MARK 4 - Rabu Athar New Testament (BSI)

Chimu Vor Pa Le Tetan na

¹ Jisun Galili pat sira a man chu a phut ret jui. A ma jiang mipui an hong kan chun ngaiha antamrei jarra tuidung chunga rokuang sunga Jisu a lut a ong jui, hale mipui ngaiha patsir tianga an om jui.

² A man tetan na chong a tam tak alui man chu, a man chuna han anmani jiang, a ti.

³ “Ngairu! Mi an khat in chimu vor ranga a hong suak jui.

⁴ A man chimu ha alui a avorra, her khat lamlaia a chul, hava ngaiha vate ngain anrutsojui.

⁵ Chimu dang her khat leipak om makna lung chunga a chul, hava leipak ha atom jarra chimu ha a rak tak a hong mong,

⁶ Hava suale nisat ahongkang ahonglum pha, a rajung a thuk mak jarra avuai-a acharjui.

⁷ Chimu dang her khat ning ling karra a chul, ling ha ahonglianna a hong khu de jui, ralaimak.

⁸ Tak-ha chimu dang her khat leipak satna mun na a chul, hava ngaiha a hong chiak a hong kansonna, a ra jui, her khat a ra somthum, her khat som ka ruk, hale a dang her khat riakhat apungdet.”

⁹ Hale Jisun a ti, “Ngainarang kuar a nei ngain ngairu.”

Tetan na Lungdo

¹⁰ Jisu ha a binga a-ompha, ama jiang a-omngai le thiamruoi somleini an honga, tetan na chong ha man thiang ranga an hong dingkel.

¹¹ Jisun a sang, “Pathian rengram a kan thup ha nang ni ka na pek jui. Tak-ha tualla a om a dangngai rang ko i rakip tenna jak anjetrang ani.

¹² Hiva jarra anmanin, ‘A enko an en mu tor ma u, anngaiko anngaichak, aninom jet thei ma u, ajarko anmanin an mu a, anjetsa a chang inko, ngaidam an mu na ranga, Pathian tiang an hong kan hei rang ke a ti.’ ”

Chimu Vor Tetan na Jisun Ari

¹³ Hava suale Jisun ading kel, “Nang nin hiva chong tetan na hi jet mak che u mo? Ha a chang inko, tetan na rakipngai hi ija mo nan jet torang a ti,

¹⁴ Chimu vorpa han Pathian chong ha a vor ani.

¹⁵ A man avora lamlai a achulngai ha ko hi ani; mingain chong ha an jet pha, a rak tak Seitan ha a honga an sunga chong an vor ha aluisoakpe ani.

¹⁶ Adang lung chunga a chul ha ko hiva anga mingai anni, anmanin chong ha an jet lim le ningsat tak an lui ani;

¹⁷ Tak-ha anmanin anbinga anrajung a thuk an nei mak jarra a sot khang tor ma u, hava chong jarra han manmangna, khodengthei na a hong ompha, anmanin a rak tak, an kan lum chachakjui.

¹⁸ Hale midangngai ha ko lingkarra a chul chimu anga ke anni, hava mingai han a chong ha an ngaija an jet.

¹⁹ Tak-ha ramuol chung ringkhuo, lungdo nei na, hale a dang deina a hong lut chong ha lui jot ma u a ra neilui an chang.

²⁰ Tak-ha a dang leipak satna chunga an vor ngai ha ko, hiva mingai anga anni, anmanin chong ha an jet an lui a anlungrilla ansiak, her khat in somthuma, som ka ruk, hale riakhat a rangai ha anni.”

Thaimei Ruia

²¹ Jisun anmani jiang a ri ret, “Thaimei an khat a ong na chunga siakluia, zamun thuoia a chang mak le luk thuoi-a khuranga tunmo an hong choingai?

²² Ajarko akanphuang lui rang a kan thup tor rang i om om mak; animakle jet lui rang chong ruk i om omtheimak.

²³ Tu a chang innom ngaina ranga kuar a nei mi ning jetrase,” a ti.

²⁴ Hale a man anmani jiang ariret, “Nang nin nan jet chong ha kan ching theiru; nang in mi jiang chong natanna nuk jui han nang jiang na pek nati hale a khel la nang jiang napek de nati.

²⁵ Ajarko a nei mingai jiang anpekde rang ke; hale a nei lui mi ha aneisalep ha ansut de rang ke a ti.”

Chimu Mongna Ruia Tetan na

²⁶ Jisun hingan a ri, “Pathian rengram ha mi an khat in aluipuka chimu ivor ang hin ani;

²⁷ A ma jan na a jal, sunna a thui, ha ang han chimu ha a chiak a hong suak jui, ha nom a man chimu ha ija mo a hong chiak ha jet mak.

²⁸ Leipak han abibinga a man amasat tak a chiak, hava suale a chang, a om ma a lian pha han a hong ra.

²⁹ Hana a ra a hong minpha, mipa han akoite a at a phut jui, ajarko chang atpha a hong tung jui a ti.”

Anchamru Tetan na

³⁰ Jisun a ri a, “Pathian rengram hi kein in ilemo tetan na kan tho rang” hale “I tetanna mo kannei man na kan ri man thiang rang?”

³¹ “Pathian rengram ha leipak chunga a sin tet anchamru an khat anga ani. Hava ha mi an khat in alui a leipak a avorpha,

³² a hong chiak-a, ramsul karra a lian tak an khat a hong chang jui, hale a chang a lian tam tak a hong om ma chunga vatengai an honga nilim thuoia rabu an sin na an om ke.”

³³ Ha anga mingain an jet thei na rang tetan na a tam tak alui ripe.

³⁴ Jisun anmani jiang tetanna chonga aripe ni lui a i om rimak; tak-ha ama a bing a a om pha thiamruoingai jiang i rakip a ri man thiang jui.

Jisun Amanbang Phaivou

³⁵ Havani nikhuo nitak a hong ni pha han, Jisun thiamruoingai jiang, “keini pat an khat tiang kan in lang che tarei a ti.”

³⁶ Hiva jarra mipui ngaiha an mak jui; Jisu chuongna rokuanghan anchuonga an tuang jui.

³⁷ Hana phaivuo puinu phirsib a hong ranga, tuipui a kan nok ha rokuang sunga tui a lut siprang ani jui.

³⁸ Tak-ha Jisu ko rokuang mor ha a lu akhamma ajalla alui om; thiamruoingain ankei thuija ama jiang, “Oja, keini thirang kan ni jui nasanno nichemo anti.”

³⁹ Jisu a thuia, rothi phaivuo rang ha akhap, “Ahip jinna omro” a ti pe, hale tui a kan nok ha, “Chip tia omro,” alui ti. Hale phaivuo rang ha a bang jui adairipjui.

⁴⁰ Hava pha han Jisun anmani jiang alui ti, “Ijarra mo hi ang khan nan chit? Nan takngai om mak mo alui tipe.”

⁴¹ Tak-ha anmani an chit reia, “Phaivuo le tui a kan nok ngainom a chong anjuihi, imimo ani?” an khat le an khat an kan dingkeljui.