MANJETNA 9 - Rabu Athar New Testament (BSI)

¹ Han thaneithiang ranga chang na pa ning pengkul a tum karra kei ning ka mu, vanna arsi khat hi ramuol la a hong, hale ama jiang amongtibui mei khur chabi a pek jui.

² A man mei khur ha a hong long karra, mei khur khat anga mei khur a tam a hong suak, hale mei var ham pum jinga alui jiang.

³ Hava mei khur a hong suak karra, khaitam tak an hong suak, hava ngaiha richi le ranak an lui kan ang rip.

⁴ Anmani jiang a ti pe ramuol la a om ramsulle thingna lungna rakip hi manmang jot mak, tak-ha ramuol la a om miring rakip, Pathian sil choilui ngaiha ko man mangru.

⁵ Khai ngai ham hiva ramuol la mingai hi that ko jot mak, tak-ha tha ranga khan na anmani ha man pong ko a jot, hiva nat na le pong na ngai hi richi ning an se anga a ti.

⁶ “Hiva tha ranga sunga anmani ning an thi jot an om ani, tak-ha thi tor ma u.”

⁷ Khai ngai ning sekor ning ral tho an che tiang an kan ninga an om anga an om rang ke, an lu ngaiha sana lu khu an khu rang ke, tak-ha an mai suo ko miring maisuo anga anti.

⁸ An sam ngaiha numei sam anga a ti, an ha ngai ham Sabakkai ha anga a ti.

⁹ An rop ngai ham thir pek ning an khu de anga a ti, hale an tha khuong rasa an man suak ha sekor ning ral la an che tiang an phuk rasa anga a ti,

¹⁰ Anmani ning tur an nei, richi anga, hiva an ramei ranak jarra anmani ning tha ranga sunga mingai ha an man pong tor.

¹¹ Anmani karra a ruai pu reng khat an nei, ama ha mei khur tianga thavang thiang ha ani, ama a ming ko Hebru amongtibui anti, Grik mi man mang pu anti,

¹² a phut na khodengthei nai a tor jui, hale anni chang na khodengthei na hi hong rang ani jui.

¹³ Thaneithiang ka ruk chang na pa han pengkul a tum karra, kein rasa ka jet, aki manli tenna thaneithiang phur kat na han a ngirra a om.

¹⁴ Hava rasa ning thaneithiang jiang a ti, thaneithiang manli ha man che taru, Euphret tuipuija a omngai ha,

¹⁵ hava thaneithiang manli ning an suak karra anmani ning a tun tak, ve en ni tak, hiva tha tak, hiva kum tak hin, anmaningai jiang miring rup thumma rup khat that ranga, an lui kan ning jui.

¹⁶ Kei jiang a na ti, tangbunga a om sakor ralmi mingai ha million riani anni,

¹⁷ Kein ka mu sakor le a chuang pu mingai ha an rop thir pek ning a khu mei anga a sen, an takngai ha a eng, hale sakor lungai ha nuong sa lu anga a ti, an baija mei lom hale mei khu, a rim siat alui hong suak.

¹⁸ Mi rup thumna rup khat ko hava ripur rining an manmang jui, sekorngai bai tenna phut mei khu le a rim siat ha alui hong sauk.

¹⁹ Ajarko hava sakor ngai rat na ha ko, a baija hale an rameija a om, an ramei ngaiha rul alu anga a ti, hava han mi a manmang tor ani.

²⁰ Hava ripur ngai ning ala manmang lui miring ngaiha, an siatna tenna la hong kan hei ma u, anmanin seitan chubeibuk ha la bang ma u, hale kut sin Pathian sana ruphai thing kung ngaiha sing sat thei ma u, chong ri tenna thei ma u.

²¹ Hale an chuan siatna ten nom, an mi that na, an satlui na, omchan salui an che na, an ruk na tenna phut, an lung ha thul ma u.