MANJETNA 2 - Rabu Athar New Testament (BSI)

Ephesia va Chong shan

¹ Ephesia biakrup hina a om thaneithiang jiang hiva chong hi jiakro, hiva chong hi a kut chang tiang a arsi sari a om hale sana thai mei ngir na sari karra ache Puma ama han a ri ani;

² Kein ka jet “Nang in imo na tho, chuan tho hi iduk a tat mo ani, hale iduk khang thei mo na lui ni tihi.” Nang in mi salui ngai ko jot tor ma che, hale nang in na jet, Pathian tirlon kan ni an lui ti, tak-ha Pathian tirlon ko lui nima u, nang in anmani ha mi leisei anti tia na jet.

³ Nang in na khang thei, kei ranga khodengthei na rakip han nom lui bang chil ma che.

⁴ Tak-ha kein nang hi na lui jet making, a tunko nang in a rapa anga na lungsiat lai ma che,

⁵ ngaidonro na siatna ha i duk mo a tam jui? Na siatna tenna hong in lang a rapa lai anga ni retro, na siatna ha na mak mak inko, kein hong ka ta na thai mei ngir na ha a ong na mun tenna ki lui rang ke.

⁶ Nang in na jet Nikolaitan ning i tho ha dei ma che, na ma tir,

⁷ a kuor a om mingai ning ngai rase u, Thavang Thiang in biakrupngai jiang a ti, hava rakip ha atorra a hong ama ha ring na thing kung ha ki pek rang ke hava ha Puma rahuan na a om.

Simarna Biakrupngai jiang Chong pek

⁸ Simarna va a om biakrup thaneithiang jiang hiva chong hi jiakru, hiva chong hi a phut nale a torna pa ama tenna ani, ama hi athija vei khat a ringkhir jui.

⁹ Kein na khodengthei na ha ka jet, nang hi na riang tak-ha a thianga nang hi na nei! Kein ka jet a satlui mingai ning nang jiang an ri; Jiw kan ni anti, tak-ha nima u anmani ko seitan karra an om.

¹⁰ Nang in khodengthei na ngaiha i te khat chit maro, jetro, a salui ning nang hi ren inna nala en sin nanti, nang in ni som khan na pong khodengthei nati, kei hi na juiro thina rang khan an in nom kei ning nang ha ring na lu khu na pek ati.

¹¹ Thavang ning biakrup a ri chong ha na kuor a om inko ngairu, chung suak na an nei, (anmani ha veini chang na thina han nom tok lai noni u).

Pergamum Biakrup Jiang Chong pek

¹² Pergamum biakrup a thaneithiang jiang jiakru, hiva chong lam hi chemngai a ngei anni a neipu ama tenna ani.

¹³ Kei ka jet nang hon mo na om, hava han seitan ning ama reng ong na mun na a ong nang hi adik ha na ni, kei jiang tak na ngai na ha la man mang ma che, seitan ning a leng na mun na, nan madonna an that kei ka shakhi chang tak ana ngai Antipa phat lai ten nam kei jiang tak nan na la ngai.

¹⁴ Tak-ha nang ni chunga kein ka jot lui aviar a om, nan karra Balaam a chong jui aviar nan om Balaam ning ijamo mingai ha a ruai rang, siatna lampui han chak na nek na an nei, kut sin Pathian chubei an buk, hale taksa hui na ani lui omchan han an che.

¹⁵ Ha ang han mi aviar ning Nikolaitan chong ria an lui jui.

¹⁶ Nan lung thul taru a tun ko nan lung nan thul mak aninko kei a rak tak nang ni jiang ka hong rang ke, hale ka bai tenna a om chem sei han anmani ha ka manmang rang ke.

¹⁷ Nan kuor a om aninko hiva thaneithiang in biakrup a atihi ngairu, hiva a tor ngai ko kein pong lo ha ki pek rang ke, hale an renga a man tam lungngui ngaiha ki pek rang ke, hava lungngui chunga an jiak ha tu khat innom jet ma u, hava lung a mu niluia.

Thiyatirangai jiang Chong pek

¹⁸ Thiyatira biakrup sunga a om thaneithiang jiang man jetru. Hiva chong hi Pathian nai tenna a hong ani, a mit ha mei anga a var.

¹⁹ Kein ka jet imo na tho ti ha, na lungsiat han na chuan tho na chong ri, na khang thei na, a renga a rapa lai nek, a tun lam chuan na tho det tihi.

²⁰ Kei ning hivahi jot making, numei Jezebel nek nan khang thei, tak-ha a man Pathian chong sem ka ni a kan ti bak a ama a chong sem hin ko ka mingai hi ani lui le taksa hui na lam hin a man che jui, hale kut sin Pathian ha chubei an lui buk.

²¹ Kei ning a lung a thul na ranga a pha ka pek, tak-ha a man a chuan siatna tenna ko hong kan hei tor mak.

²² Om chan satlui a ache mingai ha kein an jal na tenna ki pei rang ke, a rak tho rang ka ni, animak inko an chuan siatna tenna an lung thul noni u.

²³ Hale ama a nuk jui ngai ham ka manmang rang ke. Biakrup rakip ning jet rase u, Puma ning mirakip ngaidon na an jet ti rase u, an tho nuk juia anlo man kein ka man mu rang ke.

²⁴ Han Thiyatira hin a om mirakip ning hiva ani luija chuan hi lui jui ma u. Nang ni seitan lung rilla an tho chuan hi la jet ma che u, kein nang ni jiang na ti rong, nang ni chunga kein phur rik i te na pek noni king,

²⁵ kei ka hong kir mak kar je nang nin asat da lui ouk ru.

^26-28 Hiva rakip a tor pu ama ha a torna khan nom kei ka dei ha an tho tor rang ani, kei ka pa jiang ka mu ranak ha anmani jiang om ki pek rang ke, anmani jiang thir rui ha pek kata leipak bel ve khui anga an ve khui rang ani, kein jing dai sisor var han anmani jiang ki pek rang ke.

²⁹ Nang ni nan kuar a om inko, Thaneithiang in biakrupngai jiang a ri ha juiru.