MARK 15 - Rabu Athar New Testament (BSI)

Pilat Ma don na Jisu

¹ Jingtiang mantak thiampulianngai le ulianrupngai hale dan theingai an renga a rak tak an kan chun na an kan biak jui hale anmanin Jisu ha an khit ankeituara Pilat jiang an hong peklutjui.

² Pilat in Jisu ha chong a dingkel la, “Nang Jiwngai rengpa ha mo na ni?” Ati. Hale Jisun a sang, “Nang in na ti jui”, a ti.

³ Thiampulianngain a man a samak hinga a ti tia anher ani.

⁴ Pilat in Jisu ha ading kelret, “Nang in i om nasangno nichemo? Enro, na chunga masiatna rakip an hong choi ani,” a ti.

⁵ Tak-ha Jisu ning chong i om sanglaimak, hava jarra Pilat in alui ngak jui.

Jisu Thinarang Chong pek

⁶ Kanna-uth pha rakip mingain ren inn na an khit an khat Pilat in aluimasua chachak.

⁷ Hava lai han lungkhur ren inn na Barabas anti mi ankhat lam kaingai a enda ruk a mi athatpaha alui om.

⁸ Mitam ngaiha Pilat jiang an honga anga ngai a aluithochak anga mantho na ranga an hong dingkel.

⁹ Pilat in a sang, “Jiwngai rengpaha kanmasua rang nan dei mo?” Atipe.

¹⁰ Thiampulianngai Jisu chunga thangsiatna an nei jarra ama an hong pek lut ha Pilat in a jet.

¹¹ Tak-ha thiampu lianngai han mitamngai ha anmasiat, Barabas lam ha masu a ranga an lamjui.

¹² Pilat in anmani jiang a ti ret, “Jiwngai Rengpa anti ama hi imo kilorang?”

¹³ Anmanin an khek, “Khros makhai a thatru,” anti.

¹⁴ Pilat in anmani jiang, “Ijarra mo, a man ichuansiatmo a tho?” Atipe. Tak-ha anmanin a khel det an khek, “Khros chunga thatru,” anluitijui.

¹⁵ Pilat in mitam lung mantairang lungdo mantungrang a dei jarra Barabas lam amasuape jui; hale Jisu ha a man a ve a khros chunga khai a that ranga a pek jui.

Ralmingaining Jisu Anuiso

¹⁶ Ralmingaining Jisu ha khopui sunga ankeilutjui. Hava ha tualmang ani hale ralmi rakipngai ha an kui khomchunjui.

¹⁷ Hale anmanin puansen dup an khat anmansia, ling lu khu an khat ankualla a lu chunga ankhupejui.

¹⁸ Hava pha anmanin chubeibuk an phut, “Jiwngai Rengpa, naringsei sotrase,” anti.

¹⁹ Anmanin thingpum mola a lu han an ve anchil thuan na, an khup anbiling, an kun na chubei an buk jui.

²⁰ Anmanin an nuisoa, puansen dup ha alikpea, ama puan anmansi ret, khros khairanga ankaisuakjui.

Jisu Khros Ankhai

²¹ Anmanin lam ma mi ankhat ram lak tenna an phut alui hong, Aleksandar ngai an pa, Sairini Simon ha annamchanna Jisu khros ha anmandomjui.

²² Anmanin Jisu ha an tuanga, “Luroak”, anti mun, Golgotha anti ha antungpuijui.

²³ Hava ram ma han anmanin Myrh le ikanjel ju ha Jisu jiang an lui pek, tak-ha Jisun inpemak.

²⁴ Hale anmanin Jisu ha khros anhem mankhop a apuanha tu in mo itum rang tia rasi anenna an karra ankansemjui.

²⁵ Anmanin Jisu ha khros anhem mankhop ha jingtiang nidan kua pha ani.

²⁶ Achunga masiatna anpekha hinga anjiak, “Jiwngai Rengpa,” anti ani.

²⁷ Hale ama le kan ruaia arukmi anni, an khat a chang tiang, an khat a vei tiang khros ankhaidejui.

²⁸ A ma misamakngai le kan ruaia antelsa a om tia chong thianga a ti ha hingahin a hong tung jui ani.

²⁹ Hava sirra a omngai han Jisu an nuisoa an lu anbura anti, “A man biakinn aset tor pa nithumma asinkhir rangpa,

³⁰ nang na bing a kan san ring taro, khros an phut hongchumro,” tia antijui.

³¹ Hava anga thiampulianngai le dan a theingai han Jisu an nuisoa an khat le an khat an lui kan biak, “A man midangko a san ring a tak a bing a ko kan san ring tor mak.

³² Israel Rengpa, Khrista a tun hin khros an phut hongchumro, hava han keini om takngai na kan nei rang ani,” anti. Hale khros chunga ama le kan ruaia an khai a omngai ha nom ama ha annuiso ani.

Jisu A thina

³³ Sunchim lai tak anphut nidan anthum tenna ram pumpui chunga khuo a jing jui.

³⁴ Phadan an thum tanghin rasa a ring tak a khek, “Eloi, Eloi lama sabakthani,” hava tina ko, “Ka Pathian, ka Pathian, ita mo nina mak jui?” Atina ani.

³⁵ Asirra a ngirngai han an jet pha an lui ti, “Enru, a man Elija a kui,” anti.

³⁶ Mi an khat a tan na tuipompuan spon han darkha tui athur ha amanchop mol an khat amora athila ajup suale in ranga a pek a ti, “keinin man inrei. Elija a honga ama khros tenna an vasan rang mo ngakrei,” anti.

³⁷ Hale Jisu rasa a ring tak a khek-a, a ringkhuo a tor jui.

³⁸ Biakinn na puan duang puanjarha a chunga an phut thuoi tenna hernia a kan khuisenjui.

³⁹ Hale Jisu mai angatchak an ngir ralmi reakhat lamkei pa han aphuk atorha a mu a, “Adik tak hiva mipa hi Pathian Nai Pasal ha ani” a ti.

⁴⁰ Hava mun na an phut a lak tak a hong en numeingai, ankara han Meri Magdalen, matumtak Jems a nu le Josep nu Meri, hale Salomi anni.

⁴¹ Anmanin Jisu ha Galili a-om lai an phut anhongsanna an hong jui ani. Hava mun han Jerusalem ma ama le an hong kan ruai numei a tam tak an lui om jui.

Jisu An phum

⁴² Sernikhuo mandonna kan ningna nikhuo nitak a hong tung pha han, Arimathia Josep lungamtak a honga Pilat jiang Jisu aruok takluangha a hong lamjui.

⁴³ A ma hi chitjak rang om ulianrup an khat om Pathian rengram a hong tung rang a en chak a om an khat ani.

⁴⁴ Pilat in Jisu a thi jui tia jet pha, adik tak a thi jui mo tia a lung sunga a ngaidon na, reakhat lamkaipaha akuia, a thina a sot jui mo tia ading keljui,

⁴⁵ Reakhat lamkaipa jiang an phut Jisu ha a thi jui ti chong a jet pha, aruakha Josep jiang a pek jui.

⁴⁶ Josep in aruak takluongha akaithak ruipuan anemdak linen ruipuan anemdak an khat a hong choia achuna lunganphut than anchui an khat amanjaljui, hale thankot ha lung an khat in akhardejui.

⁴⁷ Hale Meri Magdalen le Josep a nu Merin takluong aruak anmanjal na ha an lui mu.