MATHIU 13 - Rabu Athar New Testament (BSI)

Chimu Vorpa Tenna Tetan na

¹ Hava nikhuo lenhan Jisu inn tenna a suak a tuionglian khamma a ong jui.

² Hale, mitamtak in ama jiang an hong kan chun jui, han a man rokuang khat sunga a lut a a ong jui; hale mitamngain tuionglian khamma an lui ngirra alui ti.

³ Hava suale Jisun anmani jiang kungdin le kan ruaia chong tam tak alui ri; “Enru chimuvor an khat in vor ranga a hong suak jui.

⁴ Hale a man hingahin a hongvor, a ru aviar ko lam sirra achula; vatengain an honga an chak jui.

⁵ Aviar ning lung karra simlei omrem mak na han a chul, hale aviar ha simlei ha a thuk a om mak jarra a rak a hongmong.

⁶ Tak-ha, nisat a lum pha han, an renga a char; hale a rajung an nei lui jarra an vuoilik an charjui.

⁷ Hale aviar ning lingbuk karra a chul, hale ling ha a hong seia anmani ha a khu de jui.

⁸ Tak-ha adangaiko simlei sat na mun na a chul, hale a ra a nei; aviar ning riakhat, aviar ning som ka ruk, a viarning somthum.”

⁹ “Ngainarang kuor a nei amaning ngai rase.”

Tetan na Lungdo

¹⁰ Hale a thiamruoingain ama jiang an honga anti, iruija mo anmani jiang tetanna na pek nang in chong nari?

¹¹ A man anmani jiang a hong shanga a ti, “Ajarko vanrengram ruia a thuk chong jet na rang nang niko an napejui; tak-ha anmani ko pepe ma u.”

¹² Ajarko tu aninom, a nei ama jiang khel la pe nanti; hale a ra a tam nei nati, tak-ha tu aninom a nei lui ama ha alui neisha tenna lui khir nanti,

¹³ Hiva jarra kein anmani jiang tetan na ka pek ka ri ani ajarko an enchunga mu ma u; hale an ngai chunga jet ma u, hale an lunga jet ma u.

¹⁴ Hale tashanthei Isaia in alui ri chong ha, anmani jiang a tung jui ani, nang nin ngai ko ngainanti; jet tor noni che u, hale enko ennanti nang nin, mu chil noni che u.

¹⁵ Ajarko hiva mingai lung hi a om jui, an mit an mu mak na rang le an kuarra an ngai mak na rang; an lunga an jet mak na rang le an hong kanheimak na rang; ngai na rang an kuar a ngar jui; hale an mit om an singjui, hava jarra anmani ka mandam rang ani.

¹⁶ Tak-ha nang niko ravansat nan ni ajarko nan mit khet in nan mu hale nan kuar khet in nan jet jui.

¹⁷ Ajarko kein nang ni jiang a thianga ka ri ke, tashanthei le midikngain nang nin nan mu hi an lui mu jot, tak-ha lui mu ma u; hale nang nin nan jet hi an lui jet jot, tak-ha lui jet tor ma u, tihi jetru.

Chimu Vor Tetan na Jisun A ri

¹⁸ Hiva jarra chimu vorra tetan na hi ngairu:

¹⁹ Tu ang khat mi ning, rengram chong ha a ngai a; hale jet theimak, hava suale asat mak khat in a honga a lung sunga an lui vor ha a luipe khir ama lam sirra an vor ha ani.

²⁰ Tak-ha lung karra an vor ama ha ning, chong ha a jet le a rak ningsat le kan ruaia alui,

²¹ ani nom ama jiang a rajung a nei mak jarra, a pha bongkhat jak, a ring; ajarko chong jarra pong na, khodengthei na, a mu han; kutshui kesuina hi a mulen.

²² Ling karra an vor ama ha ning, chong ha a jet hale ramuol la lungdo le leisei ri a nei na rang ha ning chong ha a man kan torra; ama ha a ra nei lui a hong chang.

²³ Tak-ha simlei sat na chunga an vor ama ha ko chong ha a ngai a jet, a man kheldet a ra anei a aviar ning riakhat, aviar ning in som ka ruk aviar ning somthum a hongni.

Gehuru Tetan na

²⁴ A man anmani jiang tetan na dang khat a pek a hong ti, vanrengram ha ko luipuk a ru sat vor mi khat anga ani.

²⁵ Tak-ha mingain an jalkar ama a enda in a honga gehu karra ramsul ra avorra a che jui.

²⁶ Tak-ha a ru ha a hong monga a hongliana a ra a hong nei pha han, ramsul ham a hong kandangjui.

²⁷ Han a neipupa suakngain an honga ama jiang anti, apu, nang in asat ru ha na luipuk na vor nimak mo? Ha aninko ramsul om ija mo a om?

²⁸ A man anmani jiang a ti, ana enda khat in hivahi alui tho ani, suakngain ama jiang anti, “keinin kan chea kan hong manchun rang hi mo na dei?”

²⁹ Tak-ha a man a ti, hong manchun maru, ramsul ha nang nin nan manchun karra gehungai om phoide a jot.

