a kut kiak ngain an dam a ke kiak ngain an lon jui, hale a mitdelngain an mu jui, hiva mitamngain an mu han an lui ngakchianna, hale Israel Pathian ha an lui manpak jui.

Pasal Lishing Manli Jisun A vai

³² Hava suale Jisun a thiamruoingai a kol la akuia a ti, “Mitamngai hi kein lungsiat ka mu jui; ajarko anmanin kei le ni thum an hong om jui, hale chak rang nei lai ma u; hale anmani ha lamlaia anvantha rang mo tia, kein anmani hi von cham chunga masuojot making.”

³³ Hava han a thiamruoingain ama jiang anti, “Mitam hiva jet hi hunna rang tal hi ramtonglian hin hon mo kein in kan mu rang?”

³⁴ Jisun anmani jiang a ti, “Nang nin tal ijatmo nan la nei?” Hale anmanin anti, “Tallom sari le nga manli.”

³⁵ Hale a man mitam ha, simlei jolla ong na ranga chong alui pek.

³⁶ Hale a man tallom sari le nga a luia hale manpak na anei a, a ek khuia a thiamruoingai jiang alui pek; hale a thiamruoingain mitam jiang an pe jui.

³⁷ Hava han anmanin an chak, an khopjui; hale anmanin a liam a her ahak ha an man chun na luk sari aluisip,

³⁸ hava han a chak a nek mingai ha numei le nai pang teldeluia, pasal lishing manli alui ni.

³⁹ Hale a man mitamngai ha amanche suale, rokuang sunga a lut; hale Magdala ramtiang a che jui.