MANJETNA 7 - Rabu Athar New Testament (BSI)

Israel mi 144, 000

¹ Hiva suale kein ka mu thaneithiangngain ramuol aki manli hin phaivou an chur, han phaivuo lui rang mak, ramuol hin nom, tuionglian hin nom, hale thing kung hin nom,

² han kei ning thaneithiang a dang khat nisua thianga a hong pa han Pathian sil alui kan nam, a man rasa ringa alui hong khek Puma ming ramuol manmang torna ranak a pek ngai jiang alui kui.

³ Thaneithiang in a ti, “kei ning Pathian mingai ha an chal la sil ka nam mak kar je, ramuol, tuionglian le thing kung ngaiha manmang di maru.”

⁴ Kei ning sil an nam ngaiha an mel ka jet jui; Israel naingai karra phung rakip sil an nam hi mi 144, 000 anni.

^5-8 Phung khat sunga miring 12, 000 je anni, Juda, Reuben, Gad, Asher, Naptali, Manase, Simeon, Levi, Issakar, Zebulun, Josep, Benjamin.

Mitamngai Sunga

⁹ Hiva nuk le kein tel torlui khan na a om ma ka mu anmani hi jat rakip phung rakip le chong rakip a hong ngai anni, anmanin reng ong na madonna an ngirra belram han puanngui chual a tho hale anmani kut no rachang an lui lek;

¹⁰ rasa a ringa an hong khek, san ring na ha ama a reng ong na mun na a om belram ha ani.

¹¹ Areng ong na mun ha ulianngai le Thavang Thiang, jiba manli ngain an lui hil, anmanin a reng ong na mun na an kun na Pathian ha chubei an buk.

¹² Anmani ning anti, ama man pakru, mahok na a satna ha pha rakip kan Puma Pathian ama jiang om rase, Amen.

¹³ Ulianngai karra khat in kei jiang ana dingkel, hiva Puanngui tho ngaihi tumo anni, hon tianga a hong mi mo anni?

¹⁴ “Kein jet making Puma!” Nang in na jet Puma kati, a man kei jiang a ti ret, “Hiva mingai hi khodengthei na tenna a kan sanringa a hong mingai ha anni, anmanin an puan ngaiha belram thi senna an rasuk an man thiang jui.

¹⁵ Hiva jarra anmanin Puma a reng ong na madonna an ngirra sun le jan na ama inn thiang mun na chuan an tho, hale ama reng ong na han an ong mingai ha a man san ring nati.

¹⁶ Anmani ha i tik an in nom von cham, tui ral ha om lai noning, anmani chung ani ham lum noning, a kang ti ham om noning.

¹⁷ Ajarko a reng ong na mun a laija a om belram ama ha belramsel ham ani, hale a man mingai ha ruai nati, hale amongtibui ring na pek nati, hale an mit tui rakip ham a man not pe rang ani.”