MARK 16 - Rabu Athar New Testament (BSI)

Jisu Ringkhir

¹ Sernikhuo suale, Meri Magdalen le Jems a nu Meri hale Salomi ning Jisu ruak-ha not ranga a rim hui a man tam anchok ani.

² Hapta nikhuo amasatak jingtiang man, ni ahong suak pha han anmani than tiang an che jui.

³ Anmanin lam ma an che na han an lui kan biak, “Thankot lung ha tunmo inalong pe rang?” Ankanti.

⁴ Anmanin an en pha han lung ha alui kan longa akanleha an mu jui; ajarko lung ha a lian tak ani.

⁵ Anmani than sunga an lut pha han, puan abanglak asi reathar an khat chang tiang pang a ong ha an mu a anngakbanjui.

⁶ A man anmani jiang a ti, “Ngakmaru; nang nin Nazaret Jisu khros ankhaiha nantok. A ma a thui khir jui, hin omlaimak; an man jalna mun hi hong enru.

⁷ Chenang a thiamruoingai le Pitar jiang tiperu, ama Galili tiang nan madonna alui che jui; aluirisa anga hava mun na nang nin nan mu rang ke, a man alui ti anga ani.”

⁸ Anmani an hong suak thaanna an phut an tan jui; ajarko an chunga chitnale lung kan nok na a om jui; hale an chit jarra tute jiang item rilaimau.

Jisun Meri Magdalen le Akanmu

⁹ Jisu thina an phut a thui khirpha, hapta nikhuo amasatak jingtiang manhan khonam sari ning a choi a iluinot chaipenu, Magdalen le Meri jiang aluikando ani.

¹⁰ A ma le alui kan ruai a sap ngain, a thavang pong aningdong a chap a omngai jiang numei nuhan a ripejui.

¹¹ Tak-ha anmanin nom Jisu a thui jui chong anmani jiang a ri ha takngai ma u.

Jisun Thaimruoi Anni Le Akanmu

¹² Hiva suale ankara mi anningai jiang ram ma an che lai lam ma aluikando ani.

¹³ Anmanin an kir khira a dangngai jiang an ripejui, tak-ha anmanin tak luingai ma u.

Jisun Somleikhat Le Akanmu

¹⁴ Nuktak a Jisun somleikhatngai jiang maichamma bu anneklai alui kando ani; anmani anlungngar jarra le an takngai mak jarra a man akok jui, ajarko ama a thuikhir rang hi anmanin takngai ma u.

¹⁵ Jisun anmani jiang a ti, “Ramuol puampuia che unlang, miring rakip jiang chongsat hi vasemru.

¹⁶ Tu a chang innom a takngai a tuija baptais a tho mi ha kan san ring na imu rang ke; tu a chang innom takngai lui mi ha ma sial na a tum rang ke.

¹⁷ Hale a takngai na ha hiva manjetna hile a kan ruai rang ke, anmanin ka minga khonamngai an notchei rang ke; anmani chong a dang adanga anjekthei rang ani;

¹⁸ anmanin rul anchurtor rang ke, tur aninom i om tino ni u; anmanin mi a nat chunga an kut ansiak le an dam rang ke,” a ti.

vanram Tiang Jisu Akal

¹⁹ Puma Jisun anmani a kan biakpui suale, vanram tiang ama ning a kalla, Pathiankut chang tiang a ong jui.

²⁰ Anmani mun rakip a ansemma, Puma ning a san na, manjetna han anchongriha a mandetjui. Amen.