³⁰ Gehu rasik pha a tung mak kar je an ninia ramsuam rase, rasik pha a hong tung kar hin kein a atngai jiang “Ramsulngai ha mankanchun inang hal na ranga alo loa khitru, tak-ha gehu ha ko kei ka inntea bukru,” tikati.

Anchamru Tetan na

³¹ A man anmani jiang tetan na dang khat a pek a hong ti, “Vanrengram ha ko mi khat ning anchamru a luibak alui puk a vor anga ani.

³² Hiva hi ning a ru a dangngai nek a sin, tak-ha a hong mong pha han, a dang an liana nek a hongliana thing kungkhat a hong chang, hiva jarra vanna vatengain an hong vuanga ama a changngai han an rabu an vasin.”

Cholla Tetan na

³³ A man tetan na a dang khat anmani jiang a ti, “Vanrengram ha ko chol anga ke, numei khat in bu ha arup thumma alui a a renga chol avachang maje a bi anga ani.”

Jisun Tetan na Aneiman

³⁴ Hiva rakip hi Jisun mitamngai jiang tetan na ha a ri ke, hale a man tetan na kan chel lui i om lui ri ma.

³⁵ Hivahi tasantheingain an lui ri ha tungtheina rang ani, “Kein tetan na ka bai long kata ramuol an phut lai tenna ruk a an lui thup rakip ha kei ning ri rang ka ni.”

Gehuru Tetan na Jisun A ri

³⁶ Hava suale mitamngai ha a manchea, hale inn sunga a lut jui, hale ama a thiamruoingain ama jiang an honga anti, “Luipuk a ramsulru jarra tetanna ha keini jiang a thianga na ri pero.”

³⁷ A man anmini jiang a hong shanga a ti, “A sat ru vor ama ha Mi Pasalnai ha ani.

³⁸ Luipuk ha ning ramuol ha ani, asat rungai ha rengram pasalnaingai ke, tak-ha ramsulru ha ning asat mak ramuol chunga a om mingai ha anni.

³⁹ Mi enlalla avorpu ha ning seitan ha ani, rasik pha ha ning ramuol torna ha ani, hale a atngai ha ning thaneithiangngai ha anni.

⁴⁰ Hiva jarra ramsul ha manchun nan ta, hale meija an hal rang, ramuol torna pha ha hi ang hin ni rang ani.

⁴¹ Mi pasalnai ha ama thaneithiangngai ha hong tir na ta, ama ram sunga kutsuikesui le nun chan salui lui tho rakip manchun nanti.

⁴² Hale mei khur sunga deng juan nanti anmanin hava mun han chap le harialna ni nati.

⁴³ Hava pha han midikngain, an pa rengram han simni anga hong varnanti, ngai na rang a kuar neipun ngai rase.

Anthup Neinun Sampar Tetan na

⁴⁴ Veikhatret vanrengram ko luipuk khat an thup; nei nun anga ani, mi khat in a mu a athupjui; hale ningsat a chea a maning a nei rakip a juara hale hava luipuk ha a chok jui.

Rangkachak Tetan na

⁴⁵ Veikhatret, vanrengram ko lal uol mi khat in lung man tam a tok anga ani.

⁴⁶ An khat om lung man tam khat a mu a, hale a chea a nei rakip jiang a juara hava a hong chok jui.

Rabu Tetan na

⁴⁷ Veikhatret, vanrengram ha ko tuionglian sunga an vorra nga a om rakip hongman chun na len khat anga ani.

⁴⁸ Hava ha ning a sip pha han, anmanin tuionglian khamma an kei sua; an onga asat lim ha an man chun na, ngabella an thun, tak-ha a satlui rakip ko an deng juan.

⁴⁹ Ramuol tor ni han hingahin ni nati, thaneithiangain hong nan ta; midikngai karra misatluingai ha khuisen nanti.

⁵⁰ Hale anmani ha mei khur sunga deng juan, nanti, hava mun han chap le harialna ni nati.

A thar Dik le A luisa

⁵¹ Jisun anmani jiang a ti, hiva rakip hi nan jet jui mo? Anmanin “Kan jet jui,” anti.

⁵² Hava suale a man anmani jiang a ti, “Danthei rakip jiang an lui man chu anga vanrengram ha ko ama a nei rakip alui le a thar hong keisuana inn neipupa anga ke ani.”

Nazaret A Jisu An jot lui

⁵³ Atun Jisun tetannangai hi a ri suale, hava mun tenna a kir jui.

⁵⁴ Hale a man a khuo tak han a honga, a man anmani Sainagok sunga alui man chu; hava han anmanin an ngak an hong ti, “Hiva mi ning luising le chuanlian tho tornangai hi hon mo a mu?”

⁵⁵ A ma hi mistry a nai mo nimak? A ma a nu om Meri a naipangai om Jems, Josep, Simon le Judas, nima u mo?

⁵⁶ Hale a char nu an renga keini le kan om mo nimak? Ha aninko, hiva rakipngai hi hon mo a mu?

⁵⁷ Hiva jarra anmanin ama ha lui jot lai ma u, tak-ha Jisun anmani jiang a ti; “Tashanthei mi ama ram sung le an inn sunga ni luia ram lakna mi ning ko chitlejak an lui nei ani.

⁵⁸ Hale a man hava han, chuanlian tam tak lui tho mak ajarko anmanin takngai ma u.”