MANJETNA 13 - Rabu Athar New Testament (BSI)

Ram sangai jiang Man mu na

¹ Hava suale kein sa an khat tuionglian tenna a hong kal ha ka mu, alu sari, a raki som a om, a raki rakip chunga reng lu khu a om, hale alu ngai rakip chunga Pathian chitlejak om lui chong alui kan jiak.

² Hava saha ram ui anga a ti, a ke lam Sa vom anga, a bai ko sabakkai anga ani, ri reng ama ranak ha sa ama jiang alui pek, ama a lian nale a torna rakip ham a pek de jui.

³ Sa alu khat a thi sa anga ka mu, tak-ha a dam khir, ramuol la a om mirakip ning pum ngak an ngak ama ha an jui.

⁴ Mirakip ning ri reng ha chubei an buk ajarko ama ning sa ngai jiang rat na ranak a pek, anmani ning sa chubei an buk anti, “sa hi tu ang mo ani? Tu ning mo an dui tor rang?”

⁵ Sa han a murra ri torna ranak alui nei jui, Pathian chit lai mak, ama jiang rat na irakip hi tha som manli leini hi a om a ti.

⁶ A man Pathian ha khua alui khong, Pathian ning a ngai da vanram ma a om rakip ham khua a khong.

⁷ A man Pathian mingai ha manmang ranga a jot pe jui, a man jat rakip le phung rakip ranak a pek jui.

⁸ Ramuol chunga a om mirakip ning chubeibuk rase u, tak-ha a phut na tenna an lui that belram ama rabu an ming a omngai ko chubeibuk ma rase u.

⁹ A kuor a om min ngairu.

¹⁰ “Tu ang ning mi chur rang a tinko, ama ha a chur rang ke, hale tu ang khat ning mi ha chem ma that rang a tinko, ama ham chem ma an that rang ke, hivahi Pathian takngai le khang thei mingai han an lui ti ani.”

¹¹ Hava suale kein sa a dang khat ka mu, hava sa ramuol tenna a hong suak ani, ama a raki anni, a om, belram raki anga alui ti, a man ri reng anga chong a ri.

¹² A man a rapa sa madonna a ranak ngaiha a man mu, hale mirakip ham a rapa sa jiang chubeibukru antipe.

¹³ Hava sa anni chang na pa ning a ngak pa a tam lui tho, ama ning vanram tenna ramuol chunga mei lom a man honga ramuol mingai jiang an man mu jui.

¹⁴ A ma ning ramuol la a om mirakipngai ha a onga, a ngak pa rakip ha a rapa sa madonna a tho, han sa han anmani jiang a ti, chem ma an lui that a hong ring khiret sa chitlejak na ranga kut a sin Pathian ha sinru a ti pe.

¹⁵ Anni chang na sa han phuk a pek karra kut an sin sangai han chong an ri thei, hale hava kut a sin Pathian sa chubei a buk lui rakip ha an that.

¹⁶ Sa ning, a sin a lian, a riang a nei kan chong mirakip jiang, an chal la animakle an kut jet thei na rang jet na a lei lui.

¹⁷ Tu ang khat ning om hiva ming kan chel luija, sa ming ha an kan chel mak inko chok om jot mak, juor om jot mak.

¹⁸ Hivahin jet thei na a om, hale a jet om ama han sa a mal ha tel rase, ajarko hava mi khat a mal ha ani hava a mal ko 666 ha ani.