MATHIU 14 - Rabu Athar New Testament (BSI)

Johon Baptis Thina

¹ Hava pha han Herod rengpan Jisu ruia a jet a,

² hale suakngai jiang a ti, “Hivahi Johon Baptis ke; ama hi a thi tenna a ringkhir jui; hiva jarra ama jiang hiva tho torna ranak a nei tor ani.”

³ Ajarko Herod in Johon hi a churra, a khit, hale ren inna a thun; hivahi a naipangpa Philip lomnu Herodia jarra ani.

⁴ Ajarko Johon in ama jiang alui ti, “Nang in numeinu na om pui rang hi dan ning jot mak.”

⁵ Hale a man ama hi alui that jot innom a man mitam ha alui chit; ajarko anmanin ama hi tashanthei khat ke tia an lui ngaidon.

⁶ Tak-ha Herod naichangna ut a tho han Herodia a nai numeinu in; mitam madonna a lam ma Herod a lung alui mankhopjui.

⁷ Hiva jarra a man chong sam na a nei a, ama jiang a ti, “Nang in na na lam tak-ha na pek ati.”

⁸ Hava han a nu ning a masiatna nuk jui a, “Johon Baptis a lu ha kheng khat hivahin na pero a luiti.”

⁹ Hale rengpa huipelaima, aninom; a chongshamna le ama le ongsuamngai jarra, a man ama jiang pe na rang chong a bejui.

¹⁰ Hava han a man mi a tirra, ren inna Johon a lu a hong mantan jui.

¹¹ Hale a lu ha keng khat chunga an hong choia, dongmanu jiang an lui pek hale a man a nu jiang a hong choi.

¹² Hava suale ama a thiamruoingain an honga a thi sa ruok rong ha an lui a an phumjui; hale Jisu jiang an chea an hong manjet jui,

Pasal Lishing Ranga Jisun A vai

¹³ Jisun a jet, hava mun tenna rokuang a chuanga mun dang khat a che jui; tak-ha mitamin an jet; khuo tenna kea an honglonna; ama a nuk a hong jui.

¹⁴ Hale Jisun a hong suak pha han, mitam ha a mu a; a man anmani ha lungsiat a mu jui, hale anmani ha alui mandamjui.

¹⁵ Nitak a hong nipha, a thiamruoingain ama jiang an honga anti; hivahi ramtong na ke, hale a pha hi om a hong buijui; mitamngai hi man che taro, han anmanin khuo khuo chesen nang, an chak an nek rang hong kan tok rase u.

¹⁶ Tak-ha Jisun anmani jiang a ti, “Anmanin an che rang hi a nem na om ma; nang in anmani jiang chak rang peru.”

¹⁷ Hale anmanin ama jiang anti, kein in tallom ranga le nga anni jak hivahin kan nei.

¹⁸ A man a ti, “Hava ha kei jiang hong choiru,”

¹⁹ hava suale a man mitamngai ha ramsul chunga ong na rang chong abea, hale a man tallom ranga le nga anni a luia vanram tiang a en na phual a pek jui, hale a ek khuia talngai ha a thiamruoingai jiang a pek jui, hale a thiamruoingain mitam jiang an semjui.

²⁰ An khat om, anmani ning an chak an lui khop; hale anmanin a liam a her ahak an nanchun karra luk somleini aluisip.

²¹ Hale a chak a nek mingai ha numei le nai pang telde lui a pasal lising ranga duk an lui ni.

Jisun Tuichunga A lon

²² Hava phatak han Jisun mitamngai ha amanche mak ma, a thiamruoingai ha rokuang chunga mandet varaltiang alui man che jui.

²³ Hale a man mitamngai ha a manchea, a thei jak lam na ranga tangbung khat tiang alui che, hale nitaktiang a hong ni pha han hava mun han ama a thei jak alui ni.

²⁴ Tak-ha rokuang ha ko tuionglian laia lithukna tunga, tuikanok in aluimanpong, ajarko phaivuo phirship alui kanher.

²⁵ Janna pung manli a chul pha han, Jisun tuionglian chunga a hong lon na anmani jiang alui che.

²⁶ Hale a man tuionglian chunga a lon ha a thiamruoingain an mu han an hong ti “Hivahi thavang ke” tia an lui chit a an lui khek.

²⁷ Tak-ha hava lai tak han Jisun anmani jiang a ti, “Lungngamtak a om ru, kei ke, chit maru.”

²⁸ Hale Pitar ning ama jiang a hong shanga a ti puma, nang naninko nang na kol la kein tui chunga hong na ranga chamna pero.

²⁹ Han a man a ti, “Hongro,” hale Pitar ning rokuang tenna a chumma, tui chunga a lon na Jisu jiang alui che.

³⁰ Tak-ha a man phaivuo rang ha a mu pha han, alui chit hale a hong tunga a hong khek a ti “Puma na sanro.”

³¹ Hale hava lai tak han Jisun a kut a hong banna a churra ama jiang a ti, “O aviar jak takngai i ruia mo nang in nikan ching na?”

³² Hale anmanin rokuang sunga an lut pha han phaivuo ha a bang jui.

³³ Hava suale rokuang sunga alui om anmaningai ning ama ha chubei an buk an hong ti, “Adik tak a nang hi Pathian Pasalnai ha na ni.”

Genesaret A Anatngai A mandam

³⁴ Hava tenna anmanin an hong suak a, Gennesaret ramtiang an hong jui.

³⁵ Hale hava mun na mingain ama ha an jet ha, hava ram sirra om a mun rakip chong an pek, a nat rakip ama jiang an lui hong choi,

³⁶ Hale anmanin ama a puan mor ha sitjak sitna rang lam na an lui nei, hale a puan a sit rakip in an dam ver jui.