MARK 3 - Rabu Athar New Testament (BSI)

Akutthi Pasal Khat

¹ Hava suale Jisun kan chun na inna acheretjui, hava mun na a kut her khat a thi mi an khat alui om.

² Hale mi aher khat in Jisu ha man siat thei na rang sernikhuo han amandam rang ha an enna anjuichak.

³ Jisun kut aher khat athipa jiang han, “Hin hongro,” a ti.

⁴ Hale Jisun anmani jiang ading kel, “Sernikhuo chuan sat tho le chuansatlui tho, animakle kansanringle, thatranghi holam mo dan na adik?” a ti pe. Tak-ha anmanin i om rimau.

⁵ Jisun lung thak puma a en chiak, an lung ngarle andik mak naha a ning adong puia, “Hale mipa jiang han na kut jikro”, atia. Hale a man a kut a jiak, a kut ha a dam jui.

⁶ Hava pha han Pharisingai an chea Herod mingai le ija mo ama hi kan that rang tia a rak tak a an kanbiakjui.

Tui ong Sira Mitam

⁷ Jisun a thiamruoingai le tuionglian khamtiang an che, hale Galili le, Judia ram ma,

⁸ Jerusalem, Idumia ram va ralla Jordan sirra, Taiar le Sidon ram tenna puma a nuk an hong jui, ajarko Jisu chuan tho rakip an jet pha, mipuingai an hong ani.

⁹ Mipui ha antamrei jarra Jisu annengtuar rang a pua a thiamruoingai jiang rokuang an khat siakna ranga chong a bejui.

¹⁰ Jisun mitamtak alui mandam jarra a nat mingai han ama ansit chiak na ranga ama an hong naidet an hong kannengjui.

¹¹ Hale thavang satlui a choi mingai han ama an mu pha, a mai kung a an kan lum, “Nang Pathian Nai na ni,” tia ankhekjui.

¹² Jisun a maha tu mo ani tihi mingai jiang rimaru tia chongngar tak alui pek.

Jisun Thiamruoi Somlei anni Athang

¹³ Hava suale Jisun amidei rakipngai ha akuia, anmanin ama jiang an honga, tangbunga a che jui,

¹⁴ hale ama ning thiamruoi somleini alui thangjui, a man thiamruoi tia alui kui. “Kein nang ni le chuan tho rang kan ni,” alui ti. “Kein nang ni ha Pathian chong sem kanatir rang ke,

¹⁵ hale ranak nei tak khonamngai notchai nangtor rang ke.”

¹⁶ Somleiningai ha ko: A man Pitar, tia a ming a phu-a Simon;

¹⁷ hale Jebedi a naingai Jems le Johon anmani hi rori naingai tia an ming “Boanerjes”, tia aphua jui;

¹⁸ hale Andrew, Philip, Bartholomew, Mathiu, Thomas,

¹⁹ hale Alphaios nai Jems, Thadaios, hale Simon Aramlungsiatpa, hale a pek rangpa Iskariot Judas hiva ngai hi anni.

Jisu le Belsabul

²⁰ Hava suale Jisun inna a che jui. Hava suale mi pui an honga ankanchunret Jisu le a thiamruoingai ha bu ten nom nektor lai ma u.

²¹ An inkuongain achonghi an jet pha, “Avet jui ke” tia, hong tuong ranga antierjui.

²² Hale Jerusalem ma an phut Dan oja her khat a hong ngain anti, “Asunga Belsabul i om ke, hava khonamngai reng ranak han sova khonamngai inotchaike anti.”

²³ Hiva jarra Jisun anmani ha a kui a tetan na a ri, “Seitan nin Seitan ha ija mo inotchei tor rang?”

²⁴ Rengram an khat ha a bing a akankhui senna aruprup an kan enda a chang inko hava rengram ha ngir tor noning.

²⁵ Hale insung an khat ha abibinga a kan khuisen na an kan sual inko, hava in ha ngir tor lai noning,

²⁶ hiva jarra Seitan rengram ngai han ankankhui senna rup dadanga an kan enda aninko, an kan khuisen jui, ngir tor lai noni u.

²⁷ “Aranakrat mi an khat ha a masat tak anchura an khit mak inko, tu ten nom a nei ha sutranga a inn sunga luttorma-u tak-ha an khit suale jak ansuttor rang ani.”

²⁸ “Adik tak ka na ripe ani, miringnai ngain siat nale a sa mak an ri rakip ngaidam om nati.

²⁹ Tak-ha Thavang Thiang a enda arisiat mi ha tu a chang in nom ngaidamhi mu lai noni u, ajarko a man kum sot siatna athojuike.”

³⁰ ajarko anmanin an lui ti, “A ma sunga thavang a satlui a om anti.”

Jisu a nu le A naipangai

³¹ Hava suale a nu le anaipangngai an hong lut tuola an ngirra, kuiranga mi anluitir jui.

³² Mitamtak Jisu sirtiang an lui onga, hale anmanin ama jiang, “Enro, na nu le na u na nai ngain an na tok a an om anti.”

³³ Jisun alui sang, “Tu mo ka nu tu ngaimo ka u ka naingai?”

³⁴ Hale Jisun asirtiang an ong ngaiha a en chiak, “Enro, hina a omngaihi kan u le ka u ka nai ngaike a tipe!

³⁵ Tu-ang Pathian lungdo a tho miha ka u ka nai an khat om kanu kapa anni.”