MANJETNA 5 - Rabu Athar New Testament (BSI)

Che chun Le Belram Naite

¹ Kei ning Puma reng ong na mun chang tiang han che chun ngaiha ka lui mu che chun a sunga le mapal la hin Pum jiak alui kan jiak hale sil sarije alui kan nam.

² Hale, thaneithiang chung nung khat ning rasa ring tak chong khek ha kein ka jet, tumo hiva che chun sil nam sa hi long na rang rahui a nei?

³ Tu khat ning om, vanram ramuol hin nom hale thuai hin nom hava che chun long ranga rahui nei ma u.

⁴ Kein lung tok ka chap, ajarko tu khat om mu making hava che chun sunga rabu long ranga rahui nei ma u.

⁵ Han ulian khat ning kei jiang a ti, “chap maro enro, Judia phung sunga a rat a tor khat ning David inn sunga hong na ta, ala long tor rang ke, a man sil ngaiha ve khui na ta che chun sunga rabu ha ala long rang ke.”

⁶ Hale kei ning belram khat reng ong na a lai tak hin ka mu, ama ha jiba manli le ulian manli ning an hilla a om belram ha thi ranga alui hong suak, ama ha a raki sari le a mit sari alui om, hava ngaiha Pathian thavang sari ha an lui ni, hava ngaiha ramuol rakip an lui hong tir.

⁷ Belram ning Pathian ong na chang tiang han ache ache chun ha a lei lui.

⁸ A man alui han, jiba le ulian somni leimanli ngai ning belram a madonna an kiak, anmani rakip in sana kheng kam le a rim hui thai an lui lek, Pathian manpak na ranga ani.

⁹ Anmani ning la a thar khat an thoa an lui ti, “Nanghi hiva che chun long ranga rahui na ni, nang in thina na neija na thisen tenna jat rakip le phung rakip chong rakip a chok jui.

¹⁰ Nang in anmani hi a thiang Pathian rengram chuan tho ngai na man chang jui.”

¹¹ Hale kein reng ong na a mun na a om jiba manli le ulianngai kol la an om thavang lising, lakh lakh ngai ning an khek ngaiha, ka lui mu.

¹² Hale an lui khek, rasa ringa, “Belram an khat ning ranak rakip ching na, rat na rakip mu na ranga rahui a nei, chit jakru mahok na han man pakru.”

¹³ Hale kei ning ramuol chunga a om jiba rakip, ngaile, simlei chunga a omngai rakip ning, an tho la kein ka jet, reng ong na hin a om puma ama le belram manpak nale ama mahok na lian na ha amongtibui ha ni rase.

¹⁴ Jiba, manli ning an sang “Amen” hale ulianngai ning om an bok chubei an buk.