MANJETNA 12 - Rabu Athar New Testament (BSI)

¹ Chung van hin pong nale khodengthei na a om jui. Numei khat ning alu chunga arsi somleini a ton na ni le sortha chunga alui ngir.

² A man a rak nai nei rang ani, nai a nei karra a nat le pong nale chap na a tam mu nati.

³ Van chunga hin a dang pong na khat ala kando ret, ri reng khat pum sen na a sen na alu sari le a raki som a om, lu khu rakip chunga lu khu alui om.

⁴ Hava ri reng a ramei han arsi rup thumma khat hi chung van tenna ramuol la kai thak nati, anmani numei madonna an ngirra naite annei suale lui chak rang an lui ti.

⁵ Hale a man nai khat a neia man ramuol la jat tin hi athir thiang re a vai ala hom rang ke, hale a nai ha Pathian jiang an tuanga ama reng ong na mun na alui tuang.

⁶ Hale numei han ramtong na mun han alui tan, Pathian in ama ranga mun a siak hava han Pathian ning ama ha nikhuo lising an khat reani som ka ruk 1260 hi alui ngak ani.

⁷ Han vanram ma ral a hong suak Micheal le ama thavang thiang ngai ning ri reng jiang ral an tho jui.

⁸ Ri reng ning ral a tor mak jarra vanram ma om jot lai mak.

⁹ Ri reng a lian pa tak-ha vanram tenna an hong ma sul jui, ama ha seitan anti ha ani, ama jiang ramuol pumpui pong na ranak ha a nei, ama le ama nuk jui le thaneithiangngai le an renga ramuol la an hong ma sul jui.

¹⁰ Han kein vanram ma rasa a ring khat ka jet, a tun ko san ring na ha a hong jui, a tun ko Khrista ama a rat na han keini jiang a na man mu, ajarko keini ulenaingai jiang a na man pong sun le jan na Pathian kolla ngir ama ha vanram tenna an hong ma sul jui.

¹¹ Anmanin ama ha belram thisen le chong dik jarra ral tho torna alui nei, anmanin an ringkhuo ngaiha thina rang khan na an kan pek.

¹² Nan ning man satru, nang ni vanram ma a omngai ranga i duk pong na mo i ni rang ramuol la a om ngaile tui pui chunga a omngai rang, seitan ning ramuol la a hong chum jui, ama ranga phat a bong khat jak a om jui tia lung thak tak a hong jui.

¹³ Han ri eng ning ramuol chunga an na ma sul tia hong jet karra ama ning nai a nei numeingai jiang pong na a tam a pek jui.

¹⁴ Numei ama ha kum thum le a her, a man san rang le en ranga ri reng ning a man mang tor mak na ranga man mu a lian khat a tha anni a nei ha a man ngak ranga alui pek.

¹⁵ Numeinu ha tuilian ning mantanpui na ranga ri reng ning a nuk tiang a hong not karra, a baija tuilian a hong suak jui.

¹⁶ Ramuol ning numeinu ha an lui san, ri reng bai sung tenna a hong tuilian ha simlei ning a jup ver jui.

¹⁷ Ri reng ning numeinu jiang lung thak na a neia ramuol chunga a om a naingai rakip manmang ranga alui hong, Pathian chong jui ngai rakip le adik chong, Jisu ning i man jet rakip ha manmang rang ati jui.

¹⁸ Hale ri reng ning tuionglian sirra alui ngir.