MANJETNA 14 - Rabu Athar New Testament (BSI)

¹ Hava suale kein ka en karra Zion tangbunga belram ha a ngir ka mu, ama le mi lakh an khat le lising sommanli leimanli an om, an chal la ama mingle an pa ming ha an lui jiak.

² Han vanram tenna rasa khat ka jet a rasa tui kan nok rasa anga, hale rori anga a ti, han mi ning an tum pengkul rasa anga kein ka lui jet.

³ Mi Lakh an khat le lising sommanli leimanli ngaiha reng ong na madonna an ong, jiba manli le ulian manli ning la a thar ha an tho, mi lakh khat le lising sommanli leimanli ngai ni lui a ramuol chunga tute khat ning om hivahi lui jet ma u.

⁴ Anmani ha numei le kan tok lui a thiang mi anni, hale belram chena ha an lui jui, anmani ha ramuol mingai karra ring na a mungai ha anni. Hale anmani hi Pathian jiang le belram jiang a rapatak an pek lut rang ngaiha anni.

⁵ Anmani ha adik lui tho ma u, leisei hi lui jet ma u,

Thaneithiang An thum

⁶ Hava suale kein thaneithiang khat chunga a sanga a vuang ha ka mu, a man chong pui ha mirakip le jat rakip phung rakip le chong rakip jiang ri rang alui tho.

⁷ A man rasa ringa a hong khek, “Pathian ha chitru, a lian na ha man pakru, ama jiang miring rakip chunga chong ri rang pha a hong jui, amapha chubeibukru, vanram le, tuipui le ramuol hi a man a sin ani.”

⁸ Anni chang na taneithiang han a thuia a ti pe, ama ha a hong chul jui, Babilon a lian na ha a kui jui, ama ning a mingai ha aju a man ina, ani lui omchan le taksa hui na tianga hin a man rat jui.

⁹ An thum chang na thaneithiang ning a rapa hale anni chang na ha a juia a ti; “Rasa a ringa tu ang khat ning sale aramilla chubei a buk ngai han an chal la animakle an kut jet na an choi, a mun ko,

¹⁰ A ma ning Puma lung thak na chunga ju ha a man in rang ke, hale ama ha amongtibui meija hale thaneithiang le belram madonna khodengthei na a man mu rang ke.

¹¹ Hale anmani ha khodengthei na nikhuo han amongtibuia chung tiang a kal, hale sa le ara mil chubeibukngai ham jet na a choi rakipngai ham sun le jan na pong kan sak no ni u.”

¹² Hin mi thiang ngaile Pathian chong rakip hale Jisu ha tak a ngai mingai khang thei na ha om nati.

¹³ Hale kein Pathian tenna rasa khat chong alui ri ka jet, jiakru a tun tenna phut Pathian chuan a sin na a thi ngaiha ravansat ha anni, Thavang thiang han alui ti, “Anmani an tho nuk juia pong kan sak rase u, ajarko anmanin an chuan ha anmani le a kan ruai.”

Ramuol Rasik na Pha

¹⁴ Hale kein ka mu, sum phai ngui chunga alu lim sana lu khu, a khu hale a kut koite a lek, mi pasalnai a puo khat a hong,

¹⁵ hava suale thaneithiang a dang khat ning inn thiang tenna a hong suak a chap chunga rasa ringa a hong khek sum phai chunga ong pa jiang a ti, na koite lek in lang chang luak taro, ajarko a phat a hong tung jui, ramuol hi a hong min jui, chang luak na phat ani jui.

¹⁶ Hale, Puma koite a lek ama han, a hong chumma, ramuol la chang at a phut jui.

¹⁷ Han kein thaneithiang a dang khat vanram in thiang tenna a hong tung a kut chunga koite a ngui khat alui lek.

¹⁸ Hava han thaneithiang mei lek pu han a thiang mun tenna alui hong, ama ning rasa ringa a khek thaneithiang koite ngei lek pa jiang na koite ha lekro, hale ramuol la amin darkha ara a bor ha atro.

¹⁹ Thaneithiang ning koite a lek ramuol hin a hong chumma darkha kung nga a rangai alui at, hale Puma lung thak sumna mun na alui hong ma sul.

²⁰ Darkha ara ngaiha khopui va ralla sumna mun na a tak no ia, thisen lam tuilian anga a hong suak kilo mitre reathum a sei, hale mitre anni alui thup